პრეზიდენტის მიერ ორბელიანების სასახლეში კულტურული მემკვიდრეობის აღდგენა-შენარჩუნების საქმეში შეტანილი წვლილისა და ქვეყნისათვის გაწეული სამსახურისთვის, რამდენიმე პირის დაჯილდოების ფაქტს პარტია „ხალხის ძალის“ წევრი თამარ ჩიბურდანიძე სოციალური ქსელით ეხმიანება და წერს, ყველას, ვისაც კი ქართული კულტურული ძეგლების აღდგენა-შენარჩუნებაში მცირედი დახარჯა, მადლობა ეკუთვნის, თუმცა უპირველესად მადლობა ეკუთვნის ბიძინა ივანიშვილს.
მისივე თქმით, სალომე ზურაბიშვილს ბიძინა ივანიშვილის სახელის ხსენებისაც კი ეშინია.
„პრეზიდენტმა ორბელიანების სასახლეში კულტურული მემკვიდრეობის აღდგენა-შენარჩუნების საქმეში შეტანილი წვლილისა და ქვეყნისათვის გაწეული სამსახურისთვის, რამდენიმე პირი დააჯილდოვა. ასევე, მადლობა გადაუხადა საერთაშორისო ორგანიზაციებს და პარტნიორებს ქართული ძეგლების რეაბილიტაციაში გაწეული დახმარებისთვის.
ბუნებრივია, ყველას მადლობა ეკუთვნის, ვინც ქართული კულტურული ძეგლების აღდგენა-შენარჩუნებაში თუნდაც მცირედს დახარჯავს, მაგრამ მადლობა უპირველესად ეკუთვნის ბიძინა ივანიშვილს, ვინც ყველაზე მეტი გაიღო ამ საქმისთვის. პრეზიდენტს ეშინია ამ სახელის ხსენების. როგორც ჩანს, უცხოეთიდან დირექტივა მხოლოდ მის ლანძღვას ეხება.
ამავე ღონისძიებაზე ზურაბიშვილმა განაცხადა, რომ ჩვენი იდენტობა სწორედ ჩვენს კულტურულ ძეგლებში გამოიხატებაო. დიახ, ასეა და ამიტომ დასაფასებელია ყველა ის პიროვნება, ვინც ჩვენი იდენტობის შენარჩუნებისთვის იღვაწებს. უპირველესად კი სწორედ ის, ვინც არა მარტო კულტურული ძეგლების აღდგენით და აშენებით, არამედ საქართველოს გადარჩენით შეგვინარჩუნა იდენტობაც და ქვეყანაც,“ - წერს თამარ ჩიბურდანიძე.
