ჩამოართმევენ თუ არა საქართველოს ასე წვალებით მიღებულ ევროკავშირის წევრობის კანდიდატის სტატუსს? ეს კითხვა მას შემდეგ გააქტიურდა, რაც 700 ევროპარლამენტარიდან 22-მა ხელი მოაწერა ოდიოზურ განცხადებას, რომ „გამჭვირვალობის შესახებ კანონის“ მიღების შემთხვევაში, ევროკომისიამ შესაძლოა, გაფართოების პროცესის თავდაპირველ პოზიციებზე დაბრუნება გადაწყვიტოს და ამით დასაჯოს საქართველო.

სიტუაციას კიდევ უფრო მეტი ბუნდოვანება შესძინა გერმანიის კანცლერმა, შოლცმა, რომელმაც აღნიშნული კანონის უკან გაწვევა მოითხოვა იმ მოტივით, რომ საქართველოს არ სჭირდება მსგავსი კანონები.

კიდევ უფრო დამაბნეველი აღმოჩნდა ევროკავშირის ელჩის პაველ ჰერჩინსკის განცხადება, რომელმაც შეკითხვის საპასუხოდ, რამდენად შეიძლება „უცხოური გამჭვირვალობის“ პროექტი ევროკაშირისკენ გზაზე დაბრკოლება გახდეს, უპასუხა, რომ „გამჭვირვალობის შესახებ კანონი“ შეუთავსებელია ევროპულ ნორმებთან და რთული იქნება, გააკეთოს პოზიტიური შეფასება კანონის მიღების შემთხვევაში რა მოხდება.

ამის საპასუხოდ საგარეო საქმეთა მინისტრი ილია დარჩიაშვილი ამბობს, რომ გამჭვირვალობის შესახებ კანონი ხელს ვერ შეუშლის საქართველოს ევროინტეგრაციას და ახლა მთავარი საზრუნავია, პარტნიორებმა მიიღონ ზუსტი და არა სხვისგან მოსმენილი ინფორმაცია.

პრემიერი ირაკლი კობახიძე კი აცხადებს, რომ არ შეიძლება ტოლობის ნიშანი იყოს გაუმჭვირვალობასა და ევროინტეგრაციას შორის, მაშინ გამოდის, რომ ღირებულებები დამდგარა თავდაყირა.

ანალიტიკოსი დავით ზარდიაშვილი ევროკავშირის წევრობის სტატუსის დაკარგვასა და პრობლემების შექმნას ევროინტეგრაციის გზაზე არ მოელის. For.ge-სთან საუბრისას ანალიტიკოსი აცხადებს, რომ გამორიცხულია, ევროკავშირის წევრობის კანდიდატის საკითხთან დაკავშირებით საქართველოს პრობლემა შეექმნას, რადგან ევროკავშირს თავისი დღის წესრიგი აქვს, ამ წესრიგს მისდევს და ამ დღის წესრიგში არანაირად არ ჯდება, რომ ქვეყანას, რომელსაც მიენიჭა კანდიდატის სტატუსი, ეს სტატუსი შეუჩერონ. თეორიულად შეიძლება ყველაფერი მოხდეს, მაგრამ ეს თვითონ ევროკაშირის სტაბილურობას შეუქმნის ძალიან დიდ საფრთხეს.

„რაც შეეხება ევროკავშირში სამომავლო ინტეგრაციას, პროგნოზირება საკმაოდ რთულია, თუ რა იქნება წლების შემდეგ, ახლა ვითარება ისეთნაირად იცვლება, რომ შეიძლება ირან-ისრაელის ომი დაიწყოს. ასეთ ვითარებაში ევროკავშირის პერსპექტივაზე საუბარი ნაადრევია“, - აცხადებს დავით ზარდიაშვილი.

ანალიტიკოსი რამაზ საყვარელიძე არ გამორიცხავს ევროინტეგრაციის გზაზე დაბრკოლებას. მისი აზრით, ევროპელებს აქვთ იმის უფლება, ჩვენს საწინააღმდეგოდ ნაბიჯები გადადგან და ევროკავშირის სტატუსთან დაკავშირებით პრობლემები შეგვიქმნან, მაგრამ, მეორე მხრივ, არის ფაქტორები, რის გამოც შეიძლება ევროპელებმა აღარ იმოქმედონ რადიკალურად, ვინაიდან სტატუსი არ მოუციათ ლამაზი თვალებისთვის.

„სტატუსი არ მოუციათ ნჯო-ების გასანებივრებლად, არც იქამდე არ აპირებდნენ ამ სტატუსის მოცემას, ფაქტია, რომ სტატუსი მოგვცეს რაღაც სხვა მნიშვნელობით. ეს სხვა მნიშვნელობა კი იმის გაცნობიერება იყო, რომ ომი გრძელდება უკრაინაში, რუსეთ-ჩინეთის ტრანზიტი ვეღარ გაივლის და ტრანზიტმა უნდა გაიაროს კავკასიაზე, ამ ტრანზიტმა უნდა წაიღოს ტვირთი ევროპაში. ისევ ევროპაა დაინტერესებული კავკასიასთან და, კერძოდ, საქართველოსთან ნორმალური ურთიერთობა ჰქონდეს“, - აღნიშნა რამაზ საყვარელიძემ ჩვენთან საუბრისას.

„ყოფილი პოლიტპატიმრები ადამიანის უფლებებისთვის“ თავმჯდომარე ნანა კაკაბაძე მიიჩნევს, რომ ევროკაშირის კანდიდატის სტატუსის ჩამორთმევა არანაირად არ მოხდება. პირიქით, ასეთი მექანიზმი არ არსებობს და ეს არის გაუცნობიერებელ საზოგადოებაზე გათვლილი.

„სტატუსის ჩამორთმევის შესაძლებლობა არც თეორიულად და არც პრაქტიკულად არ მომხდარა. 30 წელია, თურქეთი ელოდება ამ სტატუსს, მაგრამ არავის ჩამოურთმევია, რადგან ჩამორთმევის მექანიზმი არ არსებობს. კუბილიუსებმა და სხვებმა ამ ოდიოზურ განცხადებაზე ხელი რომ მოაწერეს, ეს მათი დაწერილი კი არ იყო, არამედ ეს იყო ჩვენი ნჯო-ების მიერ დაწერილი. მათ ეს განცხადება გათვლილი ჰქონდათ საქართველოზე, რომ ქართველი ხალხი გამოეშტერებინათ და შეეშინებინათ. მაჩვენონ ერთი მუხლი მაინც, რომლითაც შეიძლება მინიჭებული სტატუსის ჩამორთმევა, ეს არის ტყუილი, ასეთი მუხლი არ არსებობს“, - აცხადებს ნანა კაკაბაძე ჩვენთან საუბრისას.

მისი აზრით, დასავლეთმა უნდა აგვიხსნას ერთი რამ, რატომ ავიწყდებათ, რომ საქართველომ თავისი ნებით აიღო ვალდებულება, ჰარმონიზაცია მოეხდინა მათ კანონმდებლობასთან მიმართებით და ჩვენ ამას ვახორციელებთ. უფლებადამცველის აზრით, პირიქით, დასავლეთი არღვევს პირობებს, რადგან მათთან რა კანონებიც მუშაობს, იმაზე გვეუბნებიან, თქვენთან არ იმუშაოსო და სწორედ ეს არის სუვერენიტეტის ხელყოფა.