„ნაციონალური მოძრაობის“ წევრებმა ჩვენს დეპუტატებს, პირდაპირ პარლამენტის დარბაზში, უმძიმესი პერსონალური შეურაცხყოფები მიაყენეს. როგორც ჩანს, ამან მაჟორიტარების დიდი ნაწილის მოთმინების ფიალა აავსო და მეც, სამწუხაროდ, ვეღარ მოვახერხე კონსტრუქციულ ველში მათი დაბრუნება“, – ასე ხსნის ბიძინა ივანიშვილი პარლამენტის მიერ საარჩევნო სისტემის ცვლილებასთან დაკავშირებით კონტიტუციურ კანონში ცვლილებების პირველი მოსმენით ჩაგდებას.

„ამ მოვლენების გამო უკმაყოფილება მმართველ გუნდში დღეს და გუშინ არ დაწყებულა. მიუხედავად იმისა, რომ მძაფრი შიდაპარტიული დისკუსია და უთანხმოება გარეთ არ გამოგვქონდა, მე და სხვა ლიდერებიც, უდიდეს ძალისხმევას ვხარჯავდით, რომ პროცესი ჩიხში არ შესულიყო. მიუხედავად ამისა, ოპოზიციამ ყველაფერი გააკეთა, რომ ის მყიფე კონსენსუსი, რაც ზაფხულში ჩვენს გუნდში შედგა, დარღვეულიყო“, – აცხადებს ბიძინა ივანიშვილი.

აღსანიშნავია, რომ პროპორციულ საარჩევნო სისტემის თაობაზე ინიცირებული კანონპროექტი მმართველ გუნდში ერთპიროვნულად არ ყოფილა მიღებული და მას ხელს 90-მდე დეპუტატი აწერდა. როგორც კახა კალაძე აცხადებს, დეპუტატები იყვნენ, რომლებიც კანონპროექტის მიღებას ეწინააღმდეგებოდნენ, ფიზიკურ დაპირისპირებამდეც კი მივიდა, მაგრამ მათ სახელებს არ ასახელებს.

„ჩვენი პარტია არის დემოკრატიული. პარტიაში მიმდინარე პროცესები არის ჯანსაღი, რა თქმა უნდა, ყველა ვერ იქნება ერთ მოსაზრებაზე, არის განსხვავებული მოსაზრებები. ჩემთვისაც ბევრი რამ არ არის მისაღები. ნამდვილად არ ველოდი თუ ეს არ განხორციელდებოდა, მთავრია გუნდის შენარჩუნება ისევ და ისევ ქვეყნისთვის ინტერესებიდან გამომდინარე, რომ ქვეყანაში იყოს სიმშვიდე, სტაბილურობა და ბოროტ ძალებს არ მიეცეთ საშუალება ქვეყანაში გამოიწვიონ დაპირსპირება“, – განაცხადა თბილისის მერმა კახა კალაძემ.

მმართველი გუნდი აღიარებს, რომ ვითარება რთულია, თუმცა ფრაქცია „ქართული ოცნების“ თავმჯდომარის მამუკა მდინარაძის შეფასებით, სახელმწიფო დგას თავის ადგილზე, პარლამენტი დგას თავის ადგილზე, არანაირი კატასტროფა არ მომხდარა. დეპუტატი დარწმუნებულია, რომ საერთაშორისო საზოგადოებას კანონპროექტის ჩაგდებაზე ადეკვატური რეაქცია ექნება.

„ნაციონალური მოძრაობის“ დროსაც შერეული სისტემით მიდიოდა არჩევნები. ახლა არ მოსწონთ თურმე ის, რაც თვითონ არ შეუცვლიათ და ახლა ამაში ხედავენ აპოკალიფსს. ყველას მოვუწოდებ სიმშვიდისკენ. სახელმწიფო დგას თავის ადგილზე, პარლამენტი დგას თავის ადგილზე, ყველა მუშაობს გამართულად, არ მომხდარა არანაირი კატასტროფა. „ნაციონალური მოძრაობისგან“ პასუხისმგებლობას არ ველოდებით იმიტომ, რომ დღევანდელ დღესაც კი აქციის დაორგანიზება და მაჟორიტარ დეპუტატებზე „მონების ძახება“ აი, ასეთი შედეგის გამომწვევია. გეგმა არის მხოლოდ და მხოლოდ სიმშვიდე, სტაბილურობა და პროცესების მართვა. ეს ასეც იქნება“, – განაცხადა მამუკა მდინარაძემ.

პარლამენტის მიერ საარჩევნო სისტემის ცვლილებასთან დაკავშირებით კონსტიტუციურ კანონში ცვლილებების ჩაგდებამ საპარლამენტო და არასაპარლამენტო ოპოზიცია გააერთიანა. ოპოზიციის ლიდერებმა მიმდინარე მოვლენების სამომავლო განვითარების გეგმები „ლეიბორისტული პარტიის“ ოფისში გაერთიანებულ შეხვედრაზე ჩამოაყალიბეს – გადადგეს გიორგი გახარია და დაინიშნოს ვადამდელ საპარლამენტო არჩევნები! - ამ მოთხოვნით გაერთიანებული ოპოზიცია ქუჩაში გავიდა.

თავის მხრივ, ირმა ინაშვილი ხვალ პარლამენტში შეიტანს კანონპროექტს, რომლის მიხედვითაც, 0,67 პროცენტიანი ბუნებრივი ბარიერი შეიცვლება ბუნებრივი ბარიერით – 0,7%. როგორც „პატრიოტთა ალიანსის“ წევრი აცხადებს, პარტია აქციების რეჟიმში გადადის. პირველი აქცია კვირას, 17 ნოემბერს, 17:00 საათზე თბილისში, პირველი რესპუბლიკის მოედანზე გაიმართება.

„აქციების პირველი და მთავარი მოთხოვნა იქნება, „ქართულმა ოცნებამ“ დატოვოს ხელისუფლება. თუკი გაიაზრებენ, რა მნიშვნელობა აქვს ჩვენს მიერ შეთავაზებულ წინადადებას, ეძლევათ შანსი, დაჩქარებული წესით მიიღონ ჩვენი საკანონმდებლო ინიციატივა. ამავდროულად, დაწყებულია აზრთა მიმოცვლა პოლიტიკურ სპექტრში. მოგეხსენებათ, ყველა პარტია გადასულია საპროტესტო რეჟიმში.

უნდა ჩამოვყალიბდეთ ერთიან სქემაზე, ეს სქემა უნდა იყოს მისაღები მთელი პოლიტიკური სპექტრისა და საზოგადოებისთვის. ჩვენი მოთხოვნა არის აბსოლუტურად ლეგიტიმური, სამართლიანი. ჩვენ ვითხოვთ სამართლიან არჩევნებს. დღევანდელი გადაწყვეტილებით „ქართულმა ოცნებამ“ წაართვა ქართველ ხალხს სამართლიანი არჩევნების უფლება, რასაც ჩვენ ვერ დავუშვებთ“, – აღნიშნა ირმა ინაშვილმა.

აჯანყების კანონიერი უფლებებზე საუბრობს „ევროპული საქართველოს“ წევრი გიგი უგულავა, რომლის განცხადებით, აჯანყების უფლება ადამიანის უფლებათა დეკლარაციაში დევს და ვინც შენს თავისუფლებას მოეპოტინება, იმას მოხვდება ცხვირში. მისი თქმით, ივანიშვილმა გადააგდო ხალხი, ახლა ხალხი გადააგდებს ივანიშვილს.

„თუ ვინმეს კიდევ ეჭვი ეპარება, რომ ეს კაცი არის მატყუარა, ფლიდი, გადამგდები, მაშინ, როგორც პავლე მოციქული ამბობს, შეიბერტყე კალთები, მოტრიალდი და წადი მისგან, რადგან ასეთ ადამიანთან ლაპარაკს აზრი არ აქვს. ურცხვად გვატყუებს, აუქმებს არჩევნებს. თან ბრიყვი უმრავლესობის წევრები ლაპარაკობენ, რომ თუ ოპოზიცია შეიძლება მოვიდეს, მხარს არ დავუჭერთო. ანუ რას ნიშნავს ეს, რომ ოპოზიციას არჩევნებით გამარჯვების შანსი აღარ აქვს? ამას გვეუბნებიან? ანუ შევდივართ ჩიხში და აქედან გამოსავალი რა არის? აქედან გამოსავალი არ არის. ხალხი არსად წავა, წავა ივანიშვილი. ლოგიკურია – წაგვართვეს არჩევნები, დაგვახიეს თავზე კონსტიტუცია, ადამიანის უფლებები ხომ დარჩა და ადამიანის უფლებაში დევს თავისუფლება. როდესაც გართმევენ არჩევანს, ადამიანის უფლებათა დეკლარაციის მიხედვით, ადამიანს აჯანყების უფლება აქვს. ივანიშვილი ამას აკეთებს იმისთვის, რომ დააპირისპიროს ხალხი, ცუდი განვითარება ჰქონდეს ყველაფერს, რომ ბოლოში ადვილად ჩაგვაბაროს რუსეთს. ეს კაცი მიგვაქანებს რუსეთისკენ“, – განაცხადა გიგი უგულავამ.

„ერთიანი საქართველო – დემოკრატიული მოძრაობის“ თავმჯდომარის ნინო ბურჯანაძის განცხადებით, მნიშვნელოვანია ქვეყანამ დემოკრატიული და სამართლიანი არჩევნების ჩატარების შესაძლებლობა მოიპოვოს.

„ჩვენ, ოცმა პარტიამ, მაშინ ხელი მოვაწერეთ მოთხოვნას და შევაგროვეთ 200 000 ხელმოწერაზე მეტი, რომ ხელისუფლებას გაეგო, თუ რამდენად მნიშვნელოვანია პროპორციული სისტემის ჩატარება. მივიღეთ ფანტასტიკური შედეგი, რომ ხელისუფლება ამაზე წამოვიდა, თუმცა დღეს, სამწუხაროდ, ხელისუფლებამ ყველაფერი გააფუჭა. დღეს ყველანი უნდა მივხვდეთ, რომ ასე გაგრძელება არ შეიძლება“, – აცხადებს ნინო ბურჯანაძე.

„ნაციონალური მოძრაობის“ ლიდერის გრიგოლ ვაშაძის განცხადებით, გავრილოვის ღამე უვერტურა იყო, მესამე აქტი წინ არის. მისი თქმით, მმართველი გუნდი ყველაფერს აკეთებს, რომ არჩევნები არ შედგეს.

„საქართველოში პარლამენტარიზმი დამთავრდა, დემოკრატია მოიპარეს, სახელმწიფო მოიპარეს და არავითარ შემთხვევაში არ უნდათ ხელისუფლების დათმობა. ერთი კვირა ატარებდნენ კვლევებს და მშვენივრად იციან, რომ კატასტროფული მარცხი ელოდათ არჩევნებში. აქედან გამომდინარე, ყველაფერს აკეთებენ, რომ არჩევნები არ შედგეს“, – განაცხადა გრიგოლ ვაშაძემ.

პოლიტოლოგი გია ხუხაშვილი ფიქრობს, რომ ბიძინა ივანიშვილს ცნობილი განცხადება არ უნდა გაერცელებინა, არამედ უნდა გადამდგარიყო პარტია „ქართული ოცნების“ თავმჯდომარის პოსტიდან. მისი თქმით, მხოლოდ ეს გადაარჩენდა ივანიშვილს, როგორც ადამიანს და როგორც პოლიტიკოსს.

„ივანიშვილის გავრცელებული განცხადება არის გუშინდელი ირაკლი კობახიძის განცხადების „რიმეიქი“. ეტყობა, მას დღეს კობახიძესთან აქვს პოლიტიკური რომანი. ერთადერთი ბიძინა ივანიშვილის ადამიანურად, პოლიტიკურად გადარჩენის შანსი, ამ წერილის გამოქვეყნება კი არ იყო, არამედ მას უნდა ეთქვა, რომ მე მოგეცით პირობა და მე ეს პირობა ვერ შევასრულე, მიზეზების ახსნა კი არ უნდა დაეწყო. ამიტომ მე მივდივარ პოლიტიკიდან, გადავდივარ პარტიის თავმჯდომარეობიდან, იმიტომ რომ ვერ უზრუნველვყავი ჩემს მიერ ნათქვამი პირობის შესრულება.

განსაკუთრებულად ცინიკურად ჟღერდა ის, რომ ბიძინა ივანიშვილი, რომელმაც დღეს ხალხი გადააგდო, კიდევ პირობას დებს, რომ 2020 რაღაცას შეგისრულებთო, წარმოიდგინეთ რამდენად არაადეკვატური შეიძლება იყოს ადამიანი, რომელმაც დღეს გადაგაგდო და რომელიც დღესვე გეუბნება, მე ვარ გარანტი 2020 წლის არჩევნებისო. ეს არის სრული აბსურდი, ფარსი“, – აცხადებს გია ხუხაშვილი.