ცენტრ „ემპათიის“ ხელმძღვანელი მარიამ ჯიშკარიანი „ქრონიკასთან“ უარყოფს ინფორმაციას იმის შესახებ, რომ ბრიტანულ გამოცემას ინტერვიუ მისცა მიხეილ სააკაშვილის შესახებ.

„არ მიმიწოდებია არანაირი [ინფორმაცია], ურთიერთობა არ გვქონია. ერთი წელია არ შევსულვართ შიგნით [სააკაშვილის პალატაში] და არ ვიცით რა მდგომარეობაა. 16 იანვარს არანაირი ინტერვიუ არ მიმიცია. ვერ ვიხსენებ. არ მიმიცია არანაირი ინტერვიუ ამ [ვენდელ სტივენსონი] ჟურნალისტისთვის და რა გავაკეთო ახლა“, - ამბობს ჯიშკარიანი სატელეფონო კომენტარში.

„პატიმარი და ოლიგარქი - ბრძოლა საქართველოს მომავლისთვის“ - ამ სათაურით The Economist-ში გამოქვეყნდა სტატია, რომლის ავტორიც, მკითხველს მხოლოდ იმ ინფორმაციას უყვება, რომელიც მიხეილ სააკაშვილის მხარემ მიაწოდა. გავრცელებული ინფორმაციით, ჟურნალისტი იანვარში საქართველოში იმყოფებოდა და შეხვედრები გამართა, მათ შორის, ცენტრ „ემპათიის“ ხელმძღვანელთან, მარიამ ჯიშკარიანთან.