გიორგი ნატროშვილი პროტოისტორიის მკვლევარია, ამ თემებით უნივერსიტეტში სწავლისას დაინტერესდა და... დღეს თამამად აცხადებს, რომ თანამედროვე ცივილიზაცია, თავისი ფორმითა და შინაარსით, მეტწილად ქართულ, უფრო კონკრეტულად, იბერო-ევროპულ მეგაცივილიზაციაზე დგას. მეტიც, ნატროშვილი გამოდის ინიციატივით, რომ შემოვიღოთ ტერმინი “იბერიული”, რომელიც იბერო-ევროპული რასის სამივე წარმომადგენლის, ანუ ქართველების, ბასკებისა და ლაზების აღმნიშვნელი იქნება. ამასთან, პროტოისტორიის მკვლევარი ამბობს, რომ საქართველოს დასახელება უნდა შეეცვალოს და მას “იბერია” ეწოდოს.

ძნელი სათქმელია, ამ ინიციატივას ისტორიკოსები გაიზიარებენ თუ არა, თუმცა არაა გამორიცხული, რომ გიორგი ნატროშვილის წიგნმა - “იბერო-ევროპული მეგაცივილიზაცია”, რომელიც ახლახან გამოიცა, ისტორიაში ერთგვარი რევოლუცია მოახდინოს... სხვათა შორის, “ქართულ სიტყვასთან” საუბრისას გიორგი ნატროშვილი დავითისა და თამარის ეპოქას იმ პიროვნებებისა და მოვლენების წინაშე, რომელთა წრიდანაც იბერიული მოდგმა გამოვიდა, “ლილიპუტებიის ეპოქას” უწოდებს და, გარკვეული ფაქტების დაზუსტებისას, არც იმის თქმას ერიდება, რომ ქრისტე გენეტიკურად ორი კი არა, სამი ათასი წლისაა. მაშ ასე, “ქართული სიტყვა” ე.წ. ქართული ლეგენდის ახალ სენტენციებს წარმოგიდგენთ...

- ეს მაგალითი ქართული ღთაების კვლების ტემისათვის გამოვიყენეთ. მაგალითად, ქრისტესაც აქვს ნათქვამი, მე მოვედი არა რამის დასარღვევად, არამედ, განსამტკიცებლადო, ანუ აქცენტს მოსეს მოძღვრებაზე აკეთებს და აცხადებს, მე და ჩემი მოძღვრება გენეტიკურად მოსედან მოვდივართო...

კი ბატონო, მაგრამ ქრისტე ხომ 2 ათასი წლის წინ იშვა...
- დიახ, ფიზიკურად, მაგრამ გენეტიკურად ქრისტე სამიათასწლიანი და შეიძლება, უფრო ძველი ფენომენია. მაგალითად, ებრაელები ეგვიპტიდან სწორედ იმ დროს გამოვიდნენ, როცა იქ მე-18 დინასტია ერთღმერთიანობას ქადაგებდა... ფარაონი ამონიქოტეფ მეოთხე იყო პირველი, ვინც დედამიწაზე ერთღმერთიანობა იქადაგა.

საინტერესო ჰიპოთეზაა...
- ჰიპოთეზა რატომ არის? სხვა თუ არაფერი, ახალი აღთქმაც ხომ ძველი აღთქმიდან გამომდინარეობს?.. ასე რომ, როცა ლაპარაკია ბადაგონზე, აქ ღვინის კულტი იგულისხმება, რომლის ყველაზე განვითარებული ფენომენი, ბადაგონის ღმერთის სახით, პირველ ათასწლეულში გამოჩნდა. ასევე, გამოჩნდა ბერძნებში ორგია ღვინის კულტის სახით, მაგრამ ამ ყველაფერს თავისი გენეტიკური განვითარება ხომ ჰქონდა? მოკლედ, დამეთანხმეთ, რომ ქართველებს ღვინის კულტი პირველ ათასწლეულამდეც გვქონდა. 6 000 ათასი წლის წინ ბადაგონი, როგორც ასეთი, შეიძლება, არ არსებობდა, მაგრამ ღვინის სხვა კულტი არსებობდა, რომელმაც ბადაგონში ნახა საბოლოო იზოთერული გამოხატვა.

ესე იგი, თქვენი ლოგიკით, ორი ათასი წლის წინ არსებული ღმერთების, ასე ვთქვათ, შერწყმა ქრისტეში მოხდა?
- ქრისტე იმ ერთღმერთიანობის გაგრძელებაა, რომელიც ებრაელებმა ეგვიპტიდან გამოიტანეს. საერთოდ, ერთღმერთიანობა ეგვიპტეში ჩაისახა და ეს ემთხვევა იმ დროს, როცა მოსემ ებრაელების ეგვიპტიდან გამოყვანა დაიწყო, ანუ მოსემ კოპტების (ეგვიპტელების) ერთღმერთიანობის კულტი მიიღო და ამ კულტით გამოიყვანა ებრაელები ეგვიპტიდან. ამიტომ, შეიძლება ვივარაუდოთ, რომ ერთღმერთიანობის იდეა ქამიტებს, ანუ კოპტებს ეკუთვნით და არა - ინდო-ევროპელ ებრაელებს, თუმცა ეს იდეა შემდეგ ინდო-ევროპელებმა განავითარეს... საერთოდ, ამ თემის ასათვისებლად ცალკე გამოკვლევებია საჭირო... ასეა ბადაგონისა და ორგიას შემთხვევაშიც (სხვამ შექნა და ინდოევროპელებმა მიიტაცეს).

მოკლედ, ამტკიცებთ, რომ დედამიწაზე ცივილიზაციას საფუძველი ქართველებმა ჩავუყარეთ, არა?
- არა. ცივილიზაცია ხმელთაშუა ზღვაში მცხოვრები რასებიდან იწყება ქამიტების და იბერო-არიანების რასის სახით, რომლებიც განვითარებულ იდეებსა და ტექნოლოგიებს სხვებს გადასცემდნენ. თეთრი რასის არეული ნაწილიდან იბერო-არიანული რასის გამოყოფა ძვ.წ.ა. 9000 წლიდან, ანუ 11 ათასი წლის წინ დაიწყო. აღსანიშნავია, რომ სწორედ ამ ეპოქას ემთხვევა ”ატლანტების” სახისმეტყველური, იზოთერული სამყაროს დათარიღება.

ამ პროცესში ქართველთა წინაპრებიც მონაწილეობდნენ?
- მაშინ რუსები, სომხები, ინგლისელები არ იყვნენ როგორც ერები, სამაგიეროდ, არსებობდნენ პროტოიბერები, ანუ იმ რასიდან ამჟამად ხმელთაშუა ზღვაში მხოლოდ ქართველები და ბასკები დარჩნენ. ხმელთაშუა ზღვის იბერიული ცივილიზაცია ჩრდილოეთიდან შემოსულმა ინდო-ევროპულმა რასამ, პრაქტიკულად, გაანადგურა... იბერო-არიანური რასიდან წამოსული ერების სხვა ერებთან შერწყმა და აღრევა მოხდა. ქართველებმა კი, ბასკების მსგავსად, ერთ ტერიტორიაზე ლოკალიზება მოახდინეს.

ეს ტერიტორია დღევანდელი საქართველოა?
- არა მარტო. ეს ტერიტორია იყო სამხრეთ ევროპის ტერიტორიები, დღევანდელი პირინეი, ანუ იბერიის ნახევარკუნძული, სადაც შეიქმნა ბასკებისა და კავკასიაში (მცირე კავკასიაში) ქართველ-ლაზების ფენომენი.

ეს ჰიპოთეზები გასაგებია, მაგრამ არსებობს ფაქტები, რითიც მსოფლიოს დავუმტკიცებთ, რომ თანამედროვეობა ქართულ ფესვებზეც დგას?
- ეს არ არის ჰიპოთეზები, ეს კვლევებია და ყველაფერი ფაქტებით დასტურდება. ამის ყველაზე კარგი მაგალითი ენობრივი ასპექტებია და ჩემს წიგნში მოყვანილი მაქვს რისმაგ გორდეზიანის, ზვიად გამსახურდიას, ნიკო მარის, პავლე ინგოროყვას გამკვლევები ენობრივ საკითხებთან დაკავშირებით, რომელიც აისახა ქართულიდან ბერძნულში... ეს ძალიან ძველი ისტორიაა, რომელზეც მხოლოდ ჩვენი კი არა, კაცობრიობის განვითარება დგას, ამ ცივილიზაციებიდან დაიწყო ნამდვილი, ბუნებრივი გლობალური პროცესები და თუ იმ მეთოდით არ განვვითარდით, როგორც ის ხალხი ვითარდებოდა, ბევრ რამეს დავკარგავთ.

არ მგონია, მსოფლიომ აღიაროს, რომ ცივილიზაციას საფუძველი ქართველების წინაპრებმა ჩავუყარეს...
- იცით, რა?! ეს აღიარებულია და ყველამ იცის. ამ თემას არაერთი ტელაგადაცემა, წიგნი, სამეცნიერო თუ დოკუმენტური ფლმი და სტატია მიეძღვნა და დღეს ეს საკითხი ძალიან აქტუალურია. უბრალოდ, იბერო-ევროპულ რასას სახელი არ ჰქვია, ანუ ლაპარაკობენ უცნობ ხალხზე და სახელს იმიტომ ვერ არქმევენ, რომ საუკუნეების განმავლობაში რუსების ხელში ვიყავით და მსოფლიო საერთოდ არ გვიცნობდა.

მაგალითად, როცა საზღვარგარეთ ქართულ კულტურას წარვადგენდით, ამბობდნენ, რუსები ჩამოვიდნენო. სხვათა შორის, ამ თემას რუსეთი ახლაც ისევე დაბლოკავს, როგორც იმპერიის დროს ბლოკავდა. რუსები ურალის მთებში დადიან, რაღაცებს ”ჩიჩქნიან” და ცდილობენ, რომ თავიანთი არიული წარმოშობა დაადგინონ და ამაზე სახელმწიფოს მხრიდან უზარმაზარი ფული იხარჯება. რუსებს უნდათ, რომ მსოფლიო ბატონობაზე მათ “პრეტენზიებს“ საფუძველი ჰქონდეს. ჩვენი ისტორია, რომელსაც ახლა გვასწავლიან, რუსების ხელში დაიწერა. რუსებს მოკლე ისტორია აქვთ და დაპყრობილ ერებში “დიდებად” რომ წარმოჩენილიყვნენ, იქით არ გაგვახედებდნენ, საითაც ეს კვლევაბია მიმართული.

იცით, ინდოევროპელ ფრანგებსა და ესპანელებს რა ტერორში ჰყავთ ბასკები? მათ “მოსულებს” ეძახიან, როცა თვითონ არიან მოსულები. მათ ყველა ისტორიულ მნიშვნელობას ანადგურებენ... ჩვენ ყველგან რუსებს გვეძახდნენ და დღესაც ასეა.

სხვათა შორის, ჰიტლერიც აფინანსებდა სამეცნიერო ექსპედიციებს (მათ შორის კავკასიაშიც), რომ გერმანელთა არიულ რასასთან კავშირი და უპირატესობის დამამტკიცებელი საბუთი აღმოეჩინა. ქართული საზოგადოება (სახელმწიფო) კი ამაზე ორიენტირებული არაა, ამ კუთხით არც გრანტები არსებობს. არადა, ზღვა მასალაა, რომლის დამუშავების შედეგადაც ნათელი გახდება, რომ ჩვენ ევროპის უძველესი ნაწილი ვართ.

ჩვენმა წინაპრებმა შექნეს საზოგადოება, რომლის ფასეულობებზეც უამრავმა ერმა თავისი მომავალი ააგო და ამ საწყისებით დღესაც ვითარდება. იბერებმა შექნეს ნამდვილი გლობალური პროცესი, ცივილური განვითარების გზა და ახალ მიწებზე აბორიგენულ მოსახლეობას, ინდოევროპელების მსგავსად, კი არ ანადგურებდნენ და იმონებდნენ, არამედ, მშვიდობიან, განვითარებულ საზოგადოებას აყალიბებდნენ და მათ ცოდნით მართავდნენ. იბერიული გლობალიზაცია კომპრომისსა და ურთიერთგამდიდრებაზე ყალიბდებოდა, ინდო-ევროპული - დაპყრობასა და განადგურებაზე. კეთილი  და მოძალადე საზოგადოებების შეხლა-შემოხლის ადგილი კი ხმალთაშუაზღვა იყო... მიწასთან (გეო-ორგია) დაკავშირებული ცოდნა ერთ-ერთმა პირველებმა სწორედ იბერებმა მიიღეს...

ქართულ-ლაზური და ბასკების პროტოსაზოგადოება თანამშრომლობაზე, საქმიანობაზე, კომპრომისსა და კეთილ ნებაზე დაფუძნებული საზოგადოება იყო, რომელიც გააჩანაგა “ზღვის აგრსესიულმა ხალხებმა”, ანუ ინდო-ევროპელებმა... მოკლედ, კოპტები, ანუ ქამიტები და იბერები, ანუ იბერო-არიანული რასა ყველა ცივილიზაციის საწყისია და მათზე ძალადობით განვითარდა ინდო-ევროპული ცივილიზაცია...

სხვათა შორის, აქამდეც ვამბობდით, რომ ქართველები პირველი ევროპელები ვართ...
- კი ბატონო, ვამბობდით, მაგრამ მტკიცებულება არსებობდა?!.. არ არსებობდა! ახლა კი არსებობს “იბერო-ევროპული მეგაცივილიზაციის“ სახით. დღეს ინდო-ევროპული რასა - რუსები, ოსები, თურქები, სომხები (სხვებზე რომ აღარაფერი ვთქვათ) - გვიტევენ. საერთოდ, ინდო-ევროპული რასის თვისებაა, რომ დაეპატრონოს სხვის საკუთრებას და ის თავის ორგანულ ნაწილად აქციოს (ასე მოიქცნენ ბერძნები ქართულთან მიმართებაში). ეს ეხება მიწას, ცოდნას, ცხოვრების წესს და რელიაგიასაც... ჩემს წიგნში - “იბერო-ევროპული მეგაცივილიზაცია” - სწორედ ეს პროცესებია აღწერილი და გამოკვლეული. ამასთან, მითითებულია ჩვენი მოქმედების საჭირო გზა და ხერხი.

აქამდე ვიცოდით, რომ ჩვენ და სომხებს საერთო წინაპარი გვყავდა. თქვენ კი ამბობთ, ქართველები იბერო-ევროპული რასის წარმომადგენელბი ვართ, სომხები კი - ინდო-ევროპულისო...
- დიახ, ასეა. მეტიც, სომხები კავკასიელები არ არიან და მათი რასა კავკასიაში ისევე შემოვიდა, როგორც, მაგალითად, თურქმენები შევიდნენ თურქეთში და თურქებად, (აზერეთში) აზერებად ჩამოყალიბდნენ...

რაკიღა საუბარი აქეთ წავიდა, თქვენი აზრით, სომხებს რატომ აქვთ პრეტენზია, რომ მაგალითად, შოთა რუსთაველი სომეხი იყო?..
- სომხები და ჩვენ დიდი ხანი გვერდიგვერდ ვითარდებოდით. ორივე ერს დიდი კულტურა გვაქვს. ეს, უბრალოდ, მდარე, უცოდინარი მასის თემაა.

რატომაა მსოფლიოში ე.წ. სომხური ლობი ყველაზე ძლიერი?
- იმიტომ, რომ დღეს მსოფლიოში ინდო-ევროპული რასაა გამეფებული.

და როგორ გამეფდა ინდოევროპული რასა?
- როგორ და, - ტერიტორიული გავრცელებით და შეკავშირებით. მაგალითად, ქამიტური რასა, ანუ კოპტები დღეს არაფერს წარმოადგენენ ინდოევროპული რასის ანუ არაბების ექსპანსიის წყალობით, მაგრამ ისინი, იბერიულთან ერთად, უზარმაზარ “დედაცივილიზაციას” განასახიერებენ. ლაზები ამბობენ, ქართველები არ ვართ, მაგრამ ჩვენ და ქართველები ერთი ხალხი ვართო… ანუ, ჩვენ უნდა ვისწავლოთ შეკავშირება, რადგან ერთი ფუძე გვაქვს, ჩვენ ერთი რასა, ერთი ხალხი, ერთი მოდგმა ვართ... ჩვენ ერთმანეთის გარდა არავინ გვყავს. კავკასიის ჩრდილოეთ არეალში დაბადებული ინდო-ევროპული რასის ნაწილი ჩრდილოეთით, სკანდინავიისა, ინგლისისკენ განსახლდა, ნაწილი სამხრეთისკენ დაიძრა.  ჩვენ კავკასიაში განვვითარდით... ეს ხალხი ჩვენი წინაპრები იყვნენ. ჩვენ გჭირდება ერთობა და ერთობლივი განვითარება.

ვთქვათ, ქართველები, ბასკები და ლაზები გავერთიანდით, მაგრამ ინდო-ევროპულ რასას როგორ უნდა დავუპირისპირდეთ?
- პოლიტიკურად გამოცდილმა ერებმა იციან, რომ ფორმას მნიშვნელობა არ აქვს, ანუ როცა ბასკების, ან ლაზების ერთიანობაზეა ლაპარაკი, ეს იმას კი არ ნიშნავს, რომ ისინი ქართული სახელმწიფოს შემადგენლობაში უნდა შემოვიდნენ. მთავარია, ჩვენ საერთო ფუძე მოვძებნოთ...

როგორც ამბობთ, ინდო-ევროპულმა რასამ მსოფლიოზე გაბატონება შეძლო, მაშასადამე, ინდო-ევროპული რასა იბერო-ევროპულზე უფრო ჭკვიანი ყოფილა...
- ჭკვიანი კი არა - აგრესიულია. სხვათა შორის, დავით აღმაშენებლის დროს ეს აგრესია იბერო-ქართულშიც შემოიჭრა ჯვაროსნული მოძრაობის სახით, მაგრამ მერე ისევ გაჩერდა.

სიტყვამ მოიტანა და, საქართველო უძლიერესი მხოლოდ დავითისა და თამარის დროს რატომ იყო? კი ბატონო, მეგაცივილიზაციის ფუძემდებლები ვართ; კი ბატონო, რუსებმა წაგვართვეს სახელმწიფოებრიობა, მაგრამ ფაქტია: 20 საუკუნის განმავლობაში საქართველოს სახელმწიფოებრიობა, ერთმანეთს რომ მივათვალოთ, მხოლოდ ას წელს ითვლის...
- იცით, რაშია საქმე?.. რუსებმა და, საერთოდ, ინდო-ევროპული რასის წარმომადგენლებმა თავიანთი მისია შეასრულეს და ახლაც ასრულებენ... დავით აღმაშენებლის დროს საზოგადოების შინაგანი ელიტის მობილიზაცია მოხდა და წინა პლანზე თვითუზრუნველყოფილი, თვითშემდგარი ხალხი და პრინციპები წამოიწია...

და მანამდე, ან მას შემდეგ რატომ დუმს ეს “შინაგანი ელიტა”? იბერო-ევროპული რასის პრობლემა იქნებ ისაა, რომ თანამოძმის გატანა არ შეუძლია?
- დიახ, ზუსტად ასეა, შეკავშირება არ გვაქვს... რატომ გაძლეს კოპტებმა უფრო დიდ ხანს და რატომაა უფრო ცნობილი კოპტური ცივილიზაცია, ვიდრე - ბასკური? იმიტომ, რომ კოპტებმა ერთ ტერიტორიაზეა მოახდინეს ლოკალიზება. ჩვენი რასა კი დიდ ტერიტორიაზე იყო განფენილი და, შესაბამისად - დანაწევრებული.

ასეა თუ ისე, ვთვლი, რომ ყველაფერი ეს “გარდასული დიდებით” ტკობაა...
- ეს ასე არაა! წარსული (პრაქტიკა-ისტორია) მართავს მომავალს. ჩვენ, უბრალოდ, უნდა ვიცოდეთ, ვინ ვიყავით და ისე განვვითარდეთ, რომ ამ წინასწარმეტყველური ისტორიით ამოვიცნოთ, თუ როგორ შეიძლება შემდგომში მოქმედება, ანუ თანამედროვე გლობალიზაციაში კიდევ არ დავიკარგოთ.

ზოგი იმასაც ამბობს, რომ ქართველი ერი, უბრალოდ, დაბერდა...
- ერებში დაბერების პროცესი არ არსებობს. უბრალოდ, ერში ხდება მდაბიო საზოგადოების ჩამოყალიბება რაღაც ეტაპზე. დღეს არის მდაბიო, არაშემომქმედი საზოგადოება, რომელიც არანაირ შინაგან რესურსს არ სცნობს და ყველაფერს მიბაძვით, ინსტიქტებით აკეთებს.

რატომ არ სცნობს?
- იმიტომ, რომ არ იცის თავისი ისტორია, საკუთარ თავს არ უღრმავდება... ამას წინათ, ბათუმში მედეას ძეგლი დადგეს და ვიღაცებმა თქვეს, მედეა გამყიდველია და მისი ძეგლი არ უნდა დაგვედგაო. არადა, მარტივი, პრიმიტივების მსჯელობაა: მედეა ინდო-ევროპულ რასასთან თანამშრომლობის სიმბოლოა და თუ ამას არ გავითავლისწინებთ, შეიძლება, კიდევ ერთი “ოქროს საწმისი” დავკარგოთ.

მოკლედ, ქართველებს რუსულ წიაღში შექნილი კარიკატურული ისტორია გვაქვს, ანუ ჩვენი ნამდვილი ისტორია არ გვაქვს გამოკვლეული ბოლომდე და ჩვენი ისტორია 4-12 საუკუნეებში გაძლიერებული და ცოტა გვიანი პერიოდის გვგონია. ამიტომაც ვამბობთ, საქართველოს სახემწიფო 10-12 საუკუნეებში ჰქონდაო. არადა, მათი ეპოქა იმ პიროვნებებისა და მოვლენების წინაშე, რომელთა წრიდანაც იბერიული მოდგმა გამოვიდა, “ლილიპუტებიის ეპოქაა”. ჩვენ ისტორიის ხელახლა დაწერა მოგვიწევს!

ქართულ-ლაზურ და ბასკურ ერთობას საფუძველი სჭირდება, ანუ უნდა შეიქმნას “ერთობის იდეოლოგია”, რათა გადავურჩეთ ახალ გამოწვევებსა და გლობალიზაციას, რომლის ლიდერებიც ინდო-ევროპელები არიან. ამასთან, ქართველებმა, როგორც ერთადერთმა, დამოუკიდებელმა ერმა უნდა შემოვიღოთ ქართველების, ლაზებისა და ბასკების აღმნიშვნელი ერთიანი ტერმინი - “იბერიული”... ისტორია იბერებს, ანუ ქართველებს დამოუკიდებელ, თვითუზრუნველყოფილ, თვითგანვითარებად ხალხად წარმოაჩენს, ესე იგი, დამოუკიდებლობა ჩვენი ორგანული თვისებაა, ეს ბასკებსაც ეხებათ და ლაზებსაც. ეს ისტორია ისეთი ხელოვნური და უსაფუძვლო არაა, როგორც, მაგალითად, ოსების, ნაურუელების, აფხაზების, ტანგანიკელების, ან რომელიმე ხელოვნურად შექნილი, სიტუაციიდან წარმოქნილი “დამოუკიდებელი” ხელოვნური ერების ისტორიაა... ამასთან, საქართველოს სახელი უნდა შეეცვალოს და მას “იბერია” ეწოდოს, ანუ სახელი, რომელიც მისცემს საშუალებას ლაზებსა და ბასკებს, ჩვენსკენ გამოიხედონ და ჩვენც ისეთი ერთობა ვიგძნოთ, (ასევე - ჩრდილოეთკავკასიელებმა). ჩვენი “წინასწარმეტყველური“ ისტორიით ჩვენ შეგვიძლია იდეოლოგია ჩამოვაყალიბოთ და ჩვენი საკაცობრიო მისია განვსაზღროთ. ეს კი იმას ნიშნავს, რომ გობალურ პროცესებში ჩვენი განვითარების გზა ვიპოვოთ.