რაში სჭირდება ოპოზიციას მოსამართლეების თემასთან დაკავშირებით საგამოძიებო კომისიის შექმნა და არის თუ არა ეს ამერიკის მხრიდან ოპოზიციისთვის ჩაწოდებული „სატოპკე“ თემა? საქართველოში ამერიკის ელჩმა კელი დეგნანმა პირდაპირ თქვა, რომ საგამოძიებო კომიისის შექმნა მათი ინიციატივაა.
„სტრატეგია აღმაშენებლის“ ლიდერს გიორგი ვაშაძეს კი მარტის მოვლენების გამეორების სურვილი გაუჩნდა. ხელისუფლების მხრიდან ქვორუმის მესამედ ჩაგდების შემდეგ, ვაშაძემ ხალხს მოუწოდა, რომ „მოდით, გავშალოთ ფრონტი, ღიად ვთქვათ, არა კლანს სასამართლოში, საზოგადოების პროტესტის გარეშე ისინი უკან არ იხევენ“, - აღნიშნავს ვაშაძე.
მის ამ ინიციატივას სკეპტიციზმით თავად ოპოზიციაში შეხვდნენ. „გირჩის“ ლიდერს, იაგო ხვიჩიას არ სჯერა, რომ ვაშაძის დაძახებულზე ხალხი ქუჩაში გამოვა.
„აქციების წინააღმდეგი არ ვარ, მაგრამ ნაკლებად მჯერა, რომ ვაშაძის მიერ მოწოდებული აქციებით სასამართლო რეფორმა მოხდება“, - ამბობს იაგო ხვიჩია.
საპარლამენტო უმრავლესობის ლიდერი, „ქართული ოცნება-დემოკრატიული საქართველოს“ თავმჯდომარე, ირაკლი კობახიძე აცხადებს, რომ ოპოზიციის მხრიდან არის უხეში მცდელობა, ჩაერიონ სასამართლოს დამოუკიდებლობაში და კომისიის შექმნის ინიციატივაც სწორედ ამას უკავშირდება.
„კოლექტიური „ნაციონალური მოძრაობა“ ვერანაირად ვერ შეძლებს ქუჩაში ხალხის მობილიზებას. მით უმეტეს ისეთ თემასთან დაკავშირებით, რაზეც სწორედ ხალხს აქვს სათანადო რეაქცია, რომელიც უკმაყოფილებას უკავშირდება. არის ძალიან უხეში მცდელობა, ჩაერიონ სასამართლოს დამოუკიდებლობაში და კომისიის შექმნის ინიციატივაც სწორედ ამას უკავშირდება.
ჩვენთვის შეურაცხმყოფელი იყო მოსამართლეების დასანქცირება. ეს იყო უხეში ნაბიჯი ქართული სახელმწიფოს წინააღმდეგ, ყოველგვარი მტკიცებულებების გარეშე მოსამართლეთა დასანქცირება. აქედან გამომდინარე, ჩვენ სხვა ალტერნატივა არ გვაქვს“, - ამბობს კობახიძე.
ანალიტიკოსი ზაალ ანჯაფარიძე for.ge-სთან აცხადებს, რომ ხელისუფლების მხრიდან საგამოძიებო კომისიის
შექმნის ხელშეშლას ლოგიკური მიზეზები აქვს. ცხადია, ის ოპოზიციას ამის საშუალებას არ მისცემს. ანჯაფარიძის თქმით, საკმარისი ინფორმაცია დაგროვდა იმის სათქმელად, რომ მოსამართლეების დასანქცირება მრავალმოქმედებიანი ოპერაციის პირველი ნაწილია. ამიტომ სავსებით გასაგებია, რომ ამ სანქციების უკან მხოლოდ მოსამართლეების დასანქცირება არ დგას და რეალურად სრულიად სხვა მიზნები იკითხება.
„ამერიკელების მენტალობას ვინც იცნობს, ყველამ კარგად იცის, რომ ისინი რაღაცას როცა აკეთებენ, იმას აუცილებლად პოლიტიკური და სოციალური შედეგი უნდა მოჰყვეს. შესაბამისად, ამერიკელებისთვის მოსამართლეების დასანქცირება მხოლოდ ტექნიკური მხარეა. ისინი ამ აქტიდან უფრო სხვას მოელიან. ფიქრობენ, რომ ამას საქართველოში პოლიტიკური რეზონანსი მოჰყვება. ის განცხადებები, რაც ამერიკის ელჩმა კელი დეგნანმა გააკეთა, ცხადყოფს, რომ მოსამართლეების დასანქცირება მისი ინიციატივა ყოფილა და ის ერთ-ერთი მოქმედი პირია. მან თქვა, რომ ამ საგამოძიებო კომისიის შექმნის უკან აშშ-ს ინტერესი იკვეთება და პირდაპირ დააფიქსირა, რომ მათი სურვილია ეს კომისია შეიქმნას.
დავინახეთ ამის შემდეგ ოპოზიცია როგორი მობილიზებული გახდა და ერთმანეთთან როგორ თანამშრომლობენ. დიდი ალბათობით, ოპოზიციის ამ ორგანიზებას კურატორობას ამერიკის საელჩო უწევს. ოპოზიცია როგორც საელჩოს დაკვეთის გულმოდგინე შემსრულებელი, ისე გვევლინება. იქიდან წამოვიდა სურვილი, რომ დასანქცირებას აუცილებლად გაგრძელება მოჰყვეს. ამერიკელებმა უთხრეს, რომ ჩვენ ჩვენი გასაკეთებელი უკვე გავაკეთეთ და ახლა თქვენი ჯერიაო. ჩემი აზრით, ყველაფერი ხელისგულზე დევს. ის შესაფუთი მასალა, რომ ეს სასამართლოს დამოუკიდებლობას და მის რეფორმას ემსახურება, მხოლოდ იმ პოლიტიკური მიზნების შეფუთვას ემსახურება, რა მიზნების მიღწევაც ოპოზიციას სურს და კოლეტქიურ დასავლეთს“, - ამბობს ანჯაფარიძე.
რაც შეეხება იმას, რამდენ ხანს გაძლებს ხელისუფლება და ოპოზიცია ამ რეჟიმში და ქვეყანამ რა შეედეგი შესაძლოა მიიღოს, ანჯაფარიძე ფიქრობს, რომ ეს დამოკიდებული იქნება იმაზე, ოპოზიციას რესურსი რამდენ ხანს ეყოფა გააგრძელოს ეს ქმედება და ასევე, ხელისუფლებას როდის ჩაუვარდება შესაძლებლობა, რომ ოპოზიცია 50 კაცით არ იყოს პარლამენტში წარმოდგენილი. ეს საკითხი გამოიტანოს, რის შემდეგაც მას ჩააგდებს და 6 თვის შემდეგ ოპოზიციას საგამოძიებო კომისიის ხელახლა პარლამენტში გატანა აღარ შეეძლება.
„ხელისუფლებისთვის საგამოძიებო კომისიის შექმნა პრობლემური იმიტომ არის, რომ მის უკან პოლიტიკური მიზნები დგას. გვახსოვს, ალბათ, ე.წ. ხორავას საქმის გამოძიება, რომელიც პირდაპირ ეთერში გადაიცემოდა. ხელისუფლებამ მაშინ ძალიან სერიოზული რეპუტაციული დარტყმა მიიღო. ახლა კი გაცილებით უფრო სერიოზულად არის საქმე. სასამართლო სისტემის რეფორმა ერთ-ერთ რეკომენდაციად გვაქვს მოცემული. თუკი საგამოძიებო კომისიით გაირკვევა, რომ სასამართლო სისტემა კორუმპირებულია, ჩამოშლილია, არ არის დამოუკიდებელი და პოლიტიკურ დაკვეთებს ასრულებს, გამოდის, რომ ერთ-ერთი მთავარი რეკომენდაცია შეუსრულებელია. რატომ უნდა მისცენ კანდიდატის სტატუსი ისეთ ქვეყანას, სადაც სასამართლო დამოუკიდებელი არ არის? მეორე ფაქტორი ისაა, რომ ამ საგამოძიებო კომისიის გაშვება პირდაპირ ეთერში მოხდება. დაიბარებენ პროკურორებს, მოსამართლეებს, არასამთავრობო ორგანიზაციების წარმომადგენლებს. წარმოიდგინეთ, ოპოზიცია ამით როგორ პოლიტიკურ პერფორმანსს გამართავს და კიდევ ერთი შანსი მიეცემა იმისთვის, რომ ხელისუფლების დელეგიტიმაცია მოითხოვოს. მეორე მხრივ, საზოგადოებაში საპროტესტო ტალღა ააგორონ და თქვან, რომ 12-პუნქტიანი გეგმა ვერ სრულდება. ყველაფერი იქით წავა, რომ ოპოზიცია საბოლოოდ ხელისუფლების შეცვლას მოითხოვს“, - ამბობს ანჯაფარიძე.
მოახერხებს თუ არა ოპოზიცია დაანონსებული აქციების მობილიზებას ამ თემის გარშემო, ანალიტიკოსი ვახტანგ ძაბირაძე for.ge-სთან ფიქრობს, რომ ვერ შეძლებს. მისი აზრით, ეს არ არის ის საკითხი, რომლის გამოც სააქართველოს მოსახლეობა ქუჩაში გამოვა.
„ისეთი შთაბეჭდილება მრჩება, რომ ოპოზიცია ზედმეტ ინიციატივებს იჩენს. ისეთ რაღაცებს ლაპარაკობენ და აანონსებენ, რისი თავიც, ყველამ ვიცით, რომ არა აქვთ, განსაკუთრებით ვაშაძე, რომელიც წამდაუწუმ გამოდის და რაღაც იდეებს ისვრის ისე, რომ დარწმუნებული ვარ, კონსულტაციები არავისთანაც არ ჰქონია. თავადაც არ არის მზად ასეთ აქციებს წარუძღვეს. თუ მას ხალხის გარეთ გამოყვნა შეუძლია, პარტია აქვს და მოუწოდოს თავის მხარდამჭერებს, შეიკრიბონ პარლამენტის წინ და შეუქმნან ხელისუფელბას დისკომფორტი, მაგრამ ამის თავი რომ არ აქვს, ხომ ყველამ ვიცით. ეს თემა არ არის იმ დონის, რომ საზოგადოებაში სეროზული პროტესტი მოჰყვეს. ეს არ არის მარტის მოვლენები, მაშინ ოპოზიციამ კი არ გამოიყვანა ხალხი, თავად ხალხი გამოვიდა და ოპოზიცია, უბრალოდ, მათ მისდევდა. ვაშაძე ასეთი ინიციტივით რომ გამოდის, ვის იმედად? ეს კაცი ზედმეტად აქტიურია და თან ფუჭად, არაფრის მომტანი. უფრო საზიანო, ვიდრე სასარგებლო და რატომ ვერ ხვდება ამას, არ ვიცი. თუ რაღაცას აპირებდნენ, ჯერ ამდენი ხანი სად იყვნენ?! ხელისუფლებამ ადრევე განაცხადა, რომ ამ კომისიის შექმნის უფლებას ოპოზიციას არ მისცემდა“, - ამბობს ძაბირაძე.
მისივე თქმით, პარლამენტში ოპოზიცია 50 კაცამდეა წარმოდგენილი, ამიტომ სულ თავსუფლად შეუძლიათ დასხდნენ და მოიფიქრონ, რა უნდათ. ძაბირაძე ამბობს, რომ ოპოზიციას მხოლოდ ის შეუძლია ხალხს აჩვენოს, თავად რისი თავი აქვს. „გაუძლონ და გაათენონ პარლამენტში. ჩაატარონ საგაზახულო სესია ამ ფორმით. აჩვენონ ხალხს, რომ პრინციპულები არიან და ხელისუფლებას წინააღმდეგობას უწევენ. სხვა გამოსავალი არ აქვთ. ხალხისთვსი დღევანდელი სასამართლო არ არის ისეთი კატასტროფული, რომ ამის გამო ქუჩაში გამოვიდნენ. ჩვენი მენტალობა პოსტსაბჭოთა ქვეყნის არის, სადაც კორუფცია ყოველდღიური ჩვეულება იყო. დღევანდელი ქართველის გადმოსახედიდან კი სიტუაცია ასეთი სავალალო არაა. გახარიას დავესესხები „ქართულ ჯიგრულ პონტში“ ვიღაცა რაღაცას იღებს, მერე რა! თანაც ხელსიუფლება ამბობს მურუსიძე „გამოსწორდა“ და თავისუფალი გახდაო. ამიტომ ამ თემაზე რაღაცა საპროტესტო ტალღის აგორება გამორიცხულია“, - ამბობს ძაბირაძე.
