„ეს არის საპარლამენტო ზედამხედველობის ხარისხი, ბატონებო“, – ასე მიმართა დეპუტატებს შს მინისტრმა გიორგი გახარიამ პლენარულ სხდომაზე, მას შემდეგ, რაც ის კითხვებზე პასუხის გასაცემად ტრიბუნასთან ავიდა, თუმცა დარბაზი თითქმის ცარიელი აღმოჩნდა. მინისტრის განცხადებას გამოეხმაურა „ნაციონალური მოძრაობის“ წევრი თინა ბოკუჩავა, რომელმაც აღნიშნა, რომ ეს არის უპატივცემულობა.

„მურუსიძე–ჩინჩალაძის კლანის საკითხს რომ განვიხილავდით, ეს კიდევ გადავიტანეთ და ახლა ბატონი გახარია, რომელიც მოვიდა, ეს რეჟიმიც ცარიელ დარბაზში უნდა წარიმართოს? ბატონო ირაკლი, იქნებ გვითხრათ, რა ხდება ამ პარლამენტში?“, – მიმართა თინა ბოკუჩავამ პარლამენტის თავმჯდომარეს, რომელმაც კოლეგების საქციელი დაგვინებით ახსნა და იმედი გამოთქვა, რომ სხდომაზე მოვიდოდნენ.

პარლამენტის პლენარულ სხდომაზე „მინისტრის საათის“ ფორმატში გიორგი გახარიას მოუსმინეს. შს მინისტრმა ისაუბრა გაწეულ სამუშაოებზე და დეპუტატებს სამოქმედო გეგმაც გააცნო. ქვეყნის პირველმა ძალოვანმა ისაუბრა გახმაურებულ სისხლის სამართლის საქმეებზე, მათ შორის თემირლან მაჩალიკაშვილის, ხორავას ქუჩის ტრაგედიაზე, ია კერზაიას საქმეზე და ოპოზიციას მიმართა, რომ მათ საქმე შინაარსობრივად არ აინტერესებთ, კითხულობენ გამოძიების იმ საქმეებს, რომელთანაც მას, როგორც შს მინისტრს წვდომა არ აქვს.

საპარლამენტო ოპოზიცია სწორედ გახმაურებულ საქმეებზე ითხოვდა გიორგი გახარიას პასუხებს. „ნაციონალური მოძრაობის“ წევრმა, თინა ბოკუჩავამ მსგავსი საქმეების ამ დრომდე გაუხსნელობის შეფასებისას სიტყვა „უნამუსობაც“ გამოიყენა. ერთ–ერთი მთავარი საკითხი, რაზეც გიორგი გახარიამ პარლამენტში ისაუბრა, პანკისის ხეობაში განვითარებული მოვლენები იყო.

პირველმა ძალოვანმა განმარტა, რომ ეს იყო შეცდომა, ყველა კომპეტენციის ფარგლებში, არასაკმარისი ანალიტიკური მუშაობის შედეგად დაშვებული და ეს შეცდომა არის გამოსასწორებელი. როგორც მინისტრმა აღნიშნა, შსს–სა და სუს–ს შორის, დღეის მდგომარეობით, ეფექტური თანამშრომლობა არსებობს და ვერავინ შეძლებს მათ უერთიერთობაში ბზარების გაჩენას იმით, რომ მათ პანკისში განვითარებულ მოვლენებთან დაკავშირებით, პასუხისმგებლობების ერთმანეთზე გადაბრალება მოუწიოთ.

„როგორ ჩანს, არასრული ანალიტიკა იყო გაკეთებული. როგორც ჩანს, ჩვენს მიერაც, პირადად ჩემს მიერაც არასრულად იყო დასკვნები გაკეთებული იმ რისკების შეფასებისთვის, რაც შეიძლება იქ ყოფილიყო. ეს არის ჩვენი პასუხისმგებლობა საერთო, ისევე როგორც, ყველა შესაბამის უწყებას თავისი კომპეტენცია ჰქონდა და ყველა თავის კომპეტენციის ფარგლებში ფარავდა იმ ზონალურ რისკებს, რომლებიც გააჩნია. ამიტომ, ჩვენ დღეს არავინ არ გადავანაწილებთ ამ პასუხისმგებლობას ერთმანეთზე. ვამბობთ, რომ ეს იყო შეცდომა. არასაკმარისი ანალიტიკური მუშაობის შედეგად ყველა ჩვენი კომპეტენციის ფარგლებში და ეს შეცდომა არის გამოსასწორებელი, რასაც ახლა ვაკეთებთ“, – განაცხადა გიორგი გახარიამ.

როგორც მინისტრმა აღნიშნა, ყველაზე მნიშვნელოვანი და ამავე დროს სამწუხაროა ის, რომ სახელმწიფოს ჰქონდა პოზიტიური ვალდებულება, გაეკეთებინა იმ სოციალური პროტესტის პროგნოზი, რომელიც პანკისის ხეობაში აღმოჩნდა, მაგრამ ვერ გააკეთა.

„რაც შეეხება პროვოკაციულ შეკითხვებს, მაგალითად – როგორ აპირებთ ამ ჩიხიდან გამოსვლას? - დაგვაკვირდით და მშვენივრად ნახავთ, როგორ გამოვალთ ამ ჩიხიდან, მშვიდად, წყნარად, გონივრული მიდგომით, იმ ხალხთან ერთად, ვინც მშვენივრად აცნობიერებს, გადაცდომის ფარგლები სად იყო.

მინდა იცოდეთ, რომ შეგიძლიათ, თქვენი უფლებამოსილების ფარგლებში სრული კონტროლის ქვეშ დააყენოთ ეს პროცესი, ოღონდ პოზიტიური კონტროლის ქვეშ. ისე კი არა, რომ აი, ამ ტრიბუნიდან ჩიხში შეგვიყვანოთ და ის გვითხრათ – რას იზამთ ახლა, დაიჭერთ 100 ადამიანს, თუ არ დაიჭერთ? მოვიქცევით ზუსტად ისე, როგორიც არის ქვეყნის ინტერესები და მოქალაქეების ინტერესები“, – განაცხადა გიორგი გახარიამ.

ძალოვანმა მინისტრმა ისაუბრა ერთ–ერთ მნიშვნელოვან საკითხზე, დავით გარეჯის გარშემო განვითარებულ მოვლენებზე და აღნიშნა, რომ საზღვრის დემარკაციის საკითხი სტრატეგიულ პარტნიორთან მეგობრული ურთიერთობის სულისკვეთებით გადაწყდება, სადაც გათვალისწინებული იქნება, როგორც საქართველოს კულტურული მემკვიდრეობის, ასევე ეკლესიის ინტერესები.

„დავით გარეჯის საკითხი საკმაოდ ფაქიზი, ფრთხილი საკითხია. ყველას მოგეხსენებათ, რომ ეს არის საკითხი, რომელიც მძიმედ დგას 1996 წლის შემდეგ, ეს არის პოსტსაბჭოთა მემკვიდრეობა. ერთმნიშვნელოვნად ყველას ძალიან კარგად გვესმის, რომ დელიმიტაცია–დემარკაციის საკითხი არის პრინციპული საკითხი ამ თემასთან დაკავშირებით. გარკვეული წლების განმავლობაში აქ იყო გაურკვეველი პაუზა, რომელიც სასწრაფოდ უნდა მოგვარდეს. შემიძლია გითხრათ, რომ უახლოეს პერიოდში დემარკაციის ახალი კომისია იქნება დაკომპლექტებული და ეს სამუშაო დაიწყება ჩვენს მეზობელთან ერთად.

კომისია სასწრაფოდ შეუდგება მუშაობას და შესაძლებელ ვადებში ჩვენ ყველამ უნდა ვეცადოთ, რომ ეს საკითხი ერთხელ და სამუდამოდ დაიხუროს, რამეთუ ეს არის პოსტსაბჭოთა მემკვიდრეობა, რომელიც გრძელდება ათწლეულებია. მაშინ, როდესაც ყველას კარგად გვესმის, რომ აზერბაიჯანი არის საქართველოს სტრატეგიული პარტნიორი, ეს არის ჩვენი მოძმე ერი, რა თქმა უნდა, დემარკაციის კომისიის მუშაობის ფარგლებში ერთად გადავწყვეტთ ყველა იმ პრობლემას, რომელიც ეხება როგორც კულტურული მემკვიდრეობის საკითხებს, ასევე შედის ჩვენი ეკლესიის ინტერესების სფეროში. აქ ორი აზრი არ არსებობს“, – განაცხადა შს მინისტრმა.

მისივე თქმით, ყველა სხვა სახის შეფასება არის ქვეყნის ინტერესების წინააღმდეგ მიმართული შეფასებები.

„ამ ქვეყანას ჰყავს ოკუპანტი, ეს არის რუსეთის ფედერაცია და ჩვენ ყველაფერი უნდა გავაკეთოთ იმისთვის, რომ სხვა ყველა მეზობელი იყოს ჩვენი სტრატეგიული პარტნიორი. ამაში არის ჩვენი ქვეყნის უსაფრთხოების ყველაზე მნიშვნელოვანი პოტენციალი. აქ კითხვის ნიშნები კი არა, გაჟღერებული არასწორი განმარტებები არის მაღალი რისკის შემცველი“, – აღნიშნა მინისტრმა.

„ევროპული საქართველოს“ წევრმა ირმა ნადირაშვილმა მინისტრისგან პრეზიდენტის იმ განცხადების შეფასება მოითხოვა, რომელიც საქართველოში ამერიკული ბაზების საკითხს ეხებოდა. ქვეყნის პირველი პოლიციელი აცხადებს, რომ ვერ შეაფასებს პრეზიდენტის გამონათქვამს და აქვე განმარტავს, რომ ამერიკის შეერთებული შტატები არის საქართველოს სტრატეგიული პარტნიორი. მისი თქმით, აშშ–ი არის როგორც ქვეყნის ტერიტორიული მთლიანობის, ასევე მისი უსაფრთხების, თავდაცვისუნარიანობის ჭრილში ძირითადი სტრატეგიული მხარდამჭერი.

კიდევ ერთი თემა, რომელზეც შს მინისტრმა ისაუბრა, ეს არის 17 მაისი. როგორც პირველი ძალოვანი აცხადებს, ორივე მხარეს გააცნობენ იმ რისკებს და ღონისძიებებს, რაც იქნება, რომ ქალაქში არ იყოს რაიმე გართულება. როგორც გახარიამ აღნიშნა, შს სამინისტრო ორ ძალას შორის მედიატორი ვერ იქნება.

„სამინისტრო სრულად აცნობიერებს და აფასებს რისკებს, რომელსაც ორივე მხარეს გავაცნობთ და იმ პირობებს, რომელიც იქნება აუცილებელი იმისთვის, რომ ამ ღონისძიებების დროს, ამ დღეს რაიმე გართულება ქალაქში არ იყოს. ეს ყველაფერი, რა თქმა უნდა, მოთხოვნის და თხოვნის სახითაც იქნება წაყენებული ორივე მხარისთვის“, – განაცხადა გიორგი გახარიამ.

ტრადიციულად მინისტრის გზავნილებით უკმაყოფილო იყო ნიკა მელია, რომელმაც გახარიას კრიმინალი უწოდა, რომელსაც მალე დაადებენ ბორკილს. „ნაციონალური მოძრაობის“ წევრის განცხადებით, მას შემდეგ, რაც გახარია შს მინისტრად დაინიშნა, გაუარესდა სიტუაცია სხვადასხა მიმართულებით, სადაც მინისტრის პასუხისმგებლობის საკითხი დგება.

სიტყვით გამოსვლისას ნიკა მელიამ გიორგი გახარიას რამდენჯერმე უწოდა ბიძინა ივანიშვილის დანიშნული კადრი და აღნიშნა, რომ სამომავლოდ, ივანიშვილი მას ვერ და არ დაიცავს.

„თქვენ არ ხართ შს მინისტრი, ხართ კრიმინალი გახარია, რომელსაც მალე დაადებენ ბორკილს. ბიძინა ივანიშვილს არც სურვილი და ენერგია ექნება, რომ დაგიცვათ. არ მახსოვს შს მინისტრი, რომელიც არ მოწყდა ხალხის ხმას, მათ შორის თქვენც. სანამ სარკაზმით ისაუბრებდეთ, იმ უმტკივნეულო საკითხებზე, რაც ასიათასობით ადამიანს აწუხებს, კარგად დაფიქრდით! რაც მინისტრი ხართ 55%–ით გაიზარდა კრიმინალი. 90%–ით არის გაზრდილი ქრთამის აღება საჯარო სამსახურებში. ამ ყველაფერზე მოგიწევთ პასუხისგება“, – აღნიშნა ნიკა მელიამ.

„ევროპული საქართველო“ ამბობს, რომ მინისტრმა მნიშვნელოვანი შეკითხვები უპასუხოდ დატოვა. როგორც სერგი კაპანაძე აცხადებს, მინისტრის გამოსვლა ცინიკური იყო, რომელმაც ოპონენტების დააბრალა პოლიციის დისკრედიტაცია და პოლიტიზირება.

„გიორგი გახარიას სპეციფიკური სტილი ჩამოუყალიბდა. ის არ პასუხობს არც ერთ მნიშვნელოვან საკითხს, არ აქვს მნიშვნელობა, ეს იქნება ია კერზაიას საქმე, ხორავას საქმე, პანკისის თემა, თუ ნებისმიერი სხვა კითხვა. ყველა კონკრეტულ კითხვას ის გაურბის. დღეს, სამწუხაროდ, განსაკუთრებით ცინიკური და მიუღებელი სტილი შეარჩია, როდესაც აქეთ დააბრალა ოპოზიციას საკითხების გაპოლიტიკურება, პოლიციის დისკრედიტაცია და პოლიციის პოლიტიზაცია“, – განაცხადა სერგი კაპანაძემ.

ოპონენტებს ტაქტიკა დაუწუნა პარლამენტის თავდაცვისა და უშიშროების კომიტეტის თავმჯდომარემ, რომლის განცხადებით, პოლიტიკურ ოპონენტებს რატომღაც ჰგონიათ, რომ რაც უფრო უზრდელები იქნებიან, მით უფრო კარგი პოლიტიკოსები გაოჩნდებიან.

„დიახ, თქვენ აქ მხოლოდ საკუთარი ვიწროპოლიტიკური ინტერესების დაკმაყოფილებისთვის ხართ მოსული და არა იმისთვის, რომ რეალურად ჩვენ ვიფიქროთ და ვიმუშაოთ ერთად, მინისტრებთან და სხვა ხელმძღვანელებთან, რომ ჩვენი ქვეყნის საერთო ინტერესები დავიცვათ. სამწუხაროდ, ჩვენი ქვეყანა ძალიან მოწყვლადია საფრთხებთან და რისკებთან მიმართებაში. ნებისმიერმა მცირედმა საფრთხემ ან რისკმა შეიძლება უარყოფითად იმოქმედოს ჩვენი ქვეყნის მომავალზე“, – მიმართა ოპოზიციას ირაკლი სესიაშვილმა.