უკრაინაში რუსეთის შეჭრის შემდეგ ფრთხილი რიტორიკით ცნობილი იენს სტოლტენბერგი ნატოსთვის შეუცვლელი გახდა. მას პოლიტიკურად რთულ დროს უწევდა გენერალური მდივნის პოსტის ჩაბარება. ამდენად, სტოლტენბერგს ნატოს წევრმა 31 ქვეყანამ თანამდებობაზე დარჩენის თხოვნით მიმართა და მანაც გაიზიარა მათი თხოვნა. 1-ელი ოქტომბრის ნაცვლად, როცა სტოლტენბერგს ნატოსთან კონტრაქტი ეწურება, ის ამ პოსტს კიდევ ერთი წლით შეინარჩუნებს.

არადა, მის შესაძლო მემკვიდრეებად დანიის პრემიერი მეტე ფრედერიკსენი და ბრიტანეთის თავდაცვის მინისტრი ბენ უოლესი განიხილებოდნენ.

ნორვეგიელი პოლიტიკოსი, ნორვეგიის ყოფილი პრემიერ- მინისტრი სტოლტენბერგი ნატოს შტაბ-ბინას 2014 წლიდან უდგას სათავეში. თავის დროზე სტოლტენბერგის კანდიდატურა ნატოს გენმდივნის პოსტზე ანგელა მერკელმა წარადგინა.

ზოგიერთი მიიჩნევს, რომ სტოლტენბერგი ზედმეტად ფრთხილი ადამიანია, სწორედ ამის გამოა, რომ ნატო ვერ აძლევს იმდენ დახმარებას უკრაინას, რომ რუსეთს საკუთარ ტერიტორიაზე შეუტიოს.

„მართვის სტრატეგიული ინსტიტუტის“ ხელმძღვანელის პეტრე მამრაძის აზრით, სტოლტენბერგი საინტერესო პიროვნებაა. სხვათა შორის, მამამისი ნორვეგიის პრემიერ-მინისტრი იყო, მერე იენს სტოლტენბერგი გახდა პრემიერ-მინისტრი.

პეტრე მამრაძე საინტერესო შემთხვევას იხსენებს, რომ ნატოს ახლანდელი გენმდივანი სტოლტენბერგი სანამ პოლიტიკური პარტიის წევრი იყო, მას ჰყავდა რუსი განუყრელი მეგობარი, ჟურნალისტი, კგბ-ს მზვერავი, რომელიც როცა გაიქცა დასავლეთში და გაიტანა მასალები, აღმოჩნდა, რომ კგბ-ს დოსიეში სტოლტენბერგიც არსებობდა, როგორც ინფორმატორი, ზედმეტსახელად, „სტეკლოვ“. ნორვეგიაში ამის გამო სასამართლო გაიმართა, სასამართლოზე სტოლტენბერგმა თქვა, „მე ეს ადამიანი საუკეთესო მეგობარი მეგონა, არ ვიცოდი, თუ კგბ-ს აგენტი იყო, მე ყველაფერს ვუყვებოდი, მაგრამ არასდროს არ ვფლობდი საიდუმლო ინფორმაციას, რადგან მასზე წვდომა არ მქონდა“. კი ბატონო, კგბ-ში ჩაითვალა, რომ ძალიან საინტერესო ინფორმატორი იყო სტოლტენბერგი, მაგრამ მან ამის შესახებ არაფერი იცოდა. სასამართლომ გაამართლა სტოლტენბერგი და ამ ინციდენტმა იოტისოდენად არ შეუშალა ხელი პოლიტიკურ კარიერაში.

„სტოლტენბერგს არავინ წამოაძახა, შენ ის კაცი არ ხარ, კგბ-ს დოსიეში რომ აღმოჩნდი და გაგასამართლეს?! წარმოიდგინეთ, საქართველოში რა მოხდებოდა. სტოლტენბერგი მტკიცე ადამიანი და გამოცდილი პოლიტიკოსია. მაგალითად, გაეროს გენერალური მდივანი გუტიერეში გამოდის და ამბობს, რომ გაერომ დაკარგა თავისი აზრი და ძირითადი ფუნქცია. მართლაც ასეა, აგერ, უშიშროების საბჭოში კვლავაც მუდმივ წევრად ჰყავთ რუსეთი, თავისი ვეტოს უფლებით. ნატოში კი სულ სხვაგვარადაა ვითარება. სტოლტენბერგმა ძალიან კარგად იცის საზღვარი, რომლის იქით ის, როგორც გენმდივანი ვერ მოახდენს ზეწოლას ვერც საფრანგეთზე, ვერც გერმანიაზე, ვერც ესპანეთზე, ვერც ბრიტანეთზე, ვერ ეტყვის, რომ საწევრო საკმარისი არ არის და ცოტა მეტი თანხა გაიღეთო. სტოლტენბერგი დიპლომატია, მან კარგად იცის, როგორი განწყობაა ამ ქვეყნების მოსახლეობაში, რომ ისედაც ზღვარზე არიან ლიდერები, ხომ არ გგონიათ, საფრანგეთში ვინმეს უნდა რუსეთთან კონფლიქტი, მიკვირს, ამდენს მაინც რომ ახერხებენ უკრაინის დასახმარებლად. სტოლტენბერგი ახერხებს, რომ წევრ ქვეყნებში კონფლიქტს არ იწვევს. ნატოს წევრი ქვეყნების პრეზიდენტებს და პრემიერებს რომ უწევთ სტოლტენბერგთან ურთიერთობა, ისინი რწმუნდებიან, რომ ეს არის ადამიანი, რომელიც რადიკალი არაა, რეალისტია და ოპტიმალურად აკეთებს ყველაფერს“, - აცხადებს პეტრე მამრაძე for.ge-სთან საუბრისას.

ანალიტიკოსი იმასაც იხსენებს, რომ რუსეთის ჯარის გაქცევისას სტოლტენბერგმა თქვა, არავის ეგონოს, ეს ომი მალე დამთავრდება, რუსეთს აქვს ის რესურსი, ომი გაგრძელდეს საკმაოდ დიდხანს, თუნდაც წლები. პეტრე მამრაძის თქმით, სტოლტენბერგი აპირებს დაეხმაროს უკრაინას, სანამ უკრაინა არ გათავისუფლდება ყირიმის ჩათვლით, როგორც ეს უკრაინელ ხალხს უნდა.

ყოფილი სახელმწიფო მინისტრი პაატა ზაქარეიშვილი მიიჩნევს, რომ სტოლტენბერგი წარმატებული გენერალური მდივანია, ძალიან პრინციპული, ღირებულებებზე დაფუძნებული ხედვები აქვს. ამდენად, კარგია, რომ ის რჩება ნატოს გენმდივნის პოსტზე.

„მე არ ვიცი, ვინ შეიძლება იყოს მისი შემცვლელი, თუ არა სტოლტენბერგი, რადგან მან კარგად გაართვა თავი საქმეს. ვიდრე უკრაინის ომი არ დასრულდება, მანამდე ის უნდა იყოს ნატოს თავმჯდომარე, რადგან საამისო გამოცდილება გააჩნია. ნატოს სიფრთხილეზე როცა საუბრობენ რუსეთის მიმართ, უნდა გვახსოვდეს, რომ ნატოს თავმჯდომარე არ არის გადამწყვეტი ფიგურა, თავმჯდომარე ანგარიშს უწევს ნატოში გაწევრიანებული სახელმწიფოების ინტერესებს. როგორც ჩანს, სტოლტენბერგი წარმატებით ართმევს თავს კოორდინაციას, ამიტომაც უნდათ ხელახლა დატოვონ“, - აღნიშნა პაატა ზაქარეიშვილმა ჩვენთან საუბრისას.

მისი აზრით, სტოლტენბერგის წინამორბედ რასმუსენს თავისი ხედვები ჰქონდა, სტოლტენბერგს თავისი, ისინი ერთმანეთს ავსებენ და აგრძელებენ. უფრო მეტიც, ხავიერ სოლანამ დაიწყო ახალი პოლიტიკა ნატოში და სოლანას პოლიტიკა ნატოში უკვე დიდი ხანია გრძელდება. ეს არის ახალი ევროპული სტანდარტების პოლიტიკა, მიუხედავად იმისა, რომ ტრამპისნაირი პოლიტიკოსები ამბობდნენ, თითქოს ნატო მოძველდა.