აშშ-ის პრეზიდენტმა, დონალდ ტრამპმა განაცხადა, რომ პოლიციისათვის დაფინანსების შეწყვეტა ან პოლიციის დეპარტამენტების დაშლა არ მოხდება. ამის შესახებ აშშ-ის პრეზიდენტმა თეთრ სახლში სამართალდამცველებთან შეხვედრის დროს განაცხადა.

აშშ-ის პრეზიდენტმა სამართალდამცველები გაწეული სამსახურისთვის შეაქო და ხაზგასმით აღნიშნა მიმდინარე წელს დანაშაულის დაბალი მაჩვენებლები.

„დაფინანსების შეწყვეტა არ მოხდება. ჩვენი პოლიციის დაშლა არ მოხდება. ჩვენი პოლიციის წყალობით მშვიდად ვცხოვრობთ. ზოგჯერ საშინელ ამბებს ვიხილავთ, როგორც ახლახან ვიხილეთ, თუმცა პოლიციელების 99% დიდებული ხალხია და დიდებულ სამუშაოს ასრულებენ“, - განაცხადა დონალდ ტრამპმა.

აფროამერიკელი ჯორჯ ფლოიდის გარდაცვალების გამო დაწყებული მასშტაბური საპროტესტო აქცების ფონზე ქალაქ მინიეაპოლისის საქალაქო საბჭოს 13 წევრიდან ცხრამ, ქალაქის არსებული პოლიციის დეპარტემენტის გაუქმება და მის ნაცვლად „სამოქალაქო უსაფრთხოების ახალი მოდელის“ შექმნა მოითხოვა.

აშშ-ში საპროტესტო აქციები ჯორჯ ფლოიდის მკვლელობას მოჰყვა. 28 მაისს საპროტესტო აქციის მონაწილეებმა მინეაპოლისის პოლიციის შენობა დაიკავეს და ცეცხლი წაუკიდეს. 30 მაისს ფლოიდის საქმეზე დაკავებულ ყოფილ პოლიციელს ბრალი წინასწარი განზრახვის გარეშე მკვლელობის მუხლით წაუყენეს. საპროტესტო აქციების გამო 25-ზე მეტ ქალაქში კომენდანტის საათი გამოცხადდა. 2 ივნისს დამოუკიდებელმა ექსპერტიზამ დაადგინა, რომ ფლოიდის გარდაცვალების მიზეზი ასფიქსია გახდა.