ბელარუსში დაკავებული ჟურნალისტი, რომან პროტასევიჩი და მისი მეგობარი გოგო, სოფია საპეგა შინაპატიმრობაში გადაიყვანეს. ინფორმაციას ამის შესახებ ტელეკომპანია BBC-ი ავრცელებს.
რომან პროტასევიჩის მამამ BBC-ის განუცხადა, რომ მისი შვილი შინაპატიმრობაში იმყოფება.
„ჩემთვის რთულია კომენტარი გავაკეთო ხელისუფლების ქმედებებზე, თუ რა მიზნები აქვს მას. შესაძლოა პოლიტიკური თამაში მიმდინარეობს“, - აღნიშნა დიმიტრი პროტასევიჩმა.
მისი თქმით, რომან პროტასევიჩისა და სოფია საპეგასთვის წაყენებული ბრალდებები არ მოუხსნიათ.
23 მაისს Ryanair-ის თვითმფრინავი, რომელიც ათენიდან ვილნიუსში რეისს ასრულებდა, ბორტზე ბომბის არსებობის შესახებ შეტყობინების გამო მინსკში დაეშვა. მოგვიანებით გაირკვა, რომ ეს ინფორმაცია არ დადასტურდა. ამასთან, რეისის ერთ-ერთი მგზავრი, ოპოზიციურად განწყობილი ბელარუსი ჟურნალისტი, რომან პროტასევიჩი დააკავეს.
25 მაისს ევროკავშირის სამიტმა ბელარუსის წინააღმდეგ სანქციების გაფართოების გადაწყვეტილება მიიღო.
