მას შემდეგ, რაც ფრაქცია „ხალხის მსახურის“ თავმჯდომარე დავით არახამიამ ლობირების შესახებ კანონპროექტის წარდგენა დააანონსა უკრაინის რადაში, საქართველოში ბევრ ადამიანს გაახსენდა, რომ სწორედ არახამია იყო ერთ-ერთი, ვინც საქართველოში „ფარას“ კანონის მიღებას ეწინააღმდეგებოდა. რა შეიცვალა არახამიას მენტალობაში დღეს, როცა ის უკრაინაში ლობისტების გამოვლენას სწორედ იმ ამერიკული კანონის მეშვეობით ცდილობს, რომელიც საქართველოში რუსულ კანონად მოინათლა?!

ეს ხომ არ არის ორმაგი სტანდარტი და, რაც კორუმპირებული უკრაინისთვის დასაშვებია, საქართველოში რატომ უნდა იყოს აკრძალული?!

საქართველოს ხელისუფლების წარმომადგენლები ამბობენ, რომ რატომღაც საქართველოში რუსულ კანონად მოინათლა ამერიკული „ფარა“ და დაიწყო რევოლუციური სცენარისკენ მომზადება კარგად დაორგანიზებული მარტის აქციებით.

რაც შეეხება დავით არახამიას, მისი თქმით, „ჩვენ ვხსნით ახალ დონეს - კანონს ლობირების შესახებ, რომლის მიხედვითაც, ყველა შესაბამისმა ორგანიზაციამ და პირმა უნდა წარადგინოს მონაცემები თავისი დონორებისა და თანხების შესახებ კორუფციის პრევენციის ეროვნულ სააგენტოში“.

ანალიტიკოსი გია აბაშიძე ორმაგი სტანდარტის გამოვლენად მიიჩნევს, რომ თურმე ზელენსკის კორუმპირებული ხელისუფლებისთვის ე.წ. რუსული ფარას კანონი დასაშვებია, ხოლო დემოკრატიულ საქართველოში, სადაც რადიკალების ფსევდო არასამთავრობოები მთავრობის დასამხობად მუშაობენ, არ ყოფილა დასაშვები. აბაშიძის აზრით, კრემლსაც არ დაესიზმრებოდა ანტიდასავლური განწყობების იმგვარი გაღვივება საქართველოში, რასაც ცალკეული დასავლელი აქტორები აკეთებენ „ფარას“ მიღებით უკრაინაში.

ექსპერტი ედიშერ გვენეტაძე მიიჩნევს, რომ ყველა ის პირი, ვინც საქართველოში მარტის აქციებისას უცხოური აგენტების შესახებ კანონპროექტს რუსულს უწოდებდა, უკრაინაში უნდა გაემგზავროს ამავე კანონის გასაპროტესტებლად.

დავით არახამიას მიერ ლობირების შესახებ კანონპროექტის წარდგენას ცინიზმად, უსინდისობის ზედოზირებად აფასებს „ხალხის ძალის“ წევრი დავით ქართველიშვილი და იხსენებს, რომ მსგავსი კანონის მიღების მცდელობისთვის საქართველოში „მაიდანს“ აპირებდნენ.

ფრაქცია „ქართული ოცნების“ თავმჯდომარის მოადგილე რატი იონათამიშვილი იხსენებს, რომ თვითონ არახამიაც ერთ-ერთი იყო, ვინც ხელაღებით აკრიტიკებდა „ფარას“ კანონის მიღებას საქართველოში, რომლის ინიცირებასაც ახლა თავად უჭერს მხარს უკრაინაში. იონათამიშვილის თქმით, აქედანაც ჩანს „ომის პარტიის“ ადამიანების ორმაგი სტანდარტი და რეალური სახე, ამდენად, ჩვენი რადიკალური ოპოზიცია ვალდებულია, ან გააპროტესტოს უკრაინაში ე.წ. რუსული კანონის ინიცირება, ან ბოდიში მოუხადოს ჩვენს საზოგადოებას მარტში შეგნებულად შეცდომაში შეყვანაში.

პოლიტოლოგი ვახტანგ ძაბირაძე for.ge-სთან საუბრისას აცხადებს, რომ მხოლოდ კანონში არ არის საქმე, კანონი შეიძლება იდეალური იყოს, მაგრამ გააჩნია ქვეყანას, სხვადასხვა ქვეყანაში კანონები სხვადასხვაგვარად მოქმედებს. ასეთი მარტივი არ არის, რომ ჩვენ ავდექით, სიტყვასიტყვით ვთარგმნეთ ამერიკული კანონი და გვიკვირს, ამერიკაში თუ არის კარგი, საქართველოში რატომ არ არის კარგი ეს კანონი? ეს იმიტომ, რომ ამერიკაში სხვა საზოგადოებაა, განვითარების სხვა დონეა, სისტემა სხვაგვარადაა მოწყობილი, ინსტიტუტები დამოუკიდებელია, მათ შორის, სასამართლო დამოუკიდებელია, არის დამოუკიდებელი პარლამენტი, რომელიც პრეზიდენტს არ ექვემდებარება, ერთმანეთს აზღვევენ ეს სტრუქტურები, რომ რომელიმე მათგანი არ გადაიქცეს ტოტალიტარული ან ავტორიტარული მმართველობის საყრდენად.

„ამიტომ კანონმა, რომელიც ამერიკაში კარგად მუშაობს, საქართველოში შეიძლება სულაც არ იმუშაოს კარგად. ასე რომ არ იყოს, მაშინ მთელი მსოფლიოს დემოკრატიული ნაწილი შექმნიდა ერთ პარლამენტს, გენიოსებით დააკომპლექტებდა და ეს გენიოსები ყველა ქვეყნისთვის საერთო კანონს გამოაცხობდნენ. რეალურად, ყველა ქვეყანას საკუთარი პარლამენტი იმიტომ ჰყავს, რომ ამ გენიოსების მიერ შედგენილი ზოგადი პრინციპები თავიანთი ქვეყნის რეალობას მოარგონ. მე არ ვიცი, რა ხდება უკრაინაში, თუმცა მეეჭვება, ისეთი კანონის მიღების შემთხვევაში, რაც საქართველოში უნდა მიეღოთ, კანონი ისევე იმუშავებს, როგორც ამერიკაში ან ევროკავშირის ქვეყნებში მუშაობს. უნდა ვნახოთ, რას მისცემს ეს კანონპროექტი უკრაინას“, -აღნიშნა ვახტანგ ძაბირაძემ.

საქართველოს სტრატეგიისა და საერთაშორისო ურთიერთობების კვლევის ფონდის ევროპული კვლევების ცენტრის ხელმძღვანელი კახა გოგოლაშვილი მიიჩნევს, რომ არახამიამ ღიად თქვა, ლობიზმის საკონტროლოდ გვჭირდება ეს კანონპროექტიო, ხოლო ის კანონი, რომელსაც საქართველოში იღებდნენ, არ იყო ამერიკული „ფარას“ მსგავსი კანონი და არც ლობიზმის გასაკონტროლებლად სჭირდებოდათ, ის იყო არასამთავრობო ორგანიზაციების დისკრიმინაციისა და მათზე კონტროლის დასამყარებლად.

„არასამთავრობო ორგანიზაციები არ არიან ლობისტური ორგანიზაციები. ლობისტები არიან ორგანიზაციები, რომლებიც რომელიმე ქვეყნის პოლიტიკას ატარებენ, ან რომელიმე ორგანიზაციის ინტერესზე მუშაობენ. მაგალითად, „ჰამასის“ წარმომადგენლობა რომ იყოს თბილისში და ლობირებდეს ჩვენს მთავრობას, ასეთ შემთხვევაში, მისი რეგისტრაცია აუცილებელია, რათა იცოდნენ, ვინ არის, რა არის, საიდან ფინანსდება... არახამიამ კი თქვა ლობიზმის კანონიო, თანაც, ან მიიღებენ ამ კანონს, ან არა, ეს სულ სხვა კანონია, ეს არის ფარასნაირი კანონი“, - აცხადებს კახა გოგოლაშვილი for.ge-სთან საუბრისას და მიიჩნევს, რომ შესაძლოა, ჩვენს ხელისუფლებას კიდევ სურდეს არასამთავრობოების გაკონტროლების შესახებ კანონის მიღება, მაგრამ ვერ მოახერხებენ, რადგან ხალხი ამას არ დაუშვებს.