„გამორიცხულია, ხელისუფლებამ გადადგას ისეთი ნაბიჯი, რომელიც კანონის ფარგლებს სცდება“ - ასეთია მმართველი გუნდის პასუხი, ამერიკის შეერთებული შტატების სახელმწიფო დეპარტამენტის სპიკერის, მეთიუ მილერის მოწოდებაზე, რომ „ოცნებამ“ დასაქცირებული ქართველი მოსამართლეების მიმართ გამოძიება დაიწყოს.

მათი თქმით, მოსამართლეებთან დაკავშირებით ხელისუფლებამ ვერ მიიღო ბრალდების დამადასტურებელი ვერც ერთი ფაქტი.

მეთიუ მილერის თქმით კი მოუწოდებენ მთავრობას, გადადგას ნაბიჯები „კორუმპირებული აქტორების პასუხისმგებლობის საკითხის დაყენების უზრუნველსაყოფად“.

„სანქციებს, რომელიც თქვენ ახსენეთ, ვაწესებთ, რათა ხელი შევუწყოთ იმ პირებისთვის პასუხისმგებლობის საკითხის დაყენებას, რომელთაც ისარგებლეს დაუსჯელობით და ასევე, რომლებიც მუშაობენ კანონის უზენაესობისა და საქართველოს მართლმსაჯულების სისტემისადმი საზოგადოების ნდობის ხელყოფისთვის. საქართველოს მთავრობასთან კომუნიკაციის თვალსაზრისით, ჩვენ, რა თქმა უნდა, მოვუწოდებთ მთავრობას, გადადგას ნაბიჯები კორუმპირებული აქტორების პასუხისმგებლობის საკითხის დაყენების უზრუნველსაყოფად“, – განაცხადა მილერმა.

მილერს კი სააპელაციო სასამართლოს მოსამართლე ლევან მურუსიძე პასუხობს, რომელიც ამერიკის მიერ ერთ-ერთი სანქცირებული მოსამართლეა.

მურუსიძის განცხადებით, არ არსებობს მტკიცებულება, რომელიც მის ბრალეულობას დაამტკიცებს.

მისივე თქმით, რეალურად კონკრეტულ პირებს სურთ სასამართლო ხელისუფლების ხელში ჩაგდება და მის ნაცვლად არასამთავრობო სექტორის წარმომადგენლის დანიშვნა.

„დარწმუნებული ვარ, რომ კორუფციის თემას ეს არ ეხება. მიზანი, წლების განმავლობაში, არის ის, რომ ყველას უნდა ჰქონდეს ბერკეტები სასამართლო სისტემაზე ზემოქმედების.

მესროლეს ეს ტალახი, კორუმპირებულის, ისე, რომ არ მეუბნებიან რაში მდგომარეობს ეს კორუფცია. ბატონმა მილერმა უნდა თქვას, რომ ვიცი, ამა და ამ საქმეში, ლევან მურუსიძეს აღებული აქვს ქრთამი. არც განაჩენი არსებობს ჩემ წინააღმდეგ დადასტურებული, არაფერი ისეთი არ არსებობს და წინასწარ რატომ მაკერებ ამ კორუმპირებულობას?!

ვთქვათ, ჩატარდეს გამოძიება და აღმოჩნდეს, რომ არ ვარ კორუმპირებული, მერე რა ხდება?! რამხელა რეპუტაციული ზიანია, ოჯახის წევრების ამხელა ტერორი. ამერიკის შეერთებულ შტატებში ათასი პრობლემაა, ამხელა გლობალური რაღაც ხდება გარშემო და (ამბობს) ლევან მურუსიძე არის კორუმპირებული და მის მიმართ დაიწყეთ გამოძიება.

აქ რეალური თემა არის ის, რომ უნდათ, სასამართლო სისტემაში მოიყვანონ ის ადამიანები, ვინც არის მათთვის სანდო, არასამთავრობო სექტორიდან დაკომპლექტდეს. არაფერი რომ არ შეიცვალოს სასამართლო სისტემაში და ჩემ ადგილას იყოს ნებისმიერი არასამთავრობო ორგანიზაციის წარმომადგენელი, დარწმუნებული ვარ, რომ გამოვიდოდნენ და იტყოდნენ - სანიმუშო სასამართლო არის საქართველოში. აქ, რეალურად, არის სასამართლო სპეცოპერაცია“, - განაცხადა ლევან მურუსიძემ.

„მეთიუ, are you kidding my friend? საქართველოს დამოუკიდებელი სასამართლოს მოსამართლეები დაასანქცირეთ. დღემდე ველოდებით (პასუხს) კონკრეტულად რის საფუძველზე, რა არგუმენტებით?“ - მილერის განცხადებას ასე პარლამენტის რეგიონული პოლიტიკისა და თვითმმართველობის კომიტეტის თავმჯდომარის პირველი მოადგილე და საპარლამენტო უმრავლესობის წევრ ირაკლი ზარქუა გამოეხმაურა.

ზარქუა ასევე იხსენებს მოსამართლე ჩხიკვაძის საქმეს, რომელიც ნიკა გვარამიას მოსამართლეა და მისთვის გამოტანილი განაჩენის გამო ამერიკის ვიზაზე უარი უთხრეს. ზარქუა აღნიშნავს, რომ ბოდიში უნდა მოეხადა ყველას, ვინც მოსამართლეს და მის ოჯახს აბულინგებდა.

ანალიტიკოსი გია აბაშიძე for.ge-სთან ამბობს, რომ როდესაც ადამაინს რაღაცას აბრალებ, ამის მტკიცებულებები უნდა წარმოადგინო. აბაშიძის თქმით, არა აქვს მნიშვნელობა ვის ადანაშაულებ, ქვეყანას, ფიზიკურ პირს, საჯარო მოხელეს თუ ა.შ. ამის მტკიცებულებები უნდა დადო.

„მტკიცებულებების წარმოდგენა ბრალდების მხარეს არის. ამერიკის სახელმწიფო დეპარტამენტმა ჩვენს მოსამართლეებს სანქციები დაადო ისე, რომ ამის მიზეზი არც აუხსნია. მტკიცებულებები არ არსებობს იმის, თუ რა არის ამ ადამიანების დასანქცირების მოტივი. რაც თქვეს და რა მიზეზიც მოიყვანეს ამ სანქციების დაწესების, იყო ის რომ, მათ ქართულ მედიაში ნახეს რაღაცა სიუჟეტი, ასევე წაიკითხეს მესამე სექტორში გამოქვეყნებული რაღაცა კვლევები და ამის ნიადაგზე მოსამართლეები დაასანქცირეს. ამერიკა ხომ არ არის ბელარუსი ან რუსეთი, რომ გარკვეული ბრალდებები შეთითხნონ.

ძალიან დასანანია, როცა ამ მეთოდით, საქართველოსთან რაღაცა ვითომ ანგარიშსწორება მოახდინონ. არა აქვს მნიშვნელობა რა სიდიდის არის ქვეყანა და რა გავლენით სარგებლობს, ყველა ავტორიტეტული საერთაშორისო ორგანიზაციის მიერ, სტრასბურგის სასამართლოს ჩათვლით, აღიარებულია, რომ ქართული სასამართლო მოწოდების სიმაღლეზეა“, - ამბობს აბაშიძე.

მისივე თქმით, საქრათველოს სასამართლო სისტემა იმაზე წინ არის, ვიდრე აღმოსავლეთ ევროპის რამდენიმე ქვეყანა. მათ შორის კანდიდატი ქვეყნებიც. ამიტომ ანალიტიკოსი აცხადებს, რომ ვითომ დასანქცირება და ვეტინგის პრაქტიკა, აბსოლუტურად მიუღებელია. აქ კიდევ მეორე მდგენელი ის არის, რომ მიუღებელია სუვერენული სახელმწიფოს საქმეებში ნებისმიერი ქვეყანა ერეოდეს.

„გამოძიების საკითხი უნდა გახდეს გაურკვეველი ბრალდებები? უნდა გვიკარნახონ, რა კანონი მივიღოთ და რა არა? რომელი მოსამართლე გავუშვათ ან ვეტინგი ჩავატაროთ?! ასე არ ხდება, სუვერენული სახელმწიფოს შიდა საქმეებში, როგორი პარტნიორი და მეგობარიც არ უნდა იყო, სხვა ქვეყანა ვერ ჩაერევა. იმას, რომ ამერიკა სხვა ქვეყნების შიდა საქმეებში ერევა, ამას მხოლოდ საქართველო არ ამბობს. ამაზე საუბრობენ არა ერთი ევროპული ქვეყნების ლიდერები. ასე რომ, „ოცნების“ პირობებში ქვეყნის ინტერესები და სუვერენიტეტი დაცულია. ამას უნდა შეეგუონ ის ქვეყნები, რომლებიც ნაცრეჟიმის დროს ცხვირის ჩაყოფას იყვნენ მიჩვეულები. როცა სააკაშვილი ქვეყანას მათი მითითებებით მართავდა“, - ამბობს აბაშიძე.

მისივე თქმით, რომ გადავხედოთ რამდენიმე თვის წინანდელ ამბებს, დავინახავთ, რომ იყო მცდელობა, ემართათ ეროვნული ბანკი, ცენტრალური საარჩევნო კომისია, ემართათ ასევე მართლმსაჯულების სისტემა.

„ამიტომ ვამბობ, რომ ხალხის ინტერესებიდან გამომდინარე, არც ერთ გარე აქტორს, თუნდაც დიდი ხნის მეგობარს, არ მიეცემა უფლება, რომ ჩვენს შიდა საქმეებში ხელები აფათუროს. ეს მათი კომპეტენცია არ არის. პრემიერ კობახიძის განცახდებას გამოვეხმაურები, თუკი ქვეყნის ელჩები პოლიტიკურ კომენტატორებად იქცნენ ტელესივრცეში საქართველოს საკითხებში, მაშინ დასხდნენ და გამჭვირვალობის კანონი ღია ეთერში განიხილონ. არავის არ აქვს უფლება, ამერიკა იქნება, აღმოსავლეთი თუ დასავლეთი... ეს რომ მოხდეს რომელიმე ევროპულ ქვეყანაში, წარმოვიდგინოთ, რამხელა სკანდალი იქნება. საქართველომ დაიწყო გარე აქტორების შეჩვევა არსებულ რეალობაზე, რომ დამოუკიდებელი ქვეყნის საქმეებში ჩარევა დაუშვებელია“, - ამბობს აბაშიძე.