ნანა დევდარიანის პრესკლუბი გუშინ მოქალაქეთა კავშირის გენერალურ მდივანს მასპინძლობდა.

ამიტომ, მოქკავშირის ნაღები „ვერხუშკა“ (პრეზიდენტის და პარლამენტის თავმჯდომარის გამოკლებით) „გენსეკის“ „საბალეშჩიკოდ“ პრესკლუბს ეწვია.

ნათქვამია, „Началство не опаздывает, а задерживается“-ო და მცირეოდენი „ზადერჟკის“ შემდეგ დევდარიანი და მაჭავარიანი „კოკა-კოლით“ და „ფანტით“ (თუმცა ვერაფერი მოიგო) გაწყობილ მაგიდას მიუსხდნენ. მაჭავარიანმა „კოკა-კოლა“ ჯერ დევდარიანს დაუსხა, შემდეგ თვითონ დაისხა, მოსვა და მოქალაქეთა კავშირის დანიშნულებაზე საუბრით განგვანათლა.

„გაცილებით ძნელია მმართველი პარტიის გენერალური მდივნობა, ვიდრე ოპოზიციონერის“, - ჩაეცინა მაჭავარიანს და დაამატა: „ჩვენ მომავლის პარტია ვართ. დიდი პასუხისმგებლობა გვაკისრია, რადგან ეს ედუარდ შევარდნაძის პარტიაა. მოქალაქეთა კავშირი ედუარდ შევარდნაძეა“, - დააკონკრეტა მან და მომავლის კონტურები მოხაზა: „ჩვენი მიზანი ახალი ადამიანის გამოყვანაა“, - გაგვანდო მაჭავარიანმა მოქკავშირელთა მთავარი საიდუმლო.

ისე, ცოტა გვაცალეთ და თუ ეკონომიკა აღორძინდება, მილიონ სამუშაო ადგილსაც წინ არაფერი დაუდგება“, - დაგვარწმუნა გენსეკმა.