რადიკალურმა მოძრაობა „თალიბანმა“ ავღანეთში ამნისტია გამოაცხადა და ქალებს მოუწოდა, ახალ მთავრობას შეუერთდნენ. შესაბამისი განცხადება „თალიბანის“ კულტურის კომისიის წევრმა, ენამულა სამანგანმა გააკეთა.
„ისლამურ საამიროს არ სურს, რომ ქალები მსხვერპლნი გახდნენ. შარიათის კანონის შესაბამისად, ისინი სამთავრობო სტრუქტურაში უნდა იყვნენ. მთავრობის სტრუქტურა ბოლომდე არ არის მკაფიო, მაგრამ გამოცდილებიდან გამომდინარე, უნდა არსებობდეს სრულად ისლამური ხელმძღვანელობა და ყველა მხარე უნდა შეუერთდეს მას“, - აღნიშნა ენამულა სამანგანმა.
15 აგვისტოს „თალიბანის“ წევრები ქაბულში შევიდნენ. ამის შემდეგ აშშ-ის საელჩოდან დიპლომატების ევაკუაცია ვერტმფრენით განხორციელდა. ავღანეთის პრეზიდენტი აშრაფ ღანი ტაჯიკეთში გაიქცა.
1-ელ მაისს შეერთებულმა შტატებმა ავღანეთიდან ჯარის გაყვანა ოფიციალურად დაიწყო. 14 აპრილს აშშ-ის პრეზიდენტმა, ჯო ბაიდენმა ავღანეთიდან ამერიკული ჯარების გამოყვანა გამოაცხადა.
ავღანეთის პრეზიდენტმა, აშრაფ ღანიმ ქვეყანაში უსაფრთხოების მკვეთრად გაუარესებული მდგომარეობა აშშ-ის მიერ ჯარების გაყვანის მოულოდნელ გადაწყვეტილებას დაუკავშირა.
