თითქმის ყველა ლიტერატურული გმირი თუ ზღაპრის პერსონაჟი რეალური ცხოვრებიდანაა აღებული. თუ კარგად დავაკვირდებით, ჩვენ გარშემო მათი მსგავსი ადამიანების აღმოჩენა არ გაგვიჭირდება. შესაძლოა, თითოეული ჩვენგანიც რომელიმე გმირს ჰგავს, მაგრამ ამ შემთხვევაში, ყურადღება საზოგადოებისთვის ცნობილ ადამიანებზე გავამახვილეთ. რატომღაც, რესპონდენტთა უმრავლესობამ ძირითადი აქცენტი პოლიტიკოსებზე გააკეთა. ჩვენ მიერ შეთავაზებული ნომინაციები და რესპონდენტთა მოსაზრებები კი ასეთია: ცნობილი ადამიანებიდან ვის რომელ ლიტერატურულ გმირსა თუ ზღაპრის პერსონაჟს ადარებთ?
წარმოგიდგენთ "წლის ყვარყვარეს", "წლის კარლსონს", "წლის ოთარაანთ ქვრივსა" და "წლის კონკიას".
"წლის ყვარყვარე" - ამ ნომინაციაში რამდენიმე პოლიტიკოსი დასახელდა. მათ შორის, ხმათა უმრავლესობა თბილისის საკრებულოს თავმჯდომარე ირაკლი შიხიაშვილმა და ექსპერტმა - გია ხუხაშვილმა მიიღეს. მაგრამ ყველაზე ორიგინალური ერთ-ერთი რესპონდენტის, დავით კვინიკაძის პასუხი გახლდათ, რომელმაც რამდენიმე ნომინაცია ერთ ექსპრომტ ლექსში გააერთიანა:
"ყვარყვარე - შიხიაშვილი,/ არ მეკამათოთ ამაში./ დიდ "ნაცებსაც" კი აჯობა,/ პრემიით ფულის ჭამაში./ კონკია სანიკიძეა,/ ადრე ვინ იყო - ვინ იცის./ დღეს "ლიმუზინებს" იწუნებს,/ ენატრებოდა "ვილისიც"./ კომბლეს ბიძინა მაგონებს,/ რომ გაგვიროზგა ბატონი,/ მისი გათლილი კომბლისგან/ "ნაცებს" ეტირათ პატრონი./ ერთს ვიცნობ, სულ რომ დაფრინავს,/ მაგრამ არ უყვარს "კრიშაო"./ ფრენით სულ კარლსონს მაგონებს,/ სააკაშვილი მიშაო./ კარლსონს უყვარდა მურაბა/ და პროპელერიც დიდია./ მიშა ჰალსტუხებს მიირთმევს,/ როდესაც გულზე ჰკიდია".
"წლის კარლსონი" - ნოდარ ხადურია, რადგან ამ პერსონაჟს გარეგნულად ძალიან ჰგავს", - საკუთარი მოსაზრება გაგვანდო კიდევ ერთმა რესპონდენტმა. მეორის აზრით კი, კარლსონი სააკაშვილია, რადგან ექსპრეზიდენტი სულ დაფრინავს.
"წლის ოთარაანთ ქვრივი" - ამ ნომინაციაში ნინო ბურჯანაძე დაასახელეს. არ ვიცით, აქვს თუ არა მას რკინის ქალამნები, მაგრამ რესპონდენტთა უმრავლესობის აზრით, მის ქცევებში ილია ჭავჭავაძის ამ პერსონაჟისეული სიმტკიცე ჩანს.
"წლის კონკია" - გამოკითხულ რესპონდენტთა ნაწილმა ამ ნომინაციის კანდიდატთა შორის, საქართველოს პრეზიდენტის მეგობარი ქალბატონი, მაკა ჩიჩუა დაასახელა იმ მიზეზის გამო, რომ მარგველაშვილის გაცნობამდე ქალბატონი
მაკა ვიზაჟისტად მუშაობდა. ახლა კი გაუმართლა და ლამის პირველი ლედი გახდა... ამ ნომინაციაში უპირობო ლიდერი პარლამენტის წევრი, ყოფილი ჟურნალისტი ელისო ჩაფიძე გახლავთ. ხალხის აზრით, მას ძალიან გაუმართლა: შარშან პარლამენტის წევრი გახდა და მისი მაჭანკლობა არც მეტი, არც - ნაკლები, ბიძინა ივანიშვილმა იკისრა. სწორედ ამიტომ, ხალხმა ბატონ ბიძინას "წლის ხანუმა" უწოდა, თუმცა ყოფილი პრემიერის სახელს მხოლოდ ამ ნომინაციაში არ გაიგონებთ.
