“თავისუფალი დემოკრატების” ლიდერი ირაკლი ალასანია ”რეზონანსთან” საუბრისას აცხადებს, რომ დასავლეთი სააკაშვილს უკვე ისე უყურებს, როგორც წარსულის ლიდერს. თუმცა, მისი თქმით, ეს არ ნიშნავს იმას, რომ საქართველოში ხელისუფლება ძალადობრივი გზით უნდა შეიცვალოს. როგორც იგი აღნიშნავს, დღეისთვის მთავარი საარჩევნო გარემოს შეცვლაა, რათა საზოგადოებას თავისუფალი არჩევანის საშუალება მიეცეს. ამასთან, იგი არც საპროტესტო აქციებს გამორიცხავს.

აღსანიშნავია, რომ რამდენიმე დღის წინ ალასანიამ ამ საკითხებზე უშიშროების საბჭოს მდივანთან გიგა ბოკერიასთანაც ისაუბრა. თუმცა, ამ საუბრის კონკრეტული დეტალები არ გავრცელებულა. რა პოზიცია აქვს ბოკერიას ამ საკითხებთან დაკავშირებით და რა ითქვა შეხვედრაზე, ამ საკითხებთან დაკავშირებით “რეზონანსი” ირაკლი ალასანიას ესაუბრა.

ირაკლი ალასანია: ეს შეხვედრა წინასწარ იყო დაგეგმილი ჯერ კიდევ ჩემი და ბატონი ბოკერიას წინა შეხვედრისას. რაც შეეხება ამ ბოლო შეხვედრას, ეხებოდა საარჩევნო გარემოს გაუმჯობესებას, კონკრეტულად კი ისეთ ელემენტებს, როგორიც არის მედიასთან და კავშირებული საკითხები, პოლიციასთან დაკავშირებული საკითხები. როგორც იცით, ჩვენ შევთავაზეთ პოლიციის დეპოლიტიზაციის ჩვენეული ხედვა და ასევე განხილული იქნა ხელისუფლების მიერ უკვე წარმოდგენილი უშიშროების კონცეფცია.

საარჩევნო გარემოს გაუმჯობესებასთან დაკავშირებით ბოკერიამ რა თქვა, როგორია ხელისუფლების პოზიცია?

- მე მას ჩვენი პოზიციები გავაცანი, თუ რამდენად მნიშვნელოვანია საარჩევნო კანონმდებლობასთან ერთად შეიცვალოს მთლიანად მედიაგარემო და ამავე კონტექსტში განვიხილეთ პოლიციის დეპოლიტიზაციის საკითხიც, რადგან ეს საკითხი არჩევნების დემოკრატიულად ჩატარებისთვის ძალიან მნიშვნელოვანია. ეს ყველაფერი ერთად წარმოადგენს თვისობრივად გაუმჯობესებულ საარჩევნო გარემოს და ვისაუბრეთ იმაზე, რომ საზოგადოებაში უნდა გაჩნდეს არჩევნების ნდობა და ამისთვის მხოლოდ ტექნიკური ცვლილებები საკმარისი არ იქნება.

ჩვენ ამ კუთხით გავუზიარეთ ერთმანეთს ხედვები და ფრთხილი ოპტიმიზმით აღვნიშნავ, რომ ხელისუფლების მხრიდანაც არის შესამჩნევი ის განწყობა, რომ მზად არიან, რეალური და არსებითი ცვლილებები განხორციელდეს. ბუნებრივია, ძალიან ბევრი რამ დამოკიდებული იქნება თავად მოლაპარაკების პროცესზე და სააკაშვილის პოლიტიკურ ნებაზე. მაგრამ ამ ეტაპზე ნამდვილად არის ის განწყობა, რომ ცვლილებების დრო დადგა.

კონკრეტულად თუ ითქვა, რის დათმობაზე წავლენ?

-  მე ამას კონკრეტულ პასუხს ვერ გავცემ. ჩვენი საუბარიიყო კონსულტაციის ხასიათის, ანუ პოზიციების გაცვლა და, როგორც იცით, ამ საკითხზე მოლაპარაკებები მიმდინარეობს და ამ ფორმატში გამოიკვეთება, რას დათმობენ და რას - არა.

მე დღეს ვხვდები “ოპოზიციურ რვიანს” და მათ საქმის კურსში დაწვრილებით ჩავაყენებ იმასთან დაკავშირებით, რაზეც ჩვენ გვქონდა საუბარი.

უსაფრთხოების საკითხებთან დაკავშირებით რა ითქვა?

- მე ჩემი შეხედულებები წარვუდგინე. ჩვენ გვაქვს კონკრეტული შენიშვნები, რასაც ვხედავთ, რომ გამოტოვებულია ხელისუფლების მიერ წარმოდგენილ კონცეფციაში. ჩვენს ხედვებს ოფიციალურად წარმოადგენს ჩვენი პარტიის წარმომადგენელი სესიაზე და ჩვენი ხედვები მაშინ გახდება საჯარო. მოკლედ, ჩვენ მხოლოდ ამ ორ საკითხზე ვისაუბრეთ.

თქვენი შეხვედრის შემდეგ არაოფიციალურად გავრცელდა ინფორმაცია, რომ ოპოზიციის ნაწილი გეგმავს საპროტესტო აქციებს და ხელისუფლება პრევენციის მიზნით შეგხვდათ თქვენ, რათა მოესმინა თქვენი პოზიცია, შეუერთდებით თუ არა მათ. ამ საკითხზე იყო საუბარი?

- ხელისუფლების საქმე არ არის, ჩვენ რას ვაპირებთ და, ცხადია, ჩვენ ამის საქმის კურსშიც არ ვაყენებთ. რაც შეეხება ზოგადად საპროტესტო აქციებს, არის თუ არა მოსალოდნელი, გეტყვით, რომ ჩვენ ამ თემაზე საუბარი არ გვქონია.

ზოგადად საპროტესტო აქციები თუ იქნა ნახსენები თქვენი შეხვედრისას?

- არა. როგორც გითხარით, ჩვენ მხოლოდ იმ ორ საკითხზე ვისაუბრეთ. სხვა არაფერზე არ გვისაუბრია.

ბოლოს თქვენი აშშ-ში ვიზიტისას თქვენთვის უთქვამთ, რომ დასავლეთი სააკაშვილის გაპრემიერებას მხარს არ დაუჭერს. ეს კონკრეტულად ვინ გითხრათ და რა კონტექსტში?

- პირველ რიგში მინდა, აღვნიშნო, რომ ჩრდილო აფრიკაში და ახლო აღმოსავლეთში მიმდინარე პროცესებმა კიდევ ერთხელ გამოავლინა ის დამოკიდებულება, რაც დასავლეთში არსებობს ავტორიტარული რეჟიმების მიმართ. დასავლეთის პოზიციაა, რომ დასრულდა ერთპარტიული და ერთპიროვნული მმართველობის დრო. ეს დამოკიდებულება კი საქართველოს კიდევ ერთ შანსს აძლევს, რომ საკუთარ საზოგადოებასაც და მსოფლიოსაც დავანახოთ, რომ ჩვენ, სხვა ქვეყნებისგან განსხვავებით, შეგვიძლია ცვლილებების განხორციელება სწორედ არჩევნების გზით. ამაზე პასუხისმგებლობა კი ყველა პოლიტიკურმა ძალამ უნდა გავიზიაროთ, ვართ ხელისუფლებაში თუ არა.

რაც შეეხება კონკრეტულად ჩვენს ქვეყნას, დასავლურ პოლიტიკურ ელიტაში მიღწეულია ზოგადი თანხმობა, რომ საარჩევნო გარემოს გაუმჯობესებისთვის დაწყებული მოლაპარაკებები კონკრეტული შედეგით უნდა დასრულდეს, რაც იქნება იმის ნიშანი, რომ ჩვენ კონსტიტუციური ცვლილებებისთვის მზად ვართ და მეორე - სააკაშვილის მთელი დარჩენილი მოღვაწეობა უნდა მიეძღვნას საზოგადოების შემზადებას, რათა ჩატარდეს თავისუფალი არჩევნები და კონკრეტულად სააკაშვილის მხარდაჭერა დასავლეთისგან, ბუნებრივია, წარმოუდგენელია, თუკი მან პუტინის გზით სიარული გააგრძელა. ანუ დარჩა ხელისუფლებაში იმავე ფორმით, როგორც დარჩა პუტინი.

მათ ეს პირდაპირ ამ ფორმით გითხრეს?

- მე ეს დავინახე მათ განწყობაშიც, ორივე პარტიაში, და ამ საკითხზე, ფაქტობრივად, არსებობს კონსესუსი. ასე რომ, რეალური საფუძველი არსებობს, რომ ჩვენ მოვახერხებთ იმ არსებითი ცვლილებების განხორციელებას, რაც საზოგადოებას სჭირდება. ეს არის გარდაუვალი და მე შემიძლია, ვთქვა, რომ სააკაშვილი არ არის ლიდერი და არავინ უყურებს მას ისე, რომ შეეძლოს ქვეყნის წაყვანა მომავლისკენ. იგი უკვე წარსულის ლიდერია. მაგრამ მას აქვს მნიშვნელოვანი ფუნქცია, თუკი იგი ამას გაიაზრებს, რომ მის ხელშია, რა გზას დაადგება საზოგადოება ხელისუფლების ცვლის თვალსაზრისით.

ბოკერიასთან ამ თემაზე არ გქონდათ საუბარი? არ დაინტერესდა, დასავლელმა პარტნიორებმა რა გითხრეს?

- არა. მასთან ამაზე საუბარი არ მქონია. ჩვენ კონკრეტულად მხოლოდ იმ ორ საკითხზე ვისაუბრეთ, რაც ზემოთ უკვე ვთქვი.

თქვენი აზრით საქართველოში ფართომასშტაბიანი აქციები მოსალოდნელია?

- რა თქმა უნდა. სოციალური მდგომარეობა ყოველდღიურად იმდენად მძიმდება, კონკრეტულ საკითხებზე პროტესტი იმდენად იზრდება, რომ ჩვენი ვალია, ჩავატაროთ ეს აქციები, რათა ხელისუფლება ვაიძულოთ, შეცვალოს ეს აბსოლუტურად გაუაზრებელი პოლიტიკა სოფლის მეურნებაში, ეკონომიკაში, ბიზნესის განვითარების კუთხით, მართლმსაჯულების კუთხით.

ეს არ ნიშნავს იმას, რომ ჩვენი მოთხოვნა უნდა იყოს ხელისუფლების ძალადობრივი გზით დამხობა. ეს არასწორი იქნება და პირიქით - სწორედ სააკაშვილის წისქვილზე დაასხამს წყალს. მაგრამ კონკრეტული სოციალური მოთხოვნებით გამოსვლა, რომ მოქალაქეებმა საკუთარი უფლებები დაიცვან და შეაცვლევინონ პოლიტიკა, ეს დასაშვებია, მისაღებია და მე დარწმუნებული ვარ, რომ ასეთი ფორმის პროტესტი უახლოეს მომავალში უსათუოდ იქნება.

თუკი საარჩევნო საკითხებთან დაკავშირებით ხელისუფლებამ არ გაითვალისწინა საზოგადოების მოთხოვნა და არსებითი ცვლილებები არ განხორციელდა, ამ შემთხვევაში თუ იქნება აქციები?

- აქციების იგივე ფორმა, რაზეც ახლა ვსაუბრობდი, შესაძლებელია და დარწმუნებული ვარ, განხორციელდება კიდეც, თუკი პოლიტიკური ნება, რომელიც ხელისუფლებაში გარკვეული თვალსაზრისით გამოჩნდა, სააკაშვილის ერთპიროვნული გადაწყვეტილებით დაიბლოკება.

მოლაპარაკებების დაწყებისთანავე სააკაშვილი ულტიმატუმით გამოვიდა, რომ გარკვეულ საკითხებს იგი იდეადაც კი ვერ განიხილავს და, თუკი ასეთი მიდგომა გააგრძელა, ეს არ იქნება პოლიტიკური ნება, რომელიც ჩვენ დაგვანახებს, რომ მზად არის, თვისობრივად შეცვალოს საარჩევნო გარემო. მისი ასეთი დამოკიდებულება კი, ცხადია, საპროტესტო ტალღას არც ამ საკითხზე გამორიცხავს.

მაგრამ ჩვენ მოწადინებული და მონდომებული ვართ, რომ ეს მოლაპარაკებები კონკრეტული შედეგით დასრულდეს. ამიტომაც, თავიდანვე ვიტყვი, რომ თუკი პოზიტიური შედეგი გვინდა, კომპრომისებზე ორივე მხარემ უნდა ვიფიქროთ. ვერც ერთი მხარის წინადადება ასი პროცენტით ვერ იქნება გაზიარებული. რვაო პოზიციურმა პარტიამ სწორედ ამიტომ გამოვხატეთ კეთილი ნება, რომ ჩვენ მზად ვართ, წავიდეთ კომპრომისზე, რათა შედეგი მივიღოთ.

რა კომპრომისზე შეიძლება წახვიდეთ? რისი დათმობა იქნება თქვენი მხრიდან შესაძლებელი ან რა არის ყველაზე არსებითი, რასაც ვერ დათმობთ?

- ძალიან ბევრი საკითხია და ასე ვერ გამოვყოფდი. პირველ რიგში შემიძლია დავასახელო თუნდაც საარჩევნო სიები. თუკი ერთხელ და სამუდამოდ არ დაზუსტდა საარჩევნო სიები და არ იქნება განცდა, რომ ერთი მოქალაქე ერთ ხმას ნიშნავს, ცხადია, ძნელია, ილაპარაკო თავისუფალ არჩევნებზე. თუკი არ შეიცვალა სისტემა ისე, რომ პროპორციულად იქნება წარმოდგენილი მოსახლეობა არჩევნებში, თუკი არ გვექნება საარჩევნო კამპანიის კონკურენტულ გარემოში ჩატარების შესაძლებლობა, თუკი მედია არ იქნება გახსნილი ოპოზიციისთვის, თუკი პოლიცია არ ჩადგა კანონის სამსახურში და არ მოხდა მათი დეპოლიტაცია და საარჩევნო სისტემიდან ჩამოშორება, ცხადია, თავისუფალი არჩევნები ვერ ჩატარდება. ამიტომაც ბევრი საკითხია, რაც განაპირობებს თავისუფალ არჩევნებს და თვისობრივი ცვლილებები აქ უნდა დავინახოთ.

თქვენ რამდენად ელოდებით, რომ უკმაყოფილებახელისუფლების შიგნით მომწიფდეს და ოპოზიციური აზრი აქვეგაჩნდეს?

- არა მგონია, რომ ასე მოხდეს. არავის უნდა ჰქონდეს იმის ილუზია, რომ ასე მოხდება. ეს რეჟიმი ისეთია, რომ ხდება სრული იზოლაცია. ამიტომ ვფიქრობ, რომ შიგნით ვერავინ გაბედავს ამას, რადგან არა აქვს მორალური და ზნეობრივი გამბედაობა, რომ ეს ნაბიჯი გადადგან.