რას მოგვიტანს 2015 წელი? - ამაზე მსჯელობა კი არა, მარჩიელობა შეიძლება, თუმცა ფაქტია: წლევანდელი ერთ-ერთი მთავარი, როგორც იტყვიან, მოვლენა ე.წ. “კაბელების საქმე” იქნება. მეტიც, 2014 წლის ნოემბერში დაწყებული სკანდალის კვალი შესაძლოა, პარლამენტის ყოფილ თავმჯდომარემდე მივიდეს. ყოველ შემთხვევაში, უშიშროების თადარიგის პოლკოვნიკი, უსაფრთხოების ექსპერტი კონსტანტინე ფორჩხიძე “ქართული სიტყვის” სკანდალური ინტერვიუების ციკლში მნიშვნელოვან მინიშნებას აკეთებს და აცხადებს, რომ მოსამართლე ჯემალ კოპალიანი, რომელმაც თავდაცვის სამინისტროს თანამშრომლები წინასწარ პატიმრობაში დატოვა, პირდაპირ თუ ირიბად, ბადრი ბიწაძესთანაა დაკავშირებული. შეგახსენებთ: ადვოკატებმა დაკავებულებისთვის აღმკვეთი ღონისძიების შეცვლის შუამდგომლობით საქალაქო სასამართლოს 2014 წლის დეკემბრის ბოლოს მიმართეს. ასევე, ცნობილია, რომ პატიმრობაში მყოფებს თავდებში 40-მდე ადამიანი, მათ შორის, პარლამენტარები და საზოგადოებისთვის ცნობილი სახეები ჩაუდგნენ, თუმცა კოპალიანმა არც ეს გარემოება გაითვალისწინა... მაშ ასე, ქართველი სპეცსამსახურელი მორიგ სკანდალურ ინფორმაციებს ასაჯაროებს...     

- ბატონო კონსტანტინე, ისეთი პირი უჩანს, რომ 2015 წლის ერთ-ერთი ყველაზე მნიშვნელოვანი, ასე ვთქვათ, მოვლენა ე.წ. “კაბელების საქმე” იქნება, მით უმეტეს, რომ თავდაცვის სამინისტროს დაპატიმრებულ თანამშრომლებს დეპუტატები თავდებში უდგებიან. ამასთან, ინტელიგენციის ნაწილი, გამოძიების დამთავრებამდე, მათ გათავისუფლებას ითხოვს...

- მართალია, ადრეც მითქვამს, რომ “კაბელების საქმეში” მონაწილე ერთ-ერთი პირის თანამდებობაზე დანიშვნის წინააღმდეგი ვიყავი და ამაზე თავის დროზე ირაკლი ალასანიასაც ვუთხარი, მაგრამ მიუხედავად ამისა, ვთვლი, რომ “კაბელების საქმე” შეკოწიწებულია და პოლიტიკური მოტივაციის სუნი ასდის. გამოძიებაც ამიტომ იჭიმება. არადა, საქმე ძალიან მარტივია და პროკურატურას მტყუან-მართლის დასადგენად ამდენი დრო არ უნდა დასჭირვებოდა. ბოლოს და ბოლოს, დანაშაულის მოტივი და სუბიექტური მხარე მაინც ხომ უნდა გაერკვია, რომლითაც ნათლად გამოჩნდება, რომ ამ საქმესთან ირაკლი ალასანიას შეხება საერთოდ არ ჰქონია, თუმცა როცა დანაშაული ხდება, სისტემის ხელმძღვანელს პოლიტიკური პასუხისმგებლობა ეკისრება, მაგრამ ეს მაშინ გამოჩნდება, როცა გამოძიება დამთავრდება და სასამართლოს განაჩენი დადგება...

საერთოდ, სამხედროების ასეთ გაურკვეველ საქმეზე დაპატიმრება და წინასწარ პასუხისგებაში მიცემა იმაზე დიდი სასჯელია, ვიდრე შეიძლება, იმსახურებენ. ისინი არსად გარბოდნენ, თან თავდებში ამდენი ადამიანი ჩაუდგა და იმის თქმა, გამოძიებას ხელს შეუშლიანო, ალოგიკურია, მით უმეტეს, რომ უპირობო გათავისუფლებას არავინ ითხოვს!

- თავდაცვის სამინისტროს დაპატიმრებულ თანამშრომლებს აღმკვეთი ღონისძიება, როგორც ცნობილია, მოსამართლე ჯემალ კოპალიანმა გაუგრძელა. ამ პიროვნებაზე რა იცით?

- საქმე თავდაპირველად, ჩემი ინფორმაციით, სხვა მოსამართლეს ჰქონდა, მაგრამ უცებ ჯემალ კოპალიანი გამოჩნდა და დიდი კითხვის ნიშანიც სწორედ ამან გამიჩინა.

- რას გულისხმობთ?

- ჯემალ კოპალიანი ის მოსამართლეა, რომელიც 9 წლის განმავლობაში, ჩემი აზრით, პირადად ვანო მერაბიშვილის დავალებებს ასრულებდა.

- ამ მოსაზრების დასაბუთება შეგიძლიათ?

- თუნდაც ის პროცესი გავიხსენოთ, რომელიც ე.წ. ამბოხებას უკავშირდება.

- რომელ ამბოხებას გულისხმობთ?

- რომელსაც გია კრიალაშვილი შეეწირა. ჯემალ კოპალიანმა კობა კობალაძე სასამართლო დარბაზიდან გაათავისუფლა, დანარჩენებს კი, გარკვეული სასჯელი შეუფარდა.

- კობა კობალაძის დარბაზიდან გათავისუფლება, ცხადია, მაშინდელი ხელისუფლების ინტერესში არ იქნებოდა. ასე რომ, ეს გარემოება თქვენს მოსაზრებას, მოსამართლე კოპალიანი მერაბიშვილის დავალებებს ასრულებდაო, მგონი, აბათილებს...

- ვანო, გეტყვით, კოპალიანი ვინც არის და დასკვნები მერე გააკეთეთ.

- კი ბატონო, გისმენთ...

- კოპალიანის ბეგრაუნდი კარგად ვიცი - მაშინ, როცა სახელმწიფო უშიშროების სამინისტროს სამხედრო კონტრდაზვერვის სამეგრელო-ზემო სვანეთის სამსახურის უფროსი ვიყავი, ბატონი ჯემალ კოპალიანი სენაკის გარნიზონის სამხედრო პროკურორი გახლდათ. იმხანად სენაკის გარნიზონი მთელ სამეგრელოსა და კოდორის ხეობას მოიცავდა, ანუ ამ რეგიონში სამხედრო საქმეებზე საპროკურორო ზედამხედველობას სწორედ ჯემალ კოპალიანი აწარმოებდა. სხვათა შორის, ისეთი რეპუტაცია ჰქონდა.

- “ისეთი”, ანუ ცუდი?

- ყოველ შემთხვევაში, არც კარგი...

იმ დროს სამხედრო პოლიცია არ არსებობდა და სამხედროების მიერ ჩადენილი დანაშაულის გამოვლენა და ოპერატიული მოკვლევა სამხედრო კონტრდაზვერვას უწევდა, თუმცა ვცდილობდი, რომ უფრო დანაშაულის პრევენცია მომეხდინა, ვიდრე - საქმე პროკურატურისთვის გამეგზავნა.

- ხომ შეიძლება, ვინმემ თქვას, ფორჩხიძე ასე იმიტომ იქცეოდა, რომ დანაშაულს ფარავდაო?

- როგორ გეკადრებათ! საქმის პროკურატურისთვის გადაცემას აზრი არ ჰქონდა, რადგან ყველამ იცოდა, პროკურატურაში რაც ხდებოდა.

- რა ხდებოდა?

- ის ხალხი, ვისზეც პროკურატურას მასალებს გადასცემდი, ქუჩაში გამოდიოდა და ყველაფერი ბუმერანგივით უკან გიბრუნდებოდა...

- თუკი ეჭვობდით, რომ სამხარეო სამხედრო პროკურორი რაღაც მაქინაციებში იყო გარეული, ამის თაობაზე საქმის კურსში მის ზემდგომებს რატომ არ აყენებდით?

- ამ მაქინაციებში მთელი სისტემა იყო ჩართული და ზემდგომის საქმის კურსში ჩაყენებას რა აზრი ჰქონდა?!

- მაშინ სამხედრო პროკურორი ვინ იყო?

- ვინ და, - როგორც მახსოვს, ბადრი ბიწაძე... თუ არ ვცდები, თბილისის სამხედრო პროკურორი კი, ჯემალ მინდორაშვილი გახლდათ.

- საუბარი იქითკენ მიგყავთ, რომ კოპალიანი სენაკის გარნიზონის სამხედრო პროკურორად ბიწაძემ დანიშნა, ანუ მისი კადრია?

- დიახ... მერე, ერთხანობას, კოპალიანი გაქრა, მაგრამ “ვარდების რევოლუციის” შემდეგ, ალბათ, ბადრი ბიწაძისა და იმ გუნდის ძველი კავშირების გამოყენებით, რომელიც სამხედრო პროკურატურაში ბიწაძის საახლობლოდ ითვლებოდა, მოსამართლე გახდა.

- ყოველივე ზემოთქმულიდან გამომდინარე, ბატონო კონსტანტინე, ეჭვობთ, რომ “კაბელების საქმის” უჩინარი რეჟისორი შესაძლოა, ბურჯანაძე იყოს, მით უმეტეს, რომ “დემოკრატიული მოძრაობის” ლიდერი ირაკლი ალასანიას, როგორც გარედან ჩანს, მთავარ პოლიტიკურ მტრად მიიჩნევს?

- არაფერს გამოვრიცხავ...

კოპალიანთან დაკავშირებით კიდევ ერთი მომენტია: სამხედროებთან დაკავშირებულ ყველა საქმეს მაინცდამაინც კოპალიანი რატომ იხილავს? იქნებ, იმიტომ, რომ სისტემას იცნობს, მაგრამ ეს, მინიმუმ, ინტერესთა კონფლიქტია, რადგან თავის დროზე ამ სამხედროებთან, შესაძლოა, საქმიანი ურთიერთობაც ჰქონდა...

მოკლედ, ყველაფერი ეს “კაბელების საქმეში” სერიოზულ კითხვის ნიშნებს აჩენს. სასამართლო კოლეგიის თავმჯდომარე რომ ვიყო, ამ გახმაურებულ საქმეებს კოპალიანს ავარიდებდი და ნებისმიერ სხვა მოსამართლეს გადავცემდი. სხვათა შორის, კვიციანის საქმეზეც გადაწყვეტილება, თუ არ მეშლება, სწორედ კოპალიანმა გამოიტანა.

- აი, აქ კი, თქვენი ლოგიკა, კოტე ბატონო, მგონი, აღარ გაჭრის, რადგან როგორც კულუარებში ამბობენ, ემზარ კვიციანს პოლიტიკურ მხარდაჭერას სწორედ ბურჯანაძე უცხადებს...

- არ მგონია, რომ ბურჯანაძეს კვიციანის ციხიდან გამოსვლა უნდოდეს.

- ეს საიდანღა მოიტანეთ?

- კოდორის მოვლენების დროს, ბურჯანაძე ქვეყნის მეორე პირი იყო და ყველაფერზე, რაც მაშინ მოხდა, პასუხისმგებლობა, ბუნებრივია, მასაც ეკისრება. სხვა თუ არაფერი, ბურჯანაძემ იცის, კოდორში რეალურად რაც მოხდა. ამიტომაც ვამბობ, რომ კვიციანის საქმე სასამართლოს ზერელედ არ უნდა განეხილა - “კაბელების საქმის” არ იყოს, მოტივაცია არც კვიციანის საქმეში გარკვეულა. გარდა ამისა, მოსამართლეს ძირითადი მოწმეები და ფიგურანტებიც არ დაუკითხავს...

- ისე, უცნაურად არ გეჩვენებათ, რომ კვიციანმა, გავრცელებული ინფორმაციით, პრეზიდენტს შეწყალების მოთხოვნით მიმართა? - შეწყალების მოთხოვნა, როგორც ვიცი, ავტომატურად დანაშაულის აღიარებას ნიშნავს...

- შეწყალება აღიარების გარეშეც შეიძლება - ირაკლი ბათიაშვილის შემთხვევა გაიხსენეთ, რომელსაც დანაშაული არ უღიარებია და ნინო ბურჯანაძემ, რომელიც მაშინ პრეზიდენტის მოვალეობას ასრულებდა, თავისი ინიციატივით შეიწყალა. მარგველაშვილსაც შეუძლია, კვიციანთან მიმართებაში თავისი დისკრეციული უფლება გამოიყენოს და შეიწყალოს, მაგრამ ემზარის გარეთ ყოფნა არ აწყობთ.

- რატომ?

- იმიტომ, რომ ბევრი რამ იცის.

- ვისზე?

- მათზე, ვინც დღეს პოლიტიკურ სპექტრში არიან გაბნეულნი.

- ეს ადამიანები “ქართულ ოცნებაშიც” არიან?

- დიახ... ემზარ კვიციანი ძალიან ინფორმირებულია, მით უმეტეს, იმ თემაზე, რის გამოც დღეს სასჯელს იხდის.

- ეს გასაგებია, მაგრამ მოდით, ისევ “კაბელების საქმეს” დავუბრუნდეთ: თეორიულად, დასაშვებია, რომ ნინო ბურჯანაძე ამ გზით ალასანიას ჩაძირვას ცდილობდეს?

- პირდაპირ ვერ ვიტყვი, მაგრამ მიჩდება შეკითხვა: რატომ იხილავს “კაბელების საქმეს” მაინცდამაინც კოპალიანი, რომლის ბეგრაუნდიც ბურჯანაძის მეუღლეს უკავშირდება?

- შეიძლება, ყველაფერი, უბრალოდ, დამთხვევაა...

- კი ბატონო, მაგრამ სამხედროებთან დაკავშირებულ ყველა საქმეს აქამდეც კოპალიანი იხილავდა და ეს “ნაციონალური” ტრადიცია ახლაც გრძელდება.

- თუკი ასეა, მაშინ შესაძლოა, ლოგიკამ იქამდეც მიგვიყვანოს, რომ ბურჯანაძე და “ნაციონალები” თემატურად თანამშრომლობენ?

- არ ვიცი, ვინ ვისთან თანამშრომლობს, მაგრამ “კაბელების საქმე” პირდაპირ ალასანიას წინააღმდეგაა მიმართული. ისე, ყველაფერ ამაში ცოტა სხვა რამესაც ვხედავ.

- სახელდობრ?

- რუსულ ინტერესს.

- ანუ?

- მოსამართლეები და პროკურორები ცდილობენ, საქმე იქამდე მივიდეს, რომ ალასანიას გარკვეული ნეიტრალიზება მოხდეს.

- სხვათა შორის, თავდაცვის ყოფილმა მინისტრმა განაცხადა, თუ ამ ბიჭებს თავს არ დაანებებენ, ბევრ რამეს ვიტყვიო. რა იცის ალასანიამ?

- კაცო, იმ დოკუმენტაციას ხელს ალასანია, ან მე კი არა, ლექსო ბატიაშვილი აწერს. მთავარ იურიდიულ დოკუმენტზე, რომლითაც ეს “დანაშაული” მოხდა, პასუხისმგებელი სწორედ ბატიაშვილია, მაგრამ მას არავინ არაფერს ედავება, ციხეში კი ისინი სხედან, რომლებსაც ზემოხსენებულ დოკუმენტზე ფაქსიმილეც კი არ აქვთ დატოვებული. აი, სწორედ ესაა უსამართლობა!

- ადამიანმა დანაშაული შეიძლება, ისე ჩაიდინოს, რომ დოკუმენტს ხელი არ მოაწეროს, თან თავდაპირველად დაკითხვაზე ბატიაშვილიც დაიბარეს...

- გეთანხმებით, მაგრამ მოსამართლე რომ ხარ, შე მამაცხონებულო, ხომ უნდა მიხვდე, რომ ის ადამიანი, ვისი ხელმოწერითაც ფულის გადარიცხვა მოხდა, პასუხისგებაში არაა მიცემული და არ უნდა იკითხო, რა ხდება?

- ამ, როგორც თქვენ ამბობთ, უსამართლობაზე პასუხისმგებელი ვინაა?

- რა თქმა უნდა, - პროკურატურა.

- ფიქრობთ, რომ უსამართლობას პროკურატურა ავტონომიურ რეჟიმში აკანონებს?

- შეიძლება, ყველაფერი არაპროფესიონალიზმის ბრალია, თუმცა მიზანმიმართულ ქმედებასაც არ გამოვრიცხავ.

- ჰოდა, მაგას გეკითხებით: ამ მიზანმიმართულობის ავტორი პროკურატურაა?

- ალბათ, უფრო, პოლიტიკური ხელმძღვანელობა...

- ბატონო კონსტანტინე, როგორც უსაფრთხოების ექსპერტი, როგორ ფიქრობთ, გამოძიების დასრულებამდე, ამ ადამიანების თავისუფლებაზე ყოფნა ქვეყნის უსაფრთხოებისთვის რისკის შემცველია?

- არა! ვიმეორებ: თავის დროზე ზოგიერთი დაკავებულის თავდაცვის სამინისტროში მუშაობის დაწყების წინააღმდეგი ვიყავი, რადგან მათი კავშირების შესახებაც ვიცი, მაგრამ ვაცხადებ: დღეს ამ ადამიანების ციხიდან გამოშვება საფრთხეს არც ქვეყანას უქმნის და, მით უმეტეს, არც - გამოძიებას!

- რა კავშირებს გულისხმობთ?

- მაგალითად, მინისტრის ყოფილი მოადგილე, ლექსო ბატიაშვილი და ერთ-ერთი დაკავებული, ნუკრი კაიშაური ერთმანეთს დიდი ხანია, იცნობენ.

- საქართველო პატარა ქვეყანაა - ყველა ყველას იცნობს და ეს არაფერს ნიშნავს...

- ვიცი... კაიშაურს ადრე შეხება “სილქნეტთანაც” ჰქონდა, მაგრამ აქ იმაზე კი არაა ლაპარაკი, რომ გამოძიება არ ჩატარდეს. საქმეში სახელმწიფო თანხა ფიგურირებს და, ერთხელ და სამუდამოდ, უნდა გაირკვეს, ეს თანხა გაიფლანგა თუ არა, მაგრამ ჯერ ერთი, ჩანს, რომ პროკურატურას ხელჩასაჭიდი არაფერი აქვს, მეორეც, ამის დასადგენად აუცილებელი არაა, ადამიანები ციხეში იყვნენ.

- ერთ-ერთი სატელევიზიო გამოსვლისას ირაკლი ალასანიას თანაგუნდელმა, ყოფილმა სახელმწიფო მინისტრმა, ალექსი პეტრიაშვილმა “დელტაკომი” და ვინმე კოტარია ახსენა...

- კოტარია ვინმე არაა.

- აბა, ვინაა?

- ზურაბ კოტარია ძალიან საინტერესო ფიგურაა.

- რა ნიშნით?

- “ნაციონალები”, ხელისუფლებაში მოვიდნენ თუ არა, ე.წ. “ოტო”-ს - ოპერატიულ-ტექნიკური სამსახურის ხელმძღვანელად სწორედ კოტარია მოიყვანეს.

- მოსმენებს “ოტო” ანხორციელებს, არა?

- “ოტო” მხოლოდ მოსმენებს კი არ ანხორციელებს, არამედ, გარე მეთვალყურეობასაც აწარმოებს, ანუ მამხილებელ მასალებს აგროვებს. როგორც ვიცი, კოტარია ამ სამსახურში ადეიშვილმა მოიყვანა.

- საიდან?

- მაშინ სტუდენტი იყო. ალბათ, “კმარელებთან” ახლობლობდა... ასე შეიქმნა 28 ათასი ფაილი...

- ესე იგი, “ოცნებას”, მინიმუმ, კოტარიას პასუხისმგებლობის საკითხი უნდა დაეყენებინა?

- აბა, რა უნდა ექნა?

- კოტარია “ოტო”-დან როდის გაუშვეს?

- ვანო მერაბიშვილი პრემიერად რომ გადაიყვანეს, ბაჩო ახალაიას შს მინისტრობის დროსაც, როგორც ვიცი, ცოტა ხანს კიდევ იმუშავა...

- “დელტა კომი” რა არის?

- “დელტა კომი” ისეთივე კომპანიაა, როგორიც, მაგალითად, “სილქნეტი” და “კავკასუსია”...

მოკლედ, ბევრი შეკითხვაა. ვთქვათ, კოტარიას მოსასმენი აპარატურის გაქრობასთან რამე კავშირი ხომ არ აქვს?

- გამორიცხავთ, რომ კოტარიამ ახალ ხელისუფლებასთან ითანამშრომლა და ის ყბადაღებული 28 ათასი ფაილი “ოცნებას” სწორედ მან გადასცა?

- შესაძლებელია... კარგად გამიგეთ, 8 წელი “ოტო”-ს უფროსი რომ ვყოფილიყავი და ამდენი ფაილი გამეკეთებინა, დღეს ასე ვინ დამსვამდა?

- “ოცნებას” მამხილებელი მასალები რისთვის უნდა?

- მე რა ვიცი? ეს “ოცნებას” ჰკითხეთ...

საინტერესოა, იმ კომისიამ, ფარულ ჩანაწერებზე რომ მუშაობდა, ოპერატიულ-ტექნიკური სამსახურის ხელმძღვანელის პასუხისმგებლობის საკითხი რატომ არ დასვა? რა, ეს 28 ათასი ფაილი თავისით შეიქმნა?

- მოკლედ, კოტე ბატონო, თქვენი ლოგიკით, ასეთი ჯაჭვი იკვრება: მოსამართლე კოპალიანი, რომელსაც ბურჯანაძე-ბიწაძის “ბეგრაუნდი” აქვს და კოტარია, რომელიც “ნაცფაილების მამაა”... ჯაჭვის ბოლო სად მიდის?

- არ ვიცი... მე, უბრალოდ, შეკითხვებს ვსვამ...

- მაპატიეთ და, ექსპერტმა მხოლოდ შეკითხვები არ უნდა დასვას...

- სპეციალისტი ვარ - ვიცი, რომ “ოტო”-ს გარეშე ფარული მიყურადება თუ მოსმენა შეუძლებელია და ყველაფერ ამაზე, მინისტრთან ერთად, პასუხისმგებლობა სწორედ ამ სამსახურის უფროსს ეკისრება. სწორედ ამიტომაც ვკითხულობ, თუ რატომ არ დადგა კოტარიას პასუხისმგებლობის საკითხი!

- კარგი, შეკითხვას სხვანაირად დავსვამ: ვის აწყობს ალასანიას მოცილება?

- ეს ის ადამიანები არიან, რომლებიც ხელისუფლებაში მოსვლას ცდილობენ, ანუ გარკვეულ პოლიტიკურ ჯგუფებს იმედი აქვთ, რომ პროდასავლური იდეების კომპრომეტირებით, ხელისუფლებაში მოსვლას მოახერხებენ, მაგრამ ეს არ მოხდება!

- “პროდასავლურ იდეებთან მებრძოლ პოლიტიკურ ჯგუფებში” კონკრეტულად ვის გულისხმობთ?

- ბურჯანაძესა და “ქართული ოცნების” გარკვეულ ნაწილს.

- მაინც, რომელ ნაწილს?

- იმ ნაწილს, რომელსაც ქალბატონ ბურჯანაძესთან კარგი ურთიერთობა აქვს.

- ისე, ნოდარ ხადური “ოცნებაში” და, შესაბამისად, ფინანსთა მინისტრად პირდაპირ “დემოკრატიული მოძრაობიდან” მოვიდა...

- ხადურის გარდა, აღმასრულებელ ხელისუფლებაში სხვებიც არიან, ვისაც ბურჯანაძესთან წლების ურთიერთობა აკავშირებთ...

ერთხელ ვთქვი და ახლაც იმ აზრზე ვარ: ირაკლი ალასანიას ოპოზიციაში გადასვლა დროული იყო, რადგან ჩვენს პოლიტიკაში არსებული თავისუფალი ველის დაკავებას რუსული სეგმენტი ცდილობდა. ყველაფერი ისე რომ არ მომხდარიყო, როგორც მოხდა, 2016 წლის საპარლამენტო არჩევნებში სამი ძირითადი მოთამაშე იქნებოდა: რეიტინგდაკარგული “ქართული ოცნება”, “ნაცმოძრაობა”, რომლის რეანიმაცია-რეინკარნაცია დიდი ხანი ვერ მოხდება და რუსული ორბიტა. ამ ფონზე, ხელისუფლებისკენ გზა სწორედ რუსულ სეგმენტს ეხსნებოდა. არ ვიცი, ალასანიამ ყველაფერი ეს გათვალა თუ ვინმემ უკარნახა, მაგრამ მან ისტორიული გადაწყვეტილება მიიღო!

- რაკიღა ქართულ პოლიტიკაში რუსულ ინტერესებზე ვსაუბრობთ, ბარემ, “როსნეფტის” მიერ ფოთის პორტის აქციების შესყიდვასაც შევეხოთ. ამით ალასანიას ეჭვი, რომ ქვეყნის პროდასავლური კურსი საფრთხეშია, გამყარდა?

- რა თქმა უნდა...

- ხელისუფლება ამბობს, რომ ფოთის პორტის აქციების გასხვისებაში ვერ ჩაერეოდა...

- ეს გასაგებია, მაგრამ ფოთის პორტში გარკვეული ინტერესები თავის დროზე დავით კეზერაშვილსაც ჰქონდა. მერე, აქციები რუს ბიზნესმენს მიჰყიდა...

- თუ იაკობაშვილს გულისხმობთ, ის რუსი კი არა, რუსეთში მოღვაწე ქართველი ბიზნესმენია.

- იაკობაშვილი ჩემთვის რუსი ოლიგარქია! მაგის დედა ვატირე, სააკაშვილი ივანიშვილზე დღეს რომ გაიძახის, რუსი ოლიგარქიო, როცა “ნაცმოძრაობას” აფინანსებდა, მაშინ რუსი ოლიგარქი არ იყო?

- “ნაციონალები” თავს იმართლებენ, ქართული საქმეებისთვის ვიყენებდითო...

- შენი ჭირიმე, ასე არ ხდება! როცა გჭირდება, იყენებ და როცა აღარ გჭირდება, რუსი ოლიგარქია?

რუსეთი მაინცდამაინც ტანკით კი არ უნდა მოგვადგეს. ეკონომიკური ექსპანსია უფრი საშიშია. რატომ მაინცდამაინც ფოთის პორტი? - იმიტომ, რომ იქ ამერიკელებს დიდი ინტერესი აქვთ და რუსეთი ცდილობს, დაასწროს და ამაში ქართული წარმომავლობის ბიზნესმენებს იყენებს, ანუ იაკობაშვილი შეიძლება, შირმა იყო და ფოთის პორტში თავიდანვე რუსული სახელმწიფო კაპიტალი ჩაიდო. სხვათა შორის, წინა ინტერვიუებში იმაზეც ვისაუბრეთ, “ნაციონალების” დროს თუ როგორ აღმოჩნდა არაერთი სტრატეგიული ობიექტი რუსების ხელში, ეს ტენდენცია დღესაც გრძელდება, რაც საშიშია! ვამტკიცებ, რომ “ნაციონალები” რუსული ინტერესების გამტარებლები იყვნენ!

- ბატონო კოტე, თუკი “ნაციონალები” რუსულ ინტერესებს ატარებდნენ, აბა, დღეს რატომ გვეშინია, რომ “ოცნება” ევრაზიულ, ანუ მოდელირებულ საბჭოთა კავშირში შეგვიყვანს?

- რუსული ჩექმის ქვეშ ცხოვრება არც ადრე მინდოდა და არც ახლა მინდა! საქართველოს დამოუკიდებლობა და უსაფრთხოება დასავლეთთან ურთიერთობებზე გადის!

- სხვათა შორის, ჩვენი მეზობელი სომხეთი “ევრაზიული კავშირის” წევრი უკვე ოფიციალურად გახდა...

- ჰოდა, რუსეთი ეკონომიკურ მარწუხებს ახლა ჩვენ მოგვიჭერს...

- რუსეთს ეკონომიკა აღარ აქვს და რაღა მარწუხები უნდა მოგვიჭიროს?

- ჩვენი მთავარი ეკონომიკური პარტნიორი მაინც რუსეთია...

- ვიცი, მაგრამ ევროკავშირთან ასოცირების ხელშეკრულება უკვე რატიფიცირებულია...

- რატიფიცირება ევროპის 500 მილიონიან ბაზარს უცებ ვერ გაგვიხსნის და ეს კრემლშიც კარგად იციან...

- მსოფლიო ანტირუსულ პროპაგანდაში ფულს ოფიციალურად დებს. საზოგადოება “ივერია” კი, მთავარ პროკურატურას საქართველოში რუსული არხების აკრძალვის მოთხოვნით მიმართავს. ეს პრევენციაა?

- დიახ, გარკვეულწილად, პრევენციაა.

- ამას წინათ, ირაკლი ალასანია გამოვიდა ინიციატივით, რომ უშიშროებაში სპეციალური განყოფილება შეიქმნას, რომელიც მედიაში ფულის წარმომავლობას გააკონტროლებს...

- მედიას საზოგადოებაზე უდიდესი ზეგავლენა აქვს - პოლიტიკურ ამინდს ქმნის და მედიაში რუსეთიდან შემოსული ფული სახელმწიფო უსაფრთხოებას, რა თქმა უნდა, საფრთხის ქვეშ აყენებს. მტრულად განწყობილი ქვეყანა თავისი მიზნების განხორციელებას, როგორც წესი, მედიიდან იწყებს ხოლმე. ისე, არსებობის უფლება ყველა მედიასაშუალებას აქვს, მაგრამ თუკი მედია მიზანმიმართულ ძირგამომთხრელ საქმიანობას, მაგალითად, სახელმწიფოს, ან დასავლეთის პოლიტიკის წინააღმდეგ დაიწყებს, ეს უკვე მტრული განზრახვა იქნება. ალასანიაც სწორედ ამას გულისხმობდა და მისი ინიციატივა, რასაკვირველია, ანტიდემოკრატიული არაა!

- ბატონო კონსტანტინე, არ ვიცი, ამ თემაზე ღიად ლაპარაკი გინდათ თუ არა, მაგრამ ვიცი, რომ ბოლო დროს “რუსაპეტებისგან” გარკვეულ შეთავაზებებს იღებთ. ეს გადაბირების მცდელობაა?

- რა თქმა უნდა.

- მაინც, რას გთავაზობენ?

- ძირითადად, სამსახურს, თან ისეთი ხალხი გამოჩნდა, რომელთანაც წლებია, ურთიერთობა არ მქონია და ზუსტად ვიცი, ვისთანაც ასოცირდება. ყველაფერი ეს მიზნად გაკონტროლებას ისახავს, ანუ უნდათ, რომ მარწუხებში მომაქციონ...

- სხვათა შორის, ვიღაცებმა რედაქციასაც შემოუთვალეს, რუსეთის ოკუპაციაზე ამდენი წერა რა საჭიროა... რა ამის პასუხია და, იცით, ვინ არის გიორგი ბრწყინვალე, რომელზეც ბოლო დროს აქცენტი კეთდება?

- ესეც პროპაგანდის ნაწილია და ვიცი, ეს გიორგი ბრწყინვალე ვინც არის!

- პროდასავლელია?

- არა!..

...მოდით, ასე ვთქვათ: “კაბელების საქმემ” დადებითი როლი შეასრულა, ანუ პოლიტიკურ ველში არაკორუმპირებული ძალა გააჩინა და ამით პოლიტიკური სპექტრის პოლარიზაცია მოხდა, თუმცა ეს პროცესი ჯერ არ დამთავრებულა...

- წეღან, პირად საუბარში, სამხედრო პოლიციის ახალი უფროსი, ლევან გაბუნია ახსენეთ. რატომ?

- ესეც “ნაციონალების” ყოფილი კადრია - “მასტერას” მარჯვენა ხელი იყო... ერთი კარგი ის მოხდა, რომ სამხედრო პოლიციის უფროსობიდან ცუხიშვილი გაათავისუფლეს, რომლის შესახებაც თავის დროზე ვიკითხე, თუ რატომ ნიშნავდნენ რუსულ კადრებს მაღალ თანამდებობაზე. სხვათა შორის, ცუხიშვილი გენშტაბის უფროსმა თანაშემწედ წაიყვანა და ეს ნაბიჯი მის პოლიტიკურ ორიენტაციაზე მიანიშნებს... მოკლედ, გაბუნიაზეც ბევრი შეკითხვა არსებობს და ყველა საკადრო დანიშვნაზე პასუხისმგებლობა ხელისუფლებას ეკისრება. დავიჯერო, ისეთ კადრებს ვერ პოულობენ, რომლებსაც განათლება დასავლეთში აქვთ მიღებული? არ მინდა, ის პიროვნებები და პირთა ჯგუფები დავასახელო, რომლებსაც რუსულ სპეცსამსახურებთან გარკვეული შეხება ჰქონდათ და დღევანდელ ხელისუფლებაშიც თავს კარგად გრძნობენ. ამის შესახებ მხოლოდ მე კი არა, სხვებმაც იციან - ამ თემებზე მარტო არ ვმუშაობდი. დღეს ხმამაღლა მე ვლაპარაკობ, თორემ მალე სხვებიც ალაპარაკდებიან. მოკლედ, ხელისუფლებამ საკადრო საკითხებს თუ არ მიხედა, არ მგონია, ის რეიტინგი მაინც შეინარჩუნოს, რომელიც დღეს აქვს!