კრამერის სიძულვილი საქართველოს ხელისუფლების მიმართ, რომელმაც საკუთარი ქვეყნის "ბახმუტიზაციაზე" თქვა უარი - ენით აღუწერელი ემოციაა. მას საქართველო მხოლოდ ერთ იპოსტასში აქვს წარმოდგენილი - მიწასთან გასწორებული, გენოფონდ-განადგურებული, მართლმადიდებლობა-ამოძირკვული და გენმოდიფიცირებული, ცალფეხზე ასკინკილათი მხტომარე ბიომასით დასახლებულ, - წერს "ხალხის ძალის" წევრი, დავით ქართველიშვილი, ჯორჯ ბუშის ინსტიტუტის აღმასრულებელ დირექტორ დევიდ კრამერზე.
მისი განცხადებით, საქართველოში შემოსასვლელად არასასურველ პირთა სია სწორედ კრამერით უნდა იწყებოდეს, იგი ასევე ყველაზე დაუნდობელ "დაუძინებელ მეგობართა" სიაშიც პირველ ადგილზე იქნებოდა. შესაბამისად, ქართველიშვილი მიიჩნევს, რომ კრამერი, რომელიც თბილისში, საერთაშორისო კონფერენციაზე იმყოფება, პერსონა ნონ გრატად უნდა გამოცხადდეს.
"დევიდ კრამერით უნდა იწყებოდეს საქართველოში შემოსასვლელად აკრძალულ, არასასურველ პირთა სია. ეს არის "ადამიანი", რომელიც მხარს უჭერს უკრაინაში ომის გაგრძელებას თუნდაც უკანასკნელ უკრაინელამდე, მანამ, სანამ "კრამერისებრთა" ხელში ინსტრუმენტად გადაქცეული ეს უკვე ლამის ექს-სახელმწიფო, არ დაამარცხებს რუსეთს. კრამერის სიძულვილი საქართველოს ხელისუფლების მიმართ, რომელმაც საკუთარი ქვეყნის "ბახმუტიზაციაზე" თქვა უარი - ენით აღუწერელი ემოციაა. მისთვის საქართველო მხოლოდ ერთ იპოსტასში აქვს წარმოდგენილი - მიწასთან გასწორებული, გენოფონდ-განადგურებული, მართლმადიდებლობა-ამოძირკვული და გენმოდიფიცირებული, ცალფეხზე ასკინკილათი მხტომარე ბიომასით დასახლებული.
თუ შეიძლება საქართველოს "დაუძინებელ მეგობართა" შორის ყველაზე ცბიერ და დაუნდობელთა სია შევადგინოთ - მის სათავეში ასევე დევიდ კრამერი იქნებოდა. ბავშვობიდან ის მხოლოდ იმისთვის სწავლობდა გულმოდგინედ რუსულ ენას, რომ კომუნიზმი დაემარცხებინა ყველა "რუსთან" ერთად, რომელთა რიცხვში მისთვის მაშინ ქართველებიც მოიაზრებოდნენ. ის მხოლოდ იმისთვის ეუფლებოდა რუსოფობიის მწვერვალებს, რომ მიწასთან გასწორებულ საბჭოეთში იმავე პროცესებს ჩასდგომოდა სათავეში, რასაც მისი წინაპრები ჩადიოდნენ ინდიელთა ტომების წინააღმდეგ. მისთვის "კარგი უკრაინელი" თუ "კარგი ქართველი" - მკვდარი უკრაინელი და მკვდარი ქართველია.
დღეს დევიდ კრამერისთვის საქართველო - დაუმორჩილებელი "ინდიელთა ტომია", ხოლო მართლმადიდებელი ქართველები - "ფლორიდის სემინოლები" არიან, ინდიელთა ერთადერთი ტომი, რომელიც ფორმალურად მაინც არ დანებდა ფედერალურ მთავრობას, და მასთან არანაირ შეთანხმებას ხელი არ მოაწერა. მთავრობას, რომელიც რეალურად რასიზმზე, ლიბერალურ ფაშიზმზე, გენდერულ და კლიმატურ სიგიჟეზე დაფუძნებულ ოლიგარქატს წარმოადგენს. დევიდ კრამერი კი, როგორც მინიმუმ - პერსონა "ნონ-გრატად" უნდა გამოცხადდეს. მისნაირებს იბერიის ღვთივკურთხეულ მიწაზე ერთი ნაბიჯის გადადგმაც კი უნდა აეკრძალოს, მათ ფეხქვეშ ქვესკნელის ლავა უნდა იწვოდეს." - წერს დავით ქართველიშვილი სოციალურ ქსელში.
