ბელარუსის ტერიტორიიდან არალეგალი მიგრანტების ჯგუფმა პოლონეთთან საზღვარზე ფიზიკური ბარიერის გარღვევა სცადა. ინფორმაციას ამის შესახებ სააგენტო Reuters-ი ავრცელებს.
პოლონელ მესაზღვრეებს სპეციალური საშუალებების გამოყენება მოუწიათ.
დღეს, სპეცსამსახურების კოორდინატორი მინისტრის პრესმდივანმა, სტანისლავ ჟარინმა განაცხადა, რომ პოლონეთმა ბელარუსის მხრიდან არალეგალი მიგრანტების მიერ პოლონეთის საზღვრის შტურმის მომზადება დააფიქსირა.
ლიეტუვა და პოლონეთი ბელარუსთან საზღვრის გასწვრივ მავთულხლართებს აგებენ, რათა მიგრანტების ნაკადი შეაჩერონ, რომლის ორგანიზებაშიც ბრალს ლუკაშენკოს რეჟიმს სდებენ.
29 ოქტომბერს, პოლონეთის პარლამენტმა ბელარუსთან საზღვარზე კედლის მშენებლობის გადაწყვეტილება დაამტკიცა. პოლონეთი ბელარუსთან საზღვარზე სამხედროების რაოდენობას 10 ათასამდე გაზრდის. 7 სექტემბერს, მიგრანტების ნაკადის ზრდის ფონზე, პოლონეთმა ბელარუსთან საზღვარზე საგანგებო მდგომარეობა გამოაცხადა.
