ბატონო ლევან, ე.წ. მოსმენების კანონპროექტის განხილვა წელიწადნახევრის წინ დაიწყო. დღეს რატომ გახდა ვახტანგ ხმალაძის ინიციატივა და, ზოგადად, ეს კანონი, რესპუბლიკელებისთვის ასე მნიშვნელოვანი? 
- დიახ, მოსმენების შესახებ კანონი აგვისტოში მივიღეთ და მხოლოდ ჩვენ კი არა, დასავლეთმაც მოიწონა, მაგრამ ამის შემდეგ შინაგან საქმეთა სამინისტრომ და მასთან ერთად, ხელისუფლების ნაწილმა ჩათვალა, რომ დემოკრატიის განვითარებაზე ზრუნვის ნაცვლად, უსაფრთხოებისკენ გადახრა სჯობს. 

- უსაფრთხოების გარეშე დემოკრატიის მშენებლობა როგორ წარმოგიდგენიათ? 
- რესპუბლიკელები ბალანსის დაცვას ვემხრობით - დემოკრატიაცა და უსაფრთხოებაც უნდა განვავითაროთ. ვიღაც რომ გვეტყვის, უსაფრთხოება დემოკრატიის ნაწილიაო, მაპატიოს, მაგრამ სახელმძღვანელოები გადაშალოს და ჩაიხედოს. რაღაცები ჩვენც ვიცით, რაღაც წაგვიკითხავს და რაღაცას წარმოვადგენთ კიდეც... ამიტომ ვისაც რა სურს, იმას ვერ ილაპარაკებს. პრობლემა სწორედ ისაა, რომ ადამიანები ასეთ სისულელეებს ამბობენ. 

- ღიად ვისაუბროთ, ეკა ბესელიას გულისხმობთ, არა? 
- დიახ, ამ კონკრეტულ შემთხვევაში ეკა ბესელიამ ადამიანის უფლებები არასწორად წარმოგვიდგინა... 

- შევთანხმდეთ, რომ ნებისმიერი კანონპროექტის მიღებისას უკანონო თუ კანონიერ მოსმენებს ვერავინ აკრძალავს და კონტროლიც გაუჭირდება, ამიტომ პარლამენტში დავა პოლიტიკურ სპეკულაციას უფრო და უფრო ემსგავსება. 
- ვახტანგ ხმალაძის ინიციატივის მოწონების შემთხვევაში, თუ საზოგადოებაც ამას მოინდომებს, კონტროლის მეტი შესაძლებლობა გაჩნდება. თუ ასე ვიმსჯელებთ, მაშინ რატომ ვიღებთ საერთოდ კანონებს, როცა წინასწარ ვიცით, ადამიანებს მაინც დახოცავენ ან გააუპატიურებენ? ჩვენი მიზანია, მსგავსი ფაქტები შემცირდეს! 

- კომუნიკაციების მარეგულირებელი კომისიისთვის მეორე ,,გასაღების' გადაცემა ამის გარანტი იქნებოდა? 
- მთავარია, შსს-ს ეცოდინება, რომ მისი მაკონტროლებელი ორგანო გარეთაა და არა პრემიერის დაქვემდებარებულ რომელიმე უწყებაში. 

- თუ თავიდანვე იყო ცნობილი, რომ პერსონალური დაცვის ინსპექტორი პრემიერის დაქვემდებარებაში იქნებოდა, მხარი რატომ დაუჭირეთ? 
- ქალბატონი ქალდანისადმი ნდობა არ ნიშნავს, რომ მას განათლების ან კულტურის საკითხების შესრულებაც უნდა დაეკისროს. გასაღები, ანუ მოსმენებზე თანამონაწილეობა, პერსონალური დაცვის მაკონტროლებელს როგორ შეიძლება ჰქონდეს, საკუთარ თავს გააკონტროლებს? რაც მთავარია, თამარ ქალდანი თავადაა წინააღმდეგი, ,,გასაღები' გადაეცეს, თორემ რესპუბლიკელებს მასთან პრობლემა არ გვაქვს, ვიცით, დაკისრებულ მოვალეობას თავს კარგად ართმევს და არ გვინდა, ეს სტრუქტურაც გავაფუჭოთ. საბედნიეროდ, ლევან იზორიას მიერ დაწერილ მოსმენების კანონზე მან ყველაფერი თავადაც მშვენივრად გაიგო. 
- როგორ ამტკიცებთ, რომ ბესელია- ფოფხაძე- სესიაშვილს კანონპროექტი იზორიამ დაუწერა? 
- ფილოლოგი ვარ და კარგად ვცნობ ადამიანების წერის მანერას. ლევან იზორიასთან პრობლემა არ მაქვს, იგი არავისზე ნაკლები იურისტია, წერაც, არა მგონია, შეურაცხმყოფელი იყოს. შეურაცხმყოფელი ის უფროა, კანონპროექტს სხვა რომ დაწერს და შენი სახელით გაგაქვს. 

- პოლიტიკურად როგორ ხსნით, რომ ,,გასაღებზე' არასამთავრობო ორგანიზაციების უარის შემდეგ, ნაციონალები და თავისუფალი დემოკრატები მხარს რესპუბლიკელების ინიციატივას უჭერენ? 
- ხმალაძის პროექტი ვერ გაფუჭდება იმის გამო, რომ მხარს ნაციონალები უჭერენ. რესპუბლიკელების ინიციატივას ,,ქართული ოცნების' წევრებიც, მათ შორის, თამარ კორძაია და ანი მიროტაძეც უჭერენ?! ასე რომ, ეს არგუმენტი არ გამოდგება. მიუხედავად ამისა, პროცესებს ფხიზლად ვუყურებთ და ილუზიებში არ ვართ. მაღალი ალბათობით, პარლამენტში ბესელიას პროექტი გავა. ამის შემდეგ ბურთი პრეზიდენტის ხელში გადადის და საბოლოო სიტყვასაც სხვა ინსტიტუცია ამბობს. 

- ფიქრობთ, პრეზიდენტი კანონპროექტს ვეტოს დაადებს? 
- მარგველაშვილთან კონსულტაციები არ გვქონია, მაგრამ, როგორც მეგობრები გვეუბნებიან, პრეზიდენტი კანონპროექტს ვეტოს არ დაადებს. 

- თქვენ ადგილს უმრავლესობაში ხედავთ თუ ახლა ფონს იქმნით კოალიციის დასატოვებლად? 
- რესპუბლიკელებს თანამშრომლობის კულტურაცა და მოთმინებაც საკმარისად გვაქვს, ასე რომ, პრობლემა ჩვენთან არ არის. თანაც პარლამენტში კამათი და აზრთა გაცვლა, ნორმალურია. კრიზისის ნიშნებს ვერ ვხედავ, კოალიციის დაშლაზე კი, ის ხალხი საუბრობს, რომლის ინტერესებშიც ეს შედის. მინდა, ყველა დავამშვიდო, რომ კოალიცია დაიშლება მხოლოდ მაშინ, როცა მასში გაერთიანებული პოლიტიკური ძალები ჩათვლიან საჭიროდ. ვიღაც სადღობელაშვილი, რომელიც სისულელეებს წერს, კოალიციის წევრი არ არის. ხელოვნური წარმონაქმნია, რომელიც, სავარაუდოდ, სხვების დავალებას ასრულებს. პარლამენტში განსახილველად მხოლოდ ერთი კანონპროექტი რომ დარჩენილიყო და ხმალაძის ინიციატივის განხილვაზე უარი ეთქვათ, კრიზისი მაშინ იქნებოდა. 

- ეს ,,ქართული ოცნების' ლიდერების მისამართით მუქარაა? 
- არა. კოალიციის ბედი რომელიმე კანონის მიღება- არმიღებაზე დამოკიდებული არ არის. მერწმუნეთ, თუ რესპუბლიკელები კოალიციის დატოვებას დავაპირებთ, ამას კონსპირაციულად, სადღობელაშვილს არ შევატყობინებთ. ლაპარაკი ვიცით და თავად ვეტყვით საზოგადოებას. არ ვართ ის ძალა, რომელსაც კოალიცია არ მოსწონს, ამიტომ გაერთიანებაში ვრჩებით. 

- არადა, სოციალურ ქსელში ვრცელდება ნიუ იორკში შეხვედრის ფოტოები და ინფორმაციაც, რომ ხათუნა გოგორიშვილის ორგანიზებით დაგეგმილ შეხვედრაზე რესპუბლიკელებისა და თავისუფალი დემოკრატების წევრმა ქალბატონებმა საპარლამენტო გადატრიალების გეგმა შეიმუშავეს. 
- სერიოზული ამბავია... ფოტოების ისტორიას მოგიყვებით: ქალბატონები ვაშინგტონსა და ნიუ იორკში IRI-ს მიერ ორგანიზებულ შეხვედრაზე იმყოფებოდნენ. ვინც ინფორმაცია გაავრცელა, უნდა იცოდეს, რომ ფოტოები სოციალურ ქსელში ქალბატონებმა თავად გაავრცელეს. საიდუმლო შეხვედრა რომ ყოფილიყო, თამარ კორძაია ამ ფოტოს არ დადებდა. თუ ვინმეს ჰგონია, რომ ქალი მხოლოდ ,,ქართული ოცნების' წევრი უნდა იყოს და ხათუნა გოგორიშვილი არ შეიძლება ქალი იყოს, მწარედ ცდება. თუ ასე ვიმსჯელებთ, ყველანი ერთ დარბაზში ვსხედვართ, ერთ ღონისძიებებში ვმონაწილეობთ. ამ ქალბატონებმა ერთად მიირთვეს სადილი, ასეთი იყო IRI-ს ჩანაფიქრი, მერე რა მოხდა?! მეც ვყოფილვარ დელეგაციაში, მაგალითად შვედეთის მეგობრობის ჯგუფში, სადაც ჩემთან ერთად ნაციონალებიც იყვნენ. სხვათა შორის, ამ დელეგაციას მანანა კობახიძე ხელმძღვანელობდა და მიხეილ მაჭავარიანთან ერთად ივახშმა კიდეც. ამიტომ ვთქვათ, რომ კობახიძე მაჭავარიანთან შეკრულია? 

- თქვენი პარტიის წევრ მინისტრს, პაატა ზაქარეიშვილს, განცხადებების გამო, რუსეთის აგენტობა დაბრალდა. თქვენც ფიქრობთ, რომ აფხაზეთისა და რუსეთის შეთანხმების პროექტის ხელმოწერა ხელისუფლების წარმატებული პოლიტიკის შედეგია? 
- აფხაზეთის საკითხმა 2008 წელს არასასურველი მიმართულება მიიღო. მანამდეც ომი წავაგეთ... არასერიოზულია, აფხაზეთის დაკარგვის პერსპექტივა კოალიციას დააბრალო. ხელისუფლებასთან პოლიტიკური კრიტიკის მომხრე ვარ, მაგრამ გიორგი ბარამიძის დემაგოგიას ვერ გავიზიარებ, რომელიც საქართველოს დსთ-დან გამოყვანის კატეგორიული წინააღმდეგი იყო. ნაციონალებს მხოლოდ ვიწრო პოლიტიკანური ამოცანები აქვთ. სამწუხაროდ, დღეს აფხაზეთის ბედი პარლამენტში ან თუნდაც საქართველოში არ წყდება. ეს პრობლემა საერთაშორისო თანამეგობრობის დონეზეა გადასაჭრელი. რაც შეეხება ზაქარეიშვილის განცხადებას, როგორც გავიგე, აღნიშნა, რომ პროცესი საქართველოს ასოცირების ხელშეკრულების ხელმოწერის შემდეგ დაჩქარდა. თუ ვინმე ფიქრობს, აფხაზეთის პროექტზე ხელმოწერით კმაყოფილები ვართ, მასთან საუბარიც მეზარება. პაატა ზაქარეიშვილს დიდი ხანია ვიცნობ და მისით მთელი ცხოვრება აღფრთოვანებული ვარ - ჩემი აზრით, არასწორი ნაბიჯი არასოდეს გადაუდგამს.