ცესკოს წინასწარი მონაცემებით, „ქართულმა ოცნებამ“, პროპორციული წესით, ხმების 48.15% მიიღო. ამ შედეგით, პარტია, ჯამში, პარლამენტში 90 დეპუტატზე მეტს ვერ შეიყვანს - ყველა მაჟორიტარული ოლქის მოგების შეთხვევაში, სავარაუდოდ, პროპორციული მანდატებიდან ერთი მანდატის მოკლება მოუწევს. აქ ე.წ. „ჩამკეტი მექანიზმი“ მოქმედებს.

კონსტიტუციითა და საარჩევნო კანონმდებლობით განსაზღვრული ეს ფორმულა იმას ნიშნავს, რომ თუკი არჩევნების საბოლოო შედეგით, „ქართული ოცნების“ 48.15% (61 პროპორციული მანდატი) არ შეიცვალა და ამავდროულად, სახელისუფლებო პარტიამ 30-ვე მაჟორიტარული ოლქი მოიგო, პარლამენტში 91-ის ნაცვლად, 90 დეპუტატით იქნება წარმოდგენილი. მანდატი მას პროპორციული საარჩევნო სიიდან ჩამოაკლდება. საპარლამენტო არჩევნების მეორე ტურს, რომელიც 16 ოლქში უნდა გაიმართოს, ოპოზიციამ ბოიკოტი ერთსულოვნად გამოუცხადა.

მიუხედავად იმისა, რომ ოპოზიცია პარლამენტში შესვლაზე უარს აცხადებს და მეორე ტურს ბოიკოტს უცხადებს, საქართველოს კონსტიტუციის მიხედვით, მეორე ტური მაინც გაიმართება.

კონსტიტუციონალისტ ვახუშტი მენაბდის განცხადებით, ოპოზიციის მხრიდან ბოიკოტის მიუხედავად, ისინი მეორე ტურში კანდიდატურას მაინც ვერ მოხსნიან.

„მიუხედავად იმისა, რომ ოპოზიცია მეორე ტურში მონაწილეობაზე უარს აცხადებს, არჩევნების მეორე ტური მაინც გაიმართება და კანდიდატურასაც ვერ მოხსნიან. ეს კანონით არის გათვალისწინებული. ამ შემთხვევაში უკვე, მათი ამომრჩეველი მოტივირებული აღარ იქნება. როგორც ჩანს, ოპოზციამ ჩათვალა, რომ ასეთი ქმედება პოლიტიკურად ხელსაყრელია, ვიდრე პარლამენტში შესვლა“, - განაცხადა for.ge-სთან საუბრისას ვახუშტი მენაბდემ.

„ევროპული საქართველოს“ წევრი, გიგა ბოკერია ამბობს, რომ ოპოზიციას აქვს ნებისყოფა და რწმენა, მორალურად გატეხონ ივანიშვილი და მისი პოლიტიკური „კლოუნების“ გარემოცვა.

„პირადად მეც და „ევროპული საქართველოს“ გუნდიც ასეთ საკითხებში ძალიან დიდ მნიშვნელობას ვანიჭებდით საპარლამენტო ცხოვრებას და სახელმწიფო ინსტიტუტებში მონაწილეობას, როდესაც უმცირესობაში ხარ. ჩვენ გვაქვს გამოცდილება, როდესაც მწარე მარცხი მიგვიღია, მათ შორის, არალეგიტიმური მეთოდებით. ამის გამო ან ემოციურად, ან რას იტყოდნენ ჩვენი ამომრჩევლები, არ შეგვშინებია ისეთი გადაწყვეტილების მიღება, რომელიც შეიძლება რადიკალურ მომხრეს არ მოეწონოს. ოპოზიციის ერთიანობა არის უმნიშვნელოვანესი არგუმენტები იმისთვის, რომ მოვახდინოთ იზოლაცია ამ ჩვენი ქვეყნისთვის საშიში, პოლიტიკურად მომაკვდინებელი რეჟიმის და ადამიანის, რასაც ბიძინა ივანიშვილი ჰქვია“, - აცხადებს გიგა ბოკერია, რომლის განცხადებით „ევროპული საქართველო“ საპარლამენტო მანდატებზე უარს აცხადებს.

„ევროპული საქართველოს“ მსგავსად, საპარლამენტო მანდატზე უარს ამბობს ახლად შექმნილი პარტია „ლელოც“. პარტიის ერთ-ერთი ლიდერის, ბადრი ჯაფარიძის განცხადებით, არჩევნების შედეგი ქართველი ხალხის ნებას არ ასახავს.

„არჩევნები არის გაყალბებული, არ ასახავს ქართველი ხალხის ნებას. დღეს იმსჯელა პოლიტსაბჭომ და გადაწყვიტა, რომ არ შევა პარლამენტში“, - განაცხადა ბადრი ჯაფარიძემ.

აი, „გირჩი“ კი სხვა ოპოზიციური პარტიების გადაწყვეტილებაზეა დამოკიდებული. თუ სხვები უარს იტყვიან მე-10 მოწვევის პარლამენტის მანდატზე, მაშინ „გირჩიც“ ანალოგიურად იმოქმედებს.

„ქუჩის პროცესები არის კარგი, ეს არის პოლიტიკური წნეხი ხელისუფლებაზე, რომ აღიარონ ჩადენილი დანაშაული. საბოლოო მიზანი არის ვადამდელი არჩევნების მიღება. სრულად ვუერთდები ნებისმიერ მსვლელობას, მათ შორის სისხლის სამართლებრივ პროცესებს, რომ დამნაშავეები დაისაჯონ. მასშტაბური იყო დარღვევები, იყო მოსყიდვა და დაშინებაც“,- განაცხადა ზურაბ ჯაფარიძემ.

მისივე თქმით, მას აქვს „ქეისები“, როგორ გაყალბდა არჩევნები.

„მე მაქვს კონკრეტული „ქეისი“, როგორ გააყალბა ცენტრალურმა საარჩევნო კომისიამ შედეგები. დიდუბე-ჩუღურეთში მე დამაკლდა 100 ხმა და ანა დოლიძეს მოუმატეს 2057 ხმა, რომელიც ჯერ კიდევ არ არის ჩამოკლებული“, - განაცხადა ჯაფარიძემ.

ნინო ბურჯანაძის განცხადებით კი, ოპოზიცია კოორდინირებულად იმოქმედებს. მისივე თქმით, დღეს ოპოზიცია ერთ ენაზე ლაპარაკობს.

„ძალიან მნიშნელოვანია ის, რომ სრულიად ოპოზიცია ლაპარაკობს ერთ ენაზე, ლაპარაკობს ერთი და იგივეს. ტყუილად ნუ ექნება „ქართული ოცნების“ ხელისუფლებას იმედი, რომ ეს არჩევნები რამენაირად ლეგიტიმურად ჩაითვლება, იმიტომ, რომ როცა არც ერთი პარტია პარლამენტში არ შედის და ამაზე განცხადებას ღიად აკეთებს, საქართველოს ეყოლება ჩრდილო კორეის მსგავსი პარლამენტი და ეს დიდხანს ვერ გაგრძელდება. აუცილებლად გაგრძელდება აქციები და პროტესტის ყველა სხვა ფორმა, რომელიც საჭირო იქნება იმისთვის, რომ შეიცვალოს ცენტრალური საარჩევნო კომისია და მოვიპოვოთ ხელახალი არჩევნები, სადაც აღარ მივცემთ ივანიშვილს არჩევნების გაყალბების შანსს“, - განაცხადა ნინო ბურჯანაძემ.

აღსანიშნავია ის ფაქტი, რომ „ქართული ოცნების“ სატელიტად მონათლული ოპოზიციური პარტია, „პატრიოტთა ალიანსი“, სხვა ოპოზიციური პარტიების მსგავსად, არჩევნებს ბოიკოტს უცხადებს და ვადამდელი არჩევნების გამართვას მოითხოვს და არც პარლამენტში შესვლას აპირებს.

„არ ვაპირებთ ამ მოწვევის პარლამეტში შესვლას, რადგან არჩევნები ტოტალურად გაყალბდა, არჩევნებში არ გამოხატულა საქართველოს მოსახლეობის ნება. ეს არჩევნები ტოტალურად გაყალბებულია, ჩვენ მოვაწყობთ ფართომასშტაბიან აქციებს. მოვითხოვთ ამ არჩევნების შედეგების ბათილობას და განმეორებით არჩევნებს“, - განაცხადა „პატრიოტთა ალიანსის“ ერთ-ერთმა ლიდერმა, გოჩა თევდორაძემ.

ექსპერტ დემურ გიორხელიძის თქმით ხვალინდელი ამერიკის შეერთებული შტატების საპრეზიდენტო არჩევნებზე ბევრი რამ იქნება დამოკიდებული. მისი თქმით, ქართული პოლიტიკური სპექტრი აშშ-ს ნეოლიბერალური ძალების გავლენის ქვეშაა. ამიტომ გასაკვირი არ არის, რომ ოპოზიცია ყველანაირად შეეცდება ქვეყანაში პოლიტიკური კრიზისი შექმნას.

„საქმე ისაა, ქვეყნის გარეთ რა მოხდება. 3 ნოემბრის აშშ-ს საპრეზიდენტო არჩევნების შედეგები დიდად იქნება განმაპირობებელი, ვინაიდან ქართული პოლიტიკურ სპექტრი, ძირითადად, ამერიკის ნეოლიბერალური ძალების ქვეშ არის მოქცეული. ამ შემთხვევაში, ცხადია, სიტუაციას დაძაბავენ და ეს საფრთხე მოსალოდნელიც იყო. „ევროპული საქართველო“ ამერიკულ ძალებთან ყველაზე ახლოს არის და, როგორც ჩანს, ინსტრუქცია მიღებული აქვთ. ამიტომაც ეწინააღმდეგებიან ისინი ამერიკიის შეერთებული შტატების საელჩოს, რაც თავისთავად ძალიან ცუდი რამის მაჩვენებელია. ეს არ არის პოლიტიკური სიმწიფე, ეს არის მცდელობა ძალიან სერიოზული პოლიტიკური კრიზისის შესაქმნელად. ცუდში ვგულისხმობ იმას, რომ პოლიტიკური კრიზისი შეიძლება იქნას გამოწვეული. როგორც წესი, ასე პოლიტიკოსები არ იქცევიან. მე მომწონს თუ არა ეს შედეგები, ამას მნიშვნელობა არ აქვს. მთავარი ის არის, რომ ხალხის განწყობა არ შეცვლილა“, - განაცხადა დემურ გიორხელიძემ.

მისივე განცხადებით, ოპოზიცია შეეცდება ბოიკოტით სარგებელი ნახოს.

„ოპოზიციამ ხმების თითქმის 40%-მდე აიღო. ბუნებრივია, ისინი ბოლომდე ეცდებიან სარგებელი ნახონ. თუმცა, არ ვიცი ვინ აყვება ვინ - არა“, - აღნიშნა გიორხელიძემ.

ექსპერტის თქმით, „ოცნებამ“ მცდარი წინასაარჩევნო კამპანია აწარმოა, რამაც „ნაციონალური მოძრაობის“ წისქვილზე დაასხა წყალი.

„ოცნებამ“ საკმაოდ მცდარი წინა საარჩევნო კამპანია აწარმოა. პოლიტიკური თვალსაზრისით, ეს არ იყო გამართლებული, ეს არ იყო შორსმჭვრეტელი პოლიტიკა და ვფიქრობ, ამ შეცდომებმა გამოიწვია ეს შედეგი, რაც „ქართულმ ოცნებამ“ მიიღო. ამ პერიოდში ყველა ძალის იგნორირებასა და მხოლოდ „ნაციონალური მოძრაობის“ პროპაგანდას ვხედავდით. იმის ნაცვლად, რომ ხელისუფლებას საკუთარი ბერკეტები გამოეყენებინა, პირიქით, 2012 წლიდან, ფაქტობრივად გააცოცხლა და ფეხზე დააყენა „ნაციონალური მოძრაობა“,- აღნიშნა დემურ გიორხელიძემ.

პოლიტიკური ძალები, რომლებიც წლებია პარლამენტში შესვლაზე ოცნებობდნენ, იტყვიან თუ არა უარს ახლა მანდატებზე, გიორხელიძე ასე პასუხობს:

„ამ პარტიების უმრავლესობა ხელისუფლების მხარდაჭერით არსებობენ, „ნაციონალური მოძრაობის“ განაყოფები არიან, ერთი-ორის გარდა. წესით, მანდატებზე უარის თქმა არ უნდა აწყობდეთ, მაგრამ სიტუაციიდან გამომდინარე იმოქმედებენ. ეს ყველაფერი „ნაციონალურ მოძრაობასაც“ არ უნდა აწყობდეს, რადგან პოლიტიკა გრძელვადიანი თამაშია. თუკი ნაცები ასეთი დიდი პროცენტით შევლენ, ფაქტობრივად, როგორც კი ხელისუფლების ცვლილების საკითხი დღის წესრიგში დადგება, ხელიფუსლება მათ უნდა გადაიბარონ. ეს არის გრძელვადიანი ხედვა, ჩემი როგორც პოლიტიკის კარგად მცოდნისა. ასე რომ, მე ნაციონალების ადგილზე ასეთ სისულელეს არ გავაკეთებდი. „ევროპულმა საქართველომ“ არჩევნები წააგო და გამოჩნდა, რომ მათ პერსპექტივა არ გააჩნიათ. ისინი ვერასდროს შეძლებენ ნაცების წინ დადგომას. ვნახოთ, ვინ გაამართლებს და ვინ ვერა“, - განაცხადა for.ge-სთან საუბრიას დემურ გიორხელიძემ.