ის არის ძალიან გამოცდილი ადამიანი, ძალიან გამოცდილი გუნდის წევრი და უნდა გითხრათ, რომ საოცარი აღფრთოვანება გამოიწვია ჩვენი გუნდის ძველ და ერთგულ წევრებში ისევე როგორც აბსოლუტური ერთსულოვანი იყო მხარდაჭერა უმრავლესობის წევრებისგან, - ამის შესახებ პარლამენტის თვითმმართველობის კომიტეტის თავმჯდომარემ, სოზარ სუბარმა ირაკლი ღარიბაშვილზე საუბრისას განაცხადა.

„ირაკლი ღარიბაშვილი არის ჩვენი პარტიის დამფუძნებელი პირველი წუთიდან, როცა დაიწყო „ქართული ოცნების" ფორმირება და ჩამოყალიბება, ის იყო ჩვენი ერთ-ერთი მთავარი ბურჯი, მთავარი თანამებრძოლი ჩვენი. მის სახელს უკავშირდება ყველაზე დიდი რამ ალბათ, რაც ბოლო პერიოდში ჩვენი ქვეყნის ისტორიაში მომხდარა - ეს არის ასოცირების ხელშეკრულება ევროკავშირთან და თავდაცვის მინისტრად ყოფნის პერიოდში, მან ეს ხაზი გააგრძელა უკვე ნატოსთან ინტეგრაციის მიმართულებით“, - განაცხადა სოზარ სუბარმა.

„ქართულმა ოცნებამ“ პრემიერ-მინისტრობის კანდიდატად ირაკლი ღარიბაშვილი წარადგინა.

გიორგი გახარიამ პრემიერ-მინისტრის თანამდებობა დატოვა.