შალვა თადუმაძეს საკუთარ დიპლომაზე საუბარი აღარ სურს. გენერალური პროკურორი პოლიტიკურ ბოდვას უწოდებს არასამთავრობო ორგანიზაციების მოთხოვნას, რომ მის დიპლომთან დაკავშირებით გამოძიება დაიწყოს. პარლამენტის თავმჯდომარე. არჩილ თალაკვაძე აცხადებს, რომ დიპლომებთან დაკავშირებული თემა უზენაესი სასამართლოს მოსამართლეობის კანდიდატების კენჭისყრამდე ამოიწურება.

„ზუსტად არ ვიცი, როგორი ფორმულირება ჰქონდა არასამთავრობოების მოთხოვნას, მაგრამ შალვა თადუმაძის მოსმენა უკვე იყო კომიტეტის სხდომაზე, შესაბამისად, ის ვერ შეჩერდება, უკვე იყო. რაც შეეხება კანდიდატების მოსმენას, მე დარწმუნებული ვარ, კენჭისყრამდე დიპლომებთან და სხვა საინტერესო საკითხებთან დაკავშირებული ნებისმიერი თემა იქნება ამოწურული. ამაზე კომიტეტიც მუშაობს, ასევე ვიცი, რომ სამოქალაქო საზოგადოებაც დაინტერესებულია და აუცილებლად მიიღებენ პასუხებს კითხვებზე“, – განუცხადა ჟურნალისტებს არჩილ თალაკვაძემ.

თავის მხრივ, საპარლამენტო ოპოზიციაში არ გამორიცხავენ, რომ მოქმედი გენერალური პროკურორის, შალვა თადუმაძის დიპლომი სისხლის სამართლებრივი დევნის საფუძველი გახდეს. როგორც „ნაციონალური მოძრაობის“ წევრი რომან გოცირიძე აცხადებს, სისხლის სამართლებრივი დევნის საფუძველი შეიძლება გახდეს, როგორც დოკუმენტის გამცემი დაწესებულების, ასევე იმ ადამიანის მიმართაც, რომელმაც გაყალბებული დიპლომი წარმოადგინა.

„ჯერ ერთი, ეს ეხება იმათ, ვინც გააყალბა დიპლომი და ეს ეხება უნივერსიტეტსაც, რომელიც კომენტარს თავს არიდებს, მედიაში არ ჩანან. ამიტომ, როგორც უნივერსიტეტი შეიძლება იყოს დამნაშავე, ასევე - ის ადამიანი, რომელმაც გაყალბებული დიპლომი წარმოადგინა. დღეს უკვე საუბარია არა იმაზე, მისი საბუთები შეესაბამება თუ არა იმ თანამდებობას, რომელზეც პრეტენზიას აცხადებს, არამედ დაიწყება თუ არა სისხლის სამართლებრივი დევნა“, – აღნიშნა რომან გოცირიძემ.

„ევროპული საქართველოს“ წევრი, გიგა ბოკერია დარწმუნებულია, რომ დიპლომის სკანდალის შემდეგ შალვა თადუმაძის დამტკიცება უმრავლესობას ძვირი დაუჯდება. როგორც ბოკერია აცხადებს, თადუმაძეს პოლიტიკური ღირსება რომ ჰქონდეს, ამდენი სკანდალის შემდეგ, თავის კანდიდატურას გაიწვევდა.

„გამოძიების სრული საფუძველიც არსებობს, მაგრამ ჩემთვის ამ ეტაპზე უფრო მნიშვნელოვანია უზენაესი სასამართლოს გადარჩენა ამ ტიპის ფიგურისგან, როგორც შემდგომ ცხოვრების განმავლობაში მოსამართლისგან. შალვა თადუმაძის სურვილი, რომ გახდეს უზენაესი სასამართლოს მოსამართლე, უტიფრობის მწვერვალია“, – აცხადებს გიგა ბოკერია.

დამოუკიდებელი დეპუტატის, ლევან გოგიჩაიშვილის განცხადებით, პარლამენტის იურიდიულ საკითხთა კომიტეტმა გენერალური პროკურორის, შალვა თადუმაძის დიპლომის საკითხზე მოთხოვნა გაგზავნა, მაგრამ კომიტეტს ეს საქმე ბოლომდე არ მიჰყავს.

„ჩემთვის შალვა თადუმაძის დიპლომი ძალიან დიდ პრობლემას არ წარმოადგენს, პრობლემას უზენაესი სასამართლოს მოსამართლეობის კანდიდატთა სიაში იმ ხალხთან ერთად ყოფნა წარმოადგენს, ვისაც წლების განმავლობაში უპირისპირდებოდა. ე.წ. მუხროვანის ამბოხის საქმეზე დამცველს წარმოადგენდა, მეორე მხარეს თამარ ალანია იყო. პრინციპების ზღვარი და მორალის ხაზი სად გადის? ჩემთვის მნიშვნელოვანია ისიც, რომ სიაში გაბინაშვილთან, ჩინჩალაძის კლანთან ერთად არის და პრობლემა ეს არის. ორგანიზაციებმა, რომელთაც გული შესტკივათ წარსულსა და კანონის უზენაესობაზე, ამ საკითხებზეც გააკეთონ კონცენტრირება“, – განაცხადა ლევან გოგიჩაიშვილმა.

იურიდიული კომიტეტის გადაწყვეტილებას, კომიტეტის თავმჯდომარე ანრი ოხანაშვილი იმით ხსნის, რომ პროგრამა, რომლითაც შალვა თადუმაძე სწავლობდა, აღიარებული იყო სახელმწიფოს მიერ.

„ვინც აღნიშნული პროგრამა დაამთავრა, სახელმწიფოს მხრიდან აღიარებული პროგრამა აქვს ნასწავლი და პროგრამის ნამდვილობა დასტურდება. თუ კიდევ არის რამე დამატებითი საკითხი, იურიდიულ საკითხთა კომიტეტი დამატებით ინფორმაციას მოვითხოვთ. მაგრამ ეს ყველაფერი უკვე კომიკურ სახეს იძენს.

ვინ სწავლობდა, კურსელები და ა.შ. ამ საკითხების ასე გაშარჟება არ შეიძლება, ვინაიდან საკითხი უნდა დაისვას, ფუნქციონირებდა თუ არა უნივერსიტეტი, აკრედიტაცია ჰქონდა თუ არა. ამაზე ეჭვები აღარ არის? ადრე ხომ იყო, გაიფანტა? უკვე აღარავინ საუბრობს იმაზე, რომ უნივერსიტეტი არ არსებობდა და სახელმწიფოს მიერ არ იყო აღიარებული, თითქოს ჯიხურში იყო და ა.შ. ეს დამოკიდებულება ხომ გახსოვთ? დღეს იგივეს ვეღარ ამბობენ, რადგან პასუხები გაეცათ“, – განაცხადა ანრი ოხანაშვილმა.

სახალხო დამცველი ერთ–ერთია, რომელიც თადუმაძის დიპლომის ნადვილობას ეჭვქვეშ აყენებს. ნინო ლომჯარია ფიქრობს, რომ თადუმაძის მხრიდან მისი დიპლომის ოფიციალური დადასტურება და ხარისხის აღიარება, ბევრ პრობლემას გადაჭრიდა და ბევრ შეკითხვას მოხსნიდა. მისი თქმით, პროკურატურის და გენერალური პროკურორის სანდოობის თვალსაზრისით და იმისათვის, რომ არ დადგეს აღნიშნულთან დაკავშირებით გამოძიების საჭიროება, თადუმაძის მხრიდან აღიარება საუკეთესო გზაა.

„კითხვები კიდევ არსებობს და ამ კითხვებს დამაჯერებელი პასუხები სჭირდება. ის პასუხები, რა პასუხებიც პარლამენტის სხდომაზე მოვისმინეთ, არ არის დასაბუთებული და დამაჯერებელი, ამიტომ არაერთგზის მივმართე გენერალურ პროკურორს, რომ მოახდინოს მისი დიპლომის ოფიციალური დადასტურება და ხარისხის აღიარება. ეს ბევრ პრობლემას გადაჭრიდა და ბევრ შეკითხვას მოხსნიდა. მე ვფიქრობ, რომ ეს არის საუკეთესო გზა. ამ საკითხზე გამოძიება რომ დაიწყოს, ამაზეც არ ვიქნები წინააღმდეგი, იმიტომ, რომ კითხვები რჩება პასუხგაუცემელი. ის არის გენერალური პროკურორი, მისი მისამართით ასეთი კითხვები არ უნდა არსებობდეს“, – აღნიშნა ნინო ლომჯარიამ.

კონსტიტუციონალისტის, ვახუშტი მენაბდის განცხადებით, თუ რამე არსებობს გენერალური პროკურორის დიპლომთან დაკავშირებით, ეს არის კითხვები, თუ რამე არ არსებობს, ეს არის პასუხები. მისი თქმით, თუ საკითხთან დაკავშირებით პასუხები არ არსებობს, სამართლებრივი პროცედურები ბოლომდე უნდა მივიდეს, მოცემულ შემთხვევაში კი ვახუშტი მენაბდე არ გამორიცხავს იმპიჩმენტის პროცედურის საჭიროებას.

„ჩვენ მიგვაჩნია, რომ გამოძიებამ უნდა შეისწავლოს ეს საკითხი იმისთვის, რომ ის პასუხები, რომელზეც მიუთითებს ბატონი გენერალური პროკურორი, დასაბუთებულად და სამართლებრივად გამართულად წარმოვუდგინოთ საზოგადოებას“, – განაცხადა ვახუშტი მენაბდემ.

„ჩვენ გვახსოვს ის დრო უდიპლომო სასიძო რომ არ უნდოდათ ადამიანებს და ქვეყანას უდიპლომო პროკურორი უნდოდეს, როგორია?“, – აცხადებს პოლიტოლოგი რამაზ საყვარელიძე, რომლის განცხადებით, სახელმწიფოს მართვა არ ითხოვს ისეთ პროფესიონალს, როგორც კონკრეტული უწყების მართვა. ამბობს, რომ დონალდ ტრამპი არ არის პოლიტიკოსი, მაგრამ ქვეყნის მართვის მხრივ არის ძლიერი, ისევე როგორც ბონაპარტე, რომელმაც ისეთი რეფორები გაატარა, რომ აქამდე მის რეფორებზე დგას ევროპა.

„ნიჭიერი, მასშტაბური ინტელექტის მქონე ადამიანი მოახერხებს სახელმწიფოს მართვას. ასევე არის ხასიათიც. გითხრათ, რომ ამ პერიოდში თადუმაძემ ისეთი პრინციპულობა გამოავლინა, რომ თავისი ხასიათით მოიპოვა ნდობა-თქო, მოგატყუებთ. მაგალითად გიორგი გახარიამ როგორც კი შსს–ში შეაბიჯა, გარკევული ორგანიზაციული ალღოს წყალობით და პრინციპულობით აღიქმებოდა როგორც შს მინისტრი.

უფრო მის აქტიურობაზე იყო პრეტენზიები, ვიდრე არაფრის კეთებაზე. თადუმაძესთან არაფრის კეთებაზე არის პრეტენზიები და ძალიან დასანანია, რადგან, მე ჯერ არ მინახია ადამიანი, რომელიც თადუმაძეს არ აქებდეს, როგორც პიროვნებას, მაგრამ უკმაყოფილების ეს შლეიფი მოსდევს და ამიტომ არის, რომ ადვილად გახდა საბურთაო მისი დიპლომის თემა“, – აცხადებს რამაზ საყვარელიძე.

პოლიტოლოგი ამბობს, რომ არ იცის გააჩნია თუ არა დამაჯერებელი არგუმენტების რაოდენობა თადუმაძეს. თუ არ აქვს, მაშინ წასვლა ჯობია, მაგრამ თუ აქვს, მაშინ უნდა იბრძოლოს ბოლომდე.

„ან უნდა მოიგო, ან უნდა გაეცალო. მაგრამ აქ უკვე გასვლაც პოლიტიკურად წამგებიანია „ქართული ოცნებისთვის“. თქვენ ფარცხალაძე ახსენეთ, სხვების ჩამოთვლაც შეიძლება. პრემიერების უხერხული დანიშვნები, პრობლემები პარლამენტის თავმჯდომარის ირგვლივ, მინისტრებზე რომ არაფერი ვთქვათ. მეორე მხრივ, „ნაციონალური მოძრაობა“ რომ არის კრიტიკოსი, ეგ არის ღიმილის მომგვრელი. იმიტომ, რომ ეს ის პარტიაა, პურის მცხობელი რომ ჰყავდა ეკონომიკის მინისტრად.

ივანიშვილს პროლემები აქვს საკადრო პოლიტიკაში და თვითონ თქვა პრეზიდენტის არჩევნების მეორე ტურის წინ, რომ საკადრო პოლიტიკას გამოვასწორებო, იცის, რომ საკადრო პოლიტიკა არ არის მისი კოზირი პოლიტიკაში და ვერც იქნება. საკადრო პოლიტიკას კიდევ სხვა ტიპის ფიგურები სჭირდება, რაც ყოველთვის რთული საკითხი იყო. შეხედეთ ზვიად გამსახურდიას საკადრო პოლიტიკას, რა გარემოცვა იყო მის გარშემო, იმ გარემოცვიდან ვერ გაუგიათ ვინ მოკლა ზვიადი.

შევარდნაძეს გარემოცვას შეეწირა თვითონ შევარდნაძე. მიშას გარემოცვა სალაპარაკო არ არის იმიტომ, რომ „ქართულ ოცნებას“ არ ახსენდება არაფერი, მიშას გარემოცვა თავისი ოდიოზურობით არაფრით არ ჩამოუვარდებოდა არც ერთ მათგანს. საქართველოში ძნელი ასაწყობია საკადრო პოლიტიკა. ისეთი კადრების ნაკლებობა გვაქვს, რომელიც მაღალი თანამდებობისთვის გვჭირდება“, – აღნიშნა for.ge–სთან საუბრისას რამაზ საყვარელიძემ.