„კიდევ ბევრია საცემი“, - მიიჩნევს ფრიდონ ინჯია და „ნაციონალების“ ცნობილი ლოზუნგის - „გასაკეთებელი კიდევ ბევრია“ პერიფრაზს ახდენს.

ფრიდონ ინჯიას აზრით, ბოლო პერიოდში მომხდარი ცემისა და ძალადობის ფაქტები ადასტურებს, რომ აუცილებელია „ცილისწამებისა და შეურაცხყოფის“ შესახებ კანონის მიღება, რისთვისაც ინჯია „ქართულ ოცნებას“ მხარდაჭერას სთხოვს.

„ბოლო პერიოდში იცემა მშვილდაძე, ბერძენიშვილი, ჯაფარიძე, ქუთელია და ამ სიას პარლამენტის წევრები შეიძლება შეემატონ. თუ იქნება ასეთი კანონი, რომელიც შეურაცხყოფას და ცილისწამებას აკრძალავს, თუნდაც უწმინდესის მიმართ, შეიძლება ეს სია შემცირდეს და საერთოდ არ იყოს“, - მიიჩნევს „ევროპელი სოციალისტების“ თავმჯდომარე ფრიდონ ინჯია.

მიშა მშვილდაძის ცემის ფაქტს ეხმაურება „ქართული ოცნების“ თავმჯდომარე ირაკლი კობახიძე, რომელიც აცხადებს, რომ მშვილდაძემ თავის თავს უნდა მიხედოს, კაცი, რომელიც ყოველი ფეხის ნაბიჯზე დედას იგინება, მერე ამაზე იღებს პასუხს. კობახიძის აზრით, პირველ რიგში, მიშა მშვილდაძე საკუთარ თავს უნდა ადანაშაულებდეს, მშვილდაძეს აქვს პოლიტიკური მიზანი, როცა ასეთ განცხადებებს აკეთებს, მან საკუთარ გულში უნდა ჩაიხედოს, როცა შეურაცხყოფას აყენებდა უამრავ ადამიანს თავის გარშემო, ისიც არის პოლარიზაციის ერთ-ერთი მთავარი გამღვივებელი.

„გირჩი“ ზურაბ ჯაფარიძე ცემა-ტყეპასთან დაკავშირებით საკუთარ დაკვირვებას უზიარებს საზოგადოებას. ის ფიქრობს, რომ განსაკუთრებით უტევენ მათ, ვისაც ახალგაზრდები უსმენენ, რადგან თავად „ქართულ ოცნებას“ კატასტროფული მდგომარეობა აქვს ახალი თაობის მხარდაჭერის მხრივ. ასე დაიწყეს ლევან ბერძენიშვილით და გააგრძელეს სხვებით.

„მართვის სტრატეგიული ინსტიტუტის“ ხელმძღვანელი პეტრე მამრაძე საქართველოში გახშირებული ცემა-ტყეპის უკან ვანო მერაბიშვილის ხელწერას ხედავს, ცალკეულ შემთხვევათა გამოკლებით.

„გაიხსენეთ სააკაშვილის ცნობილი მოწოდება ნიკა გვარამიას მიმართ, „უნდა მოკვდეს ქალი“, შემდეგ პაუზაა და სააკაშვილი აგრძელებს, „სასურველია ორსული იყოს“. ეს ქართველ ქალს ეხებოდა, ზოგადად, ვიღაც ქართველ ქალს, მოძებნეთ, მოკალით და აჩვენეთ ტელევიზიით, რომ მთავრობამ მოკლაო. ახლა რომ გაილახნენ მიშა მშვილდაძე, ლევან ბერძენიშვილი და სხვები, იშვიათი გამონაკლისის გარდა, მე ამაში პირდაპირ დავინახე მერაბიშვილის ხელწერა“, - აცხადებს პეტრე მამრაძე for.ge-სთან საუბრისას.

მისივე აზრით, „ნაციონალები“ ყოველთვის თვითონვე აწყობდნენ პროვოკაციებს, ჯერ როცა მოდიოდა სააკაშვილი, ზუგდიდში ნიღაბი რომ ჩამოხსნეს, ეს ყველაფერი მათი დადგმული იყო: „7-8 მარტის საპროტესტო აქციებისას ძალიან მეშინოდა, ყველას ვეუბნებოდი, ხალხო, ფრთხილად იყავით, სადმე გვამი არ გამოაგდონ „ნაცებმა“, თვითონ მოკლავენ ვინმეს და იტყვიან, აგერ, ნახეთ, მთავრობამ რა ქნა. თუმცა, მადლობა ღმერთს, ასეთი მძიმე დანაშაული „ნაცებმა“ ვერ გაბედეს“.