ბოლო დროს მომხდარი პოლიტიკური პროცესების შესახებ გვესაუბრება ეკა ბესელია.

ქალბატონო ეკა, როგორ შეაფასებდით აგვისტოს ომის წლისთავის აღნიშვნას. რა გამოიკვეთა პრეზიდენტ სააკაშვილის განცხადებებით?

- ომის წლისთავი არის ძალიან მძიმე. განსაკუთრებით დღევანდელი გადასახედიდან, როდესაც ფაქტები გაანალიზდა, ბევრი ინფორმაცია გახდა უფრო ხელმისაწვდომი და კიდევ უფრო გაშიშვლდა ის უბედურება და ტრაგედია, რომელიც ქვეყანას თავზე დაატეხეს პუტინ–მედვედევმა და სააკაშვილმა. ის, რაც 7 აგვისტოს მოხდა, არის დანაშაული რუსეთის ფედერაციის მხრიდან მშვიდობიანი მოსახლეობის წინააღმდეგ. ეს არის ოკუპაცია, ინტერვენცია, განხორციელებული საერთაშორისო ნორმების უხეში დარღვევით. მაგრამ ის, რაც სააკაშვილმა ჩაიდინა, არის ასევე საქართველოს კონსტიტუციის დარღვევა. ამის თაობაზე ძალიან კომპეტენტური დასკვნა დაწერეს დამოუკიდებელმა ექსპერტებმა სოსო ცისკარიშვილის ხელმძღვანელობით. ვფიქრობ, ხელისუფლებიდან ბევრს ეს დასკვნა წაკითხული არ აქვს. დიდი ხნით არის გადაწეული ცხინვალის და აფხაზეთის დაბრუნების პერსპექტივა.

ამაზრზენი იყო პარლამენტში ნუგზარ წიკლაურის განცხადება, რომ თურმე 7 აგვისტო უნდა აღვნიშნოთ ზეიმით მომავალშიც და ეს ტრადიციად უნდა დავამკვიდროთ. გესმით, რასთან გვაქვს საქმე? პარლამენტის წევრი, რომელიც თავს ხალხის რჩეულს უწოდებს და პრეტენზია აქვს წიგნიერებაზე, გვთავაზობს, რომ დღესასწაულად გადავაქციოთ ომის დაწყების თარიღი. ტრაგედიის და ქვეყნის ოკუპაციის, ხალხის დახოცვის და ტერიტორიების დაკარგვის დღე.

სააკაშვილის თქმით, ის რუსეთმა ვერ ჩამოაგდო და, მით უმეტეს, კუკავა, გამყრელიძე და ბესელია ვერ გააქცევენ.

- ძალიან კომიკური იყო სააკაშვილის განცხადებები, პუტინი ვერ მომერია და კუკავა მომერევაო? მძიმე მდგომარეობაშია ქვეყნის პირველი პირი, როცა ასეთ ფრაზას ამბობს - დემეტრე თავდადებულივით შემეძლო მოვქცეულიყავი და თუ ჩემს ქვეყანას ეშველებოდა, ვეახლებოდი პუტინს და ჩავაბარებდი იმ ნაწილებს, რომლებზეც ასე ნადირობსო. როცა ქვეყნის პირველი პირი ამას საჯაროდ ლაპარაკობს, მისი ფსიქიკური მდგომარეობა უნდა შემოწმდეს. ჯანსაღი ფსიქიკის პრეზიდენტი ასეთ რამეებს პრივატულ საუბრებშიც არ უნდა ამბობდეს.

ყოველ კვირა ატარებენ კვლევებს და ძალიან კარგად იციან, რომ ქართველი ხალხი ამ ხელისუფლებას და სააკაშვილს მხარს არ უჭერს. ახლა ველად რომ გაიჭრნენ და რეგიონებში რომ დადიან და ლოზუნგი: საქმე ლაპარაკის ნაცვლად, სახალხო დიალოგით შეცვალეს, იმიტომ, რომ ვერცერთი მათი დანაპირები ვერ გამართლდა, ეს არ არის გამოსავალი. ხალხთან ჯერ უნდა მიგესვლებოდეს, რომ მიდიხარ, მერე აქეთ წამოსულმა რაიმე რაციონალური უნდა წამოიღო და ხალხის დახმარების სურვილი უნდა გქონდეს. ვინ არის ახლა ამის გამკეთებელი: პალიკო კუბლაშვილი, წიკლაური, ეკა ხერხეულიძე თუ რომელიმე სხვა. ეს არის ხალხი, რომელიც ცხოვრობს ქართველი ხალხის ინტერესების ხარჯზე.

სააკაშვილი ირწმუნება, რომ აქციების ორგანიზატორი ოპოზიციონერები ჯიპებით დადიან და მათ ხალხი სრულებით არ ადარდებთ.

- სასაცილოა, პრეზიდენტი, ოპოზიციის წარმომადგენლები რითი დადიან, იმაზე კი არ უნდა ლაპარაკობდეს, არამედ იმაზე, თუ რა ქონება დააგროვა მისმა ხელისუფლებამ. ოპოზიციის წარმომადგენელი არ არის ვალდებული, რომ ვირზე შემომჯდარმა იაროს ხალხში, მაგრამ თვითონ რომ დადის კილომეტრიანი ესკორტით და მისი დაცვის წევრები ისე დადიან, რომ ლამის არაერთი ადამიანის სიცოცხლე შეიწირეს, ეს მას არ ადარდებს? სააკაშვილის გარემოცვა ყველა ბიზნესს აკონტროლებს და ყველას წილში უზის. მთელი საქართველო მისმა კლანმა გადაინაწილა. ჩვენთვის მნიშვნელოვანია არა ის, თუ რას ლაპარაკობს სააკაშვილი, არამედ ის, რომ მოვძებნოთ ძალები, რომ ქვეყანაში ვითარება შევცვალოთ.

ძალებში გულისხმობთ ახალი საპროტესტო ტალღის გაშლას?

- სამწუხაროდ, სააკაშვილს ტკბილი ენით ხვრელიდან ვერ ამოიყვან. პირველი შეხვედრის დროს სააკაშვილმა გაჩეჩილაძეს უთხრა: თუ დაადგები თარგამაძის გზას, თქვენ იქნებით სიამტკბილობაში ხელისუფლებასთან. ანუ თუ სააკაშვილთან ვითანამშრომლებთ და მის თამაშს ვითამაშებთ, ყულფში თავს არ გაგვაყოფინებენ.

ძალებში ვგულისხმობ იმას, რომ ეს აქციებით მოხდება თუ დიპლომატიური მეთოდებით, რა ფორმითაც შესაძლებელია რეალურად შეძლოს ხალხმა ხელისუფლების შეცვლა და ძალაუფლების განხორციელება, ეს არის ჩვენი ამოცანა და ეს უნდა გავაკეთოთ.

პრეზიდენტი აცხადებს, რომ არასაპარლამენტო ოპოზიციას ქვეყანას და ქალაქს აღარ აგარევინებთ.

- ხალხთან მუქარას არასდროს შედეგი არ გამოუღია. რატომღაც არ მახსოვს გაბედული სააკაშვილი, როდესაც ქუჩაში ასიათასობით ადამიანი იდგა. თუ მისი ძალა ის არის, რომ ავლაბრის რეზიდენციასთან ღამე მოიპარავენ და ორი დღის მერე აღმოაჩენ, რომ პოლიციის წინასწარი დაკავების საკანში არიან, ვერ ჩავთვლით, რომ ეს არის ის რესურსი, რითაც ხელისუფლებას შეუძლია პროტესტი გაანეიტრალოს. ეს არის ძალის სამართალი. ცოტა ხნის წინ ხალხმა აჩვენა, რომ მას შეუძლია თბილისის მართვა, ვნახეთ, რომ ორი თვის განმავლობაში სააკაშვილის ხელისუფლება იყო ნული. ხალხის დროებითი შესვენება და ოპოზიციის მხრიდან ძალების მოკრება სააკაშვილისთვის არ არის სულის მოთქმის საშუალება. გაცილებით უფრო მწვავედ დგას პრობლემები, ვიდრე ეს ერთი შეხედვით ჩანს.

რა აზრის ხართ უშიშროების საბჭოში არასაპარლამენტო ოპოზიციის მონაწილეობაზე?

- ყველას თავისი არჩევანი აქვს. ვერავის არჩევანს მოვნათლავ ღალატად. მიმაჩნია, რომ ასეთ ფორმატში მონაწილეობა არის სააკაშვილისთვის პიარი. მას ამერიკელებმა უთხრეს, რომ დემოკრატი არ არის, ამიტომ დაიწყო ასეთი ნაბიჯების გადადგმა. მე მივიღე ეს მიწვევა, მაგრამ უარი ვთქვი არა იმიტომ, რომ ჩემთვის მნიშვნელოვანი არ არის ქვეყნის საგარეო საფრთხეები, მაგრამ როცა ვიცი, რომ ეს არის პროპაგანდა და პიარი, მე არ ვაპირებ სააკაშვილის დემოკრატიის ანტურაჟი ვიყო. უშიშროების საბჭოზე იყვნენ მერაბიშვილი და მთავრობის სხვა წარმომადგენლები. მაინტერესებს, ოპოზიციის ლიდერებმა მას დაუსვეს კითხვები და თუ დაუსვეს, რა პასუხები მიიღეს, თუნდაც 15 ივნისის ფაქტთან დაკავშირებით ვინ დაისაჯა. დაისაჯა ვინმე ზურა აბაშიძის თითქმის სიკვდილის პირამდე მიყვანისთვის? რატომ არ არის ეს საქმე აქამდე გამოძიებული? როცა ამდენი პოლიტპატიმარია და როცა ამდენ ადამიანს გაუსწორდნენ, რატომ არ აქვს მერაბიშვილს ამაზე პასუხი? ერთის მხრივ ოპოზიცია უშიშროების საბჭოში მიგვიწვიეს, მეორეს მხრივ კი ჩვენი პარტიის აქტივისტები რუსთავში იმ დღეს დააპატიმრეს. ამ სხდომაზე რომ არ მივედი, ეს არ არის სიჯიუტე, ეს არის პრინციპული პოზიცია.

ოპოზიციაში განხეთქილებაა თუ უბრალოდ განწმენდის პროცესი მიმდინარეობს?

- არავითარი განხეთქილება არ არის, ახლა შეფასების ეტაპია. მცდარია პოზიცია, როცა ამბობენ, რომ ეს საპროტესტო აქციები კრახით დამთავრდა. ტირანიის და უსამართლობის წინააღმდეგ ბრძოლა არ შეიძლება კრახით დამთავრდეს.

ეროვნული ფორუმი, რომელიც აქციებზე თქვენ გვერდით იდგა, დღეს ხელისუფლებასთან ერთად რეგიონებში გასვლით შეხვედრებს მართავს. რამდენად სერიოზული პრობლემები წარმოიქმნა ამის გამო?

- ეს არის რაღაც ახალი ექსპერიმენტი. ინიციატივა საინტერესოა. ხალხმა შეაფასოს, მისაღებია თუ არა მათთვის ეს ფორმა. მე ფორუმს ამის გამო არ ვაკრიტიკებ. მე პირადად არ მაქვს სურვილი კუბლაშვილთან ერთად ვიარო ხალხთან შეხვედრებზე. ეს არის პოლიტიკური გემოვნების საკითხი.

აქციების ორგანიზატორთა ჯგუფში ეროვნული ფორუმის ამ ნაბიჯმა არ გამოიწვია უკმაყოფილება?

- ბევრს გაუკვირდა, ბევრს კითხვა გაუჩნდა, მაგრამ მე ვფიქრობ, რომ ყველა მოძებნის კითხვაზე პასუხს.

როცა ეროვნული ფორუმი 26 მაისისთვის აქციის ორგანიზატორთა ჯგუფს გამოეყო, პოლიტიკოსებში ითქვა, რომ ფორუმმა საეჭვოდ დიდი ფული იშოვა და ეს მათ ოფისებს ეტყობოდა. იკვეთება დღეს ფორუმის ხელისუფლებასთან ალიანსის ნიშნები?

- არ მინდა დავიჯერო ასეთი ტიპის მოარული ხმები.

რაიმე კონსულტაციები გაქვთ დღეს ეროვნულ ფორუმთან?

- ეროვნულ ფორუმთან არ გვაქვს კონსულტაციები. სხვა პოლიტიკურ ძალებთან აქტიური კონსულტაციებია შემდგომ სტრატეგიასთან დაკავშირებით. პარალელურად მიდის რეგიონებში შეხვედრები. ვმუშაობთ იმაზე, რომ ჯანსაღმა ოპოზიციურმა ძალებმა დაგეგმონ ისეთი სტრატეგია, რომელიც იქნება უფრო ეფექტური და შედეგზე ორიენტირებული.