ბატონო ზვიად, საზოგადოების დიდი ნაწილისთვის რვიანის პოზიცია გაურკვეველი დარჩა. ითქვა, რომ არ გადიხართ მოლაპარაკებებიდან, მაგრამ მოლაპარაკებებს წყვეტთ. იქნებ განუმარტოთ საზოგადოებას, რა ხდება?

რვა პარტიამ უკვე რამდენიმე თვეა, ხუთ თვეზე მეტია, რაც წარუდგინა საზოგადოებას თავისი ხედვები საარჩევნო გარემოს და საარჩევნო კოდექსის გაუმჯობესებასთან დაკავშირებით. ყველა თემა, რომელსაც ჩვენ შევეხეთ, მინდა მთელი პასუხისმგებლობით განვაცხადო, იყო დამუშავებული უაღრესად კვალიფიციურად, ეს იყო  საერთაშორისო არბიტრების წინაშე, ანუ დიპლომატიური კორპუსის, არასამთავრობო საერთაშორისო ორგანიზაციების წინაშე მიმდინარე პროცესი და ჩვენ ყველაფერი წარვუდგინეთ ხელისუფლებას. ხელისუფლების მხრიდან  ხშირ შემთხვევაში მივიღეთ აგდებული დამოკიდებულება, მივიღეთ პასუხი, რომელიც ძალიან გავდა იმას, რომ ხელისუფლება არ არის მზად არავითარი ასეთი ტიპის ნაბიჯის გადასადგმელად, მაშინ, როდესაც, თქვენ გახსოვთ, მოლაპარაკების დასაწყისში დავით ბაქრაძე აცხადებდა, რომ ისინი თვისობრივი ცვლილებების გარეშე, რა თქმა უნდა, არ წარმოიდგენდნენ, რომ რა პროცესიც მიდიოდა, ისე დამთავრდებოდა.

ამიტომაც ჩვენ გადავწყვიტეთ, ჩვენი ხედვა აბსოლუტურად მიწოდებული გვაქვს, ყველა საკითხი, მათ შორის სამართლებული საკითხი ჩვენი მხრიდან პასუხგაცემულია და ხელისუფლებამ ახლა უნდა გადადგას თვისობრივი ნაბიჯები. სხვაგვარად ჩვენ იმის მომიზეზებით, რომ მათ მინისტრები ჰყავთ დაბარებული, შემდეგ ექნებათ სხვა მიზეზი, რომ კუბლაშვილი წავიდა იაპონიაში, შემდეგ იქნება მიზეზი, რომ მინაშვილი სააკაშვილთან უმრავლესობის შეხვედრაზეა და ... ეს მიზეზები არ არის დამაკმაყოფილებელი, ის პასუხები, რის გამოც ისინი საარჩევნო გარემოს ცვლილებაზე უარს ამბობენ, ჩვენთვის არის სრულიად მიუღებელი და ჩვენ ველოდებით, რომ მათი მხრიდან გადმოდგმული იქნას ქმედითი და სერიოზული ნაბიჯები. ეს არის რვა პარტიის ურყევი პოზიცია და მიგვაჩნია, რომ რვა პარტიის საქმიანობა არ გადაიქცევა პოლიტიკურ პროცესად ამ სიტყვის მთლიანი გაგებით, მანამ ხელისუფლება ნაბიჯს არ გადმოდგამს.

ამაში რას გულისხმობთ?

- იმას ვგულისხმობ, რომ მხოლოდ მოლაპარაკების მაგიდასთან არ უნდა იმართებოდეს საუბარი საარჩევნო გარემოს გაუმჯობესებასთან დაკავშირებით. ამაში უნდა ჩაერთოს საზოგადოება, უნდა ჩაერთოს ხალხი, ვინაიდან მიგვაჩნია, რომ ეს არ არის მხოლოდ ჩვენი და რვა პარტიის საზრუნავი, რომ საარჩევნო გარემო იქნას შეცვლილი. ეს არის მთელი საზოგადოების ამოცანა და აქედან გამომდინარე ვფიქრობ, რომ უკვე პოლიტიკური კამპანია უნდა დავიწყოთ იმისათვის, რათა მივაღწიოთ საარჩევნო გარემოს გაუმჯობესებას.

ბატონო ზვიად, საზოგადოების ჩართვაში აქციებიც ხომ არ იგულისხმება?

- საზოგადოების ჩართვაში იგულისხმება ყველაფერი, ხელმოწერებიდან დაწყებული და აქციებით დამთავრებული. ვინაიდან ამ რვა პარტიაში ზოგი უფრო რადიკალია, ზოგიც უფრო ზომიერია, ამიტომ ჩვენ როცა მივიღებთ შეჯერებულ გადაწყვეტილებას, ამის შესახებ, რა თქმა უნდა, ჩვენ ვაცნობებთ უკვე საზოგადოებას. იმიტომ, რომ საზოგადოების უკან არ ვაპირებთ არაფრის გაკეთებას. ეს პროცესი არის თავიდან ბოლომდე გამართული პროცესი და ამ პროცესს შეუძლია ძალიან დიდი და სერიოზული გამოხმაურება ჰპოვოს საქართველოს მოსახლეობაში.

ხელისუფლებას დროის გაყვანის ტაქტიკა აქვს არჩეულიო და როდემდე გაგრძელდება ასე? ამის შესახებ თავიდანვე საუბრობდნენ, რომ ხელისუფლება უბრალოდ დროს გაწელავდა...

- დიახ, ჩვენთვის რაიმე მოულოდნელი არ ყოფილა, ამას მინდა ხაზი გავუსვა, ჩვენ ვიცოდით, რომ ხელისუფლება სადღაც გაჭედავდა, რომ მას უკვე აღარ ექნებოდა არგუმენტირებული პასუხი და დაიწყებდა ეშმაკობებს. დაახლოებით იმას ჰგავს ეს, რომ ჭადრაკს ეთამაშებოდე მოწინააღმდეგეს და ჯერ საათი მოგპაროს, შემდეგ ფიგურების მოპარვა დაიწყოს, დაახლოებით ასეთი არის მისი ქმედებები. შეუიარაღებელი თვალითაც ჩანს, რომ ხელისუფლება არის წვრილმანი ხულიგნობით დაკავებული, მაშინ, როდესაც მან კონკრეტული, სერიოზული პასუხი უნდა გასცეს იმ კითხვებს, რომელსაც რვა პარტია უკვე ხუთ თვეზე მეტი ხნის განვავლობაში სვამს. აი, ესაა საქმე, ამიტომაც ჩვენ ვამბობთ, რომ კარგით, თქვენ გინდათ ასე, მაშინ ჩვენ დავიწყებთ უკვე ჩვენი ქმედებების განხორციელებას. რვა პარტიას, რომელიც მოლაპარაკების მაგიდასთან ზის, საარჩევნო ელექტორალური შედეგებით თუ გადავხედავთ, ძალიან შთამბეჭდავი ციფრი აქვს ჯამური. ასე რომ, ისე არ არის, რომ ამ რვა პარტიას მხარდამჭერი არა ჰყავს საქართველოში. სერიოზული მხარდამჭერები გვყავს, ამიტომაც ამ მხარდამჭერებთან წავალთ და მათთან ერთად მივიღებთ გადაწყვეტილებას, როგორ უნდა მოვიქცეთ.

თუ გაქვთ გარკვეული ვადა ხელისუფლებისთვის მიცემული, რადგან რადიკალური ოპოზიციის ნაწილისგან მოვისმინე შეფასებები - შესაძლოა არჩევნებამდე სწორედ ორი-სამი თვით ადრე უთხრან, მოდით, გავაგრძელოთ დიალოგი და უნდა დაუჯდეს ოპოზიციაო? ამ შემთხვევაში რას აპირებთ?

- ეს იცით როგორი ამბავია, ძალიან ჰიპოთეტურია, ორი თვით ადრე იტყვიან, ექვსი თვით ადრე თუ ცხრა თვით ადრე იტყვიან, მე ვერ გეტყვით, მე ერთი ვიცი, როდესაც ჩვენ უკვე ჩავთვალეთ, პარტიებმა, რომლებიც სამართლებრივ დუელში ვიყავით ხელისუფლებასთან შესული, რომ მეტის წაყრუება აღარ იქნებოდა მართალი და ვთქვით, რომ ჩვენ მეტს აღარ მოვალთ, თუ თქვენ არ მოიტანთ რაღაც კონკრეტულ დამაკმაყოფილებელ პასუხს იმ კითხვებთან დაკავშირებით, რაც ჩვენ დავსვით. ჩვენ გავდივართ ხალხში და ვიწყებთ კამპანიას. ეს არის ზოგადად რისი თქმაც შემიძლია. კამპანია როგორი ფორმის იქნება, რა ინტესივობის, როგორი დატვირთვები ექნება და რა მიმართულება, ამას უკვე მსვლელობისას ნახავთ.

თქვენ თვლით, რომ მოლაპარაკებები ჩიხშია შესული?

- ხელისუფლებას პასუხი არა აქვს, ხელისუფლებამ გაჭედა, მან ვერ უზრუნველყო კვალიფიციური და სერიოზული პასუხები ვერც ერთ იმ კითხვაზე, რომელიც ჩვენ დავსვით და ჩვენ კი ძალიან მარტივი კითხვები დავსვით. ჩვენ დავსვით კითხვა, რომ თუ ამომრჩეველმა უნდა მისცეს ერთი ხმა და ამის საწინააღმდეგო რა გაქვთ, ხელისუფლებამ წარმოადგინა, რომ თურმე ამის საწინააღმდეგო ჰქონიათ, რომ 200 მილიონი დაჯდება, თუ ბიომეტრიული მონაცემებით იქნება სია შედგენილი. პირველსავე კვირაში დავუდასტურეთ, რომ ეს იყო ყალბი მონაცემები და მისი მესამედიც კი ძალიან გაბერილი ციფრია, ამდენი ნამდვილად არ იყო საჭირო და ეს საერთაშორისო არბიტრებს დავანახეთ. მეორე კითხვა იყო, რომ ყაზბეგის რაიონში, სადაც სამი ათასი ამომრჩეველია და ქუთაისში სადაც ასი ათასი ამომრჩეველია, არ შეიძლება იყოს თითო მაჟორიტარი წარმოდგენილი და ჩვენ შევთავაზეთ ამ პრობლემის გადაწყვეტის გზა, რომ სამართლიანი ყოფილიყო წარმომადგენლობა ყველა პარლამენტარისა პარლამენტში. ამიტომაც ამასთან დაკავშირებითაც მათ პასუხი ვერ გაგვცეს.

იყო კიდევ ოთხი საკითხი, რაც შეეხება მედიას, რაც შეეხება ადმინისტრაციულ რესურს, ასევე გვქონდა სერიოზული საკითხები დასმული და პასუხის გაცემა ვერ მოახერხა ამაზე ხელისუფლებამ. ეს არ არის ჩვენი პრობლემა ვამბობთ, ჩვენთვის არ იყო მოულოდნელი, რომ ასე მოხდებოდა. როცა გვეკითხებოდნენ თავიდანვე, რომ თქვენ გჯერათ, რომ ხელისუფლება კეთილი ნების ნაბიჯს გადმოდგამსო, ჩვენ ვამბობდით: მივიყვანოთ საქმე იმ კონდენციამდე, სადაც ხელისუფლება გვეტყვის, რომ ის არაფრისთვის მზად არ არის და ამის შემდეგ უკვე ჩვენი ჯერი იქნება გადავდგათ ნაბიჯები. დიახ, ახლა ჩვენი ჯერია გადავდგათ ნაბიჯი და ჩვენ ამ ნაბიჯს გადავდგამთ უკვე პოლიტიკური კამპანიის დაწყების კუთხით.

თუ არის იმის შანსი, რომ პროცესებმა ქუჩაში გადაინაცვლოს და იგივე რვიანმა ქუჩიდან დაიწყოს საზოგადოებასთან ერთად აღნიშნული მოთხოვნების დაკმაყოფილება?

- კიდევ ერთხელ ვიტყვი, ხელის მოწერებიდან დაწყებული და ქუჩის აქციებით დამთავრებული, დიაპაზონი მოქმედებისა არის ძალიან ფართე, ყველა ქმედება არის კონსტიტუციის ფარგლებში, მაგრამ რვა პარტია, როდესაც შეთანხმდება უკვე კონკრეტული მოქმედების გეგმაზე, ამ გეგმის მიხედვით დაიწყებს მოქმედებას და რა თქმა უნდა, თქვენ ამის შესახებ აუცილებლად იქნებით საქმის კურსში და თქვენი გაზეთის მკითხველებიც.

ასევე მნიშვნელოვანი იყო რვიანისთვის დასავლეთის პოზიცია, რომ მას დაენახა ხელისუფლების ნამდვილი სახე, რამდენად შეძელით ამ სახის დანახება და ამ შემთხვევაში როგორი იქნება მათი პოზიცია?

 - შემიძლია გითხრათ, რომ ჩვენ შევძელით ამის მიღწევა 100%-ით. დასავლეთი და დიპლომატიური კორპუსი იმის დიპლომატიური კორპუსია, რომ ისინი ღიად და რაღაცა დარტყმის ფორმით ხელისუფლების მიმართ განცხადებებს არ გააკეთებენ და არც რაიმე ქმედებას ჩაიდენენ; მაგრამ მათ ნახეს, რომ ჩვენ ყველა ღონე ვცადეთ, მუდმივად ვიყავით ჩართული სამართლებრივი კუთხით ამ პროცესში და სხვა რაღაც

გამწვავავება, რაღაც დესტრუქცია ჩვენი მხრიდან არ ყოფილა არცერთხელ ამ პერიოდში, ეს ნახეს მათ და ისიც ნახეს, რომ ხელისუფლება მუდმივად ეშმაკობდა, როდესაც ჩვენს პრეზენტაციებზე არ ამბობდნენ თავიანთ ვარიანტს, არც თავისი პრეზენტაციები არ წარმოუდგენიათ და ბოლოს რაც მოიტანეს პასუხი, ის მოიტანეს, რომ თურმე პატიმრებსაც უნდა მიაცემინონ ხმა. დღეს ოცი ათასზე მეტი პატიმარია საქართველოში და არჩევნების წინ ამ ლოგიკის მიხედვით მოსახლეობას უნდა სჯეროდეს, რომ 40 ათასზე მეტი იქნება, კიდევ უფრო მეტ ადამიანს დააპატიმრებენ, რათა გარანტირებული ხმები მიიღონ. ეს იყო მათი პასუხი, ერთ-ერთი ასეთი პასუხი, რომელიც მათგან მივიღეთ და ეს პასუხი ჩვენი უცხოელი კოლეგებისთვისაც იყო სრულიად მოულოდნელი, ისინი არ ელოდნენ, რომ ხელისუფლება ასე თავხედურად და ურცხვად იტყოდა ყველა იმ თემის სერიოზულ განხილვაზე უარს, რომელიც ჩვენ მათ შევთავაზეთ.

მოვისმინე ასეთი შეფასებები, რომ განაწყენებული რვიანი გაზაფხულზე დაწყებულ საპროტესტო აქციებს აუცილებლად შეუერთდებაო...

- ერთს მინდა ხაზი გავუსვა და თქვენი გაზეთის მკითხველმა იცოდეს, არავითარი განაწყენებულები ჩვენ არა ვართ. ის რაც მოხდა ჩვენთვის მოულოდნელი არ ყოფილა. ჩვენ ვიცოდით, რომ ერთ მშვენიერ დღეს ხელისუფლება იტყოდა, რომ ჩვენ პასუხი არა გვაქვს არაფერზე და იმასაც არ გამოვრიცხავ, რომ ენდიაის ფორმატში მოლაპარაკებების დროს წამოხტნენ და გაიქცნენ მაგიდიდან.თუმცა კიდევ ერთხელ ვამბობ, ეს სფერო, სამართლებრივი სფერო, საარჩევნო გარემო, საკანონმდებლო დახვეწის მიმართულება, ხელისუფლებისთვის იყო მისი მოედანი და აქ ოპოზიცია არ თამაშობდა, ან თუ თამაშობდა, ძალიან სუსტად. ახლა ჩვენ დღეს ეს მოედანი ხელისუფლებას წავართვით და ვაცხადებთ, რომ აქაც, დიახ, ჩვენ დავდებთ ძალიან კვალიფიციურ და სერიოზულ შეხედულებებს, თუ როგორ უნდა ვითარდებოდეს საკანონმდებლო და საარჩევნო თვალსაზრისით პროცესები ქვეყანაში. ჩვენ ეს მოედანი დავისაკუთრეთ უკვე და თუკი ახლა მოწინააღმდეგე მოედნიდან გაიქცევა და შემდეგ არტილერიას დაგვიშენს გადატანითი მნიშვნელობით, სადღაც შორიდან და ამით უნდა შეინარჩუნოს არსებული მდგომარეობა, ესეც მინდა გითხრათ, რომ პოლიტიკური კრახია მიმდინარე პროცესებში ხელისუფლებისათვის. ამიტომ ჩვენ ამ პოლიტიკურ დამარცხებებს ხელისუფლებას რათქმაუნდა არ მოვაკლებთ მტელი ამ პერიოდის განმავლობაში.

თქვენ ღიად აცხადებთ, რომ მარცხი განიცადა ხელისუფლებამ და არა რვიანმა...

- რვიანმა რა მარცხი განიცადა, ყველა საკითხთან დაკავშირებით დავდეთ კვალიფიციური პროექტები, ყველა საკითხთან დაკავშირებით მოთმინებით ვითხოვდით ხელისუფლებისგან რამდენიმე თვის განმავლობაში პასუხს. ამ რამდენიმე თვის განმავლობაში არა თუ პასუხი, არამედ კონკრეტული საკითხის გადაწყვეტა რამდენიმეჯერ შეიძლებოდა. ჩვენ ვერავინ ვერ დაგვწამებს, რომ ულტიმატუმით ან თამაშის წესების შეცვლით, ან ჭადრაკის მაგიდის აყირავებით რაღაცა პროცესს ხელი შევუშალეთ, არა ჩვენ ყველაფერი გავაკეთეთ ისე, როგორც ამ პროცესის ფორმატში იყო გათვალისწინებული და ხელისუფლება ვერ ჩაჯდა ამ ფორმატში. ამიტომ რათქმაუნდა ხელისუფლება დამარცხდა. თუმც ეს რათქმაუნდა არ ნიშნავს იმას, რომ რადგან დამარცხდა სირცხვილის გამო გაიქცევიან სააკაშვილი და ბაქრაძე, გამოვლენ და იტყვიან გადავდექითო, რადგან საარჩევნო გარემოს გაუმჯობესებასთან დაკავშირებით ვერ ვაჩვენეთ კვალიფიციური შედეგებიო, ამის მოლოდინი არც ჩვენ გვქონდა არც თქვენ და არც საზოგადოებას. ჩვენ გვქონდა იმის მოლოდინი რისიც გვქონდა, რომ მთელი საერთაშორისო საზოგადოების წინაშე ხელისუფლება ჩაიჭრებოდა სერიოზულად და სწორედაც ასე მოხდა.