„დემოკრატების“ საპრეზიდენტო კანდიდატმა, ჯო ბაიდენმა დელავერის შტატში წინასწარი ხმის მიცემის უფლებით ისარგებლა.
ჯო ბაიდენი ქალაქ უილმინგტონში მდებარე საარჩევნო უბანში მეუღლესთან ერთად მივიდა.
აშშ-ში საპრეზიდენტო არჩევნებში წინასწარი ხმის მიცემის უფლებით 70 მილიონზე მეტმა ადამიანმა ისარგებლა.
24 ოქტომბერს აშშ-ის პრეზიდენტმა, დონალდ ტრამპმა საპრეზიდენტო არჩევნებში საკუთარი არჩევანი ფლორიდის შტატში გააკეთა. ხმის მიცემის პროცედურის დასრულების შემდეგ ჟურნალისტებთან საუბრისას აშშ-ის პრეზიდენტმა აღნიშნა, რომ „ხმა მისცა ბიჭს, რომლის სახელი ტრამპია“.
აშშ-ში საყოველთაო არჩევნები 3 ნოემბერს გაიმართება. საყოველთაო არჩევნების ფარგლებში ამერიკელები ქვეყნის პრეზიდენტს, წარმომადგენელთა პალატის 435 წევრს, სენატორების 1/3-სა და 13 გუბერნატორს აირჩევენ.
