ყაზახეთის პრეზიდენტმა, ყასიმ-ჟომართ თოყაევმა განაცხადა, რომ ქვეყანაში განვითარებული მოვლენები სახელმწიფო გადატრიალების მცდელობა იყო.
„სტიქიური პროტესტის საფარქვეშ მასობრივი არეულობების ტალღა მივიღეთ. გამოჩნდნენ რელიგიური რადიკალები, კრიმინალური ელემენტები, საშინელი ბანდიტები, მაროდიორები და ხულიგნები. სოციალურ-ეკონომიკური და საზოგადოებრივ-პოლიტიკური მოთხოვნები კი დაავიწყდათ“, - აღნიშნა ყაზახეთის პრეზიდენტმა.
ყასიმ-ჟომართ თოყაევის თქმით, ხელისუფლებამ მოისმინა და შეასრულა მომიტინგეების სოციალურ-ეკონომიკური და საზოგადოებრივ-პოლიტიკური მოთხოვნები.
„ამის შემდეგ, შეიარაღებული პირების ჯგუფმა მოქმედება დაიწყო. აშკარა გახდა მათი მთავარი მიზანი: საკონსტიტუციო წყობის შერყევა, ინსტიტუტების განადგურება და ხელისუფლების ხელში ჩაგდება. საუბარია სახელმწიფო გადატრიალების მცდელობაზე“, - განაცხადა ყაზახეთის პრეზიდენტმა.
ყაზახეთის პრეზიდენტმა ასევე აღნიშნა, რომ ქვეყანაში არეულობები დიდი ხნის განმავლობაში მზადდებოდა.
ყაზახეთის ჯანდაცვის სამინისტრო იუწყება, რომ ქვეყანაში ბოლო დღეების განმავლობაში არეულობის შედეგად 164 ადამიანი დაიღუპა. ყაზახეთში 10 იანვარი გლოვის დღედ გამოცხადდა.
ყაზახეთის პრეზიდენტის განკარგულებით, შეიარაღებულ ძალებს უფლება აქვთ „ტერორისტებს“ ცეცხლი გაფრთხილების გარეშე გაუხსნან. როგორც თოყაევმა განაცხადა, ხელისუფლება მკვლელებთან მოლაპარაკებებს არ აპირებს. მისივე თქმით, ალმათიში „ბანდიტებისა და ტერორისტების ხელით“ დაშავდა და გარდაიცვალა ასობით სამოქალაქო პირი და სამხედრო.
მასობრივი არეულობის ფონზე, ყაზახეთის ხელისუფლებამ ქვეყნის მთელ ტერიტორიაზე საგანგებო მდგომარეობა გამოაცხადა. 5 იანვარს, სომხეთის პრემიერ-მინისტრმა, ნიკოლ ფაშინიანმა განაცხადა, რომ კოლექტიური უსაფრთხოების ხელშეკრულების ორგანიზაციის საბჭომ გადაწყვეტილება მიიღო, ყაზახეთში კოლექტიური სამშვიდობო ძალები გააგზავნოს. 6 იანვარს, რუსეთმა ყაზახეთში სამხედრო ძალების გადასროლა დაიწყო. კოლექტიური სამშვიდობო ძალების კონტინგენტში რუსეთის, ბელარუსის, სომხეთის, ტაჯიკეთისა და ყირგიზეთის დანაყოფები შედიან.
