გივი მიქანაძე ოპოზიციისა და სალომე ზურაბიშვილის მიერ გამჭვირვალობის კანონის წინააღმდეგ საკონსტიტუციო სასამართლოში შეტანილ სარჩელს ეხმაურება. პარლამენტის განათლების, მეცნიერებისა და ახალგაზრდობის საკითხთა კომიტეტის თავმჯდომარე მიიჩნევს, რომ ეს მიზანმიმართული კამპანიის ნაწილია.
„აქ კიდევ ერთხელ გამოჩნდა ის სპეკულაციური და მიზანმიმართული კამპანია, რომელიც ორკესტრირებულად დაიგეგმა და სალომე ზურაბიშვილმა ინდივიდუალურად, არასამთავრობო სექტორმა ცალკე და ახლა უკვე ოპოზიციონერმა დეპუტატებმა წარმოადგინეს, იმისთვის რომ ჩვენს დასავლელ პარტნიორებს სიტუაციის სიმძაფრე აჩვენონ, რაც რეალობას არ წარმოადგენს.
გამჭვირვალობის კანონის წინააღმდეგ გამოდიან ის ორგანიზაციები, რომლებმაც რეალურად აჩვენეს, რომ გამჭვირვალე არიან. გამჭვირვალობისა და ანგარიშგების წინააღმდეგ გამოდიან ის ორგანიზაციები, რომლებიც საკუთარ დონორს უზიარებენ ყველა ინფორმაციას და საზოგადოებისგან ამ ინფორმაციას მალავენ“, - აღნიშნავს მიქანაძე.
ოპოზიციის წარმომადგენლებმა „უცხოური გავლენის გამჭვირვალობის შესახებ“ კანონის მოქმედების შეჩერება მოითხოვეს. მათ საკონსტიტუციო სასამართლოში სარჩელი შეიტანეს.
