თუ ქალბატონი ადა დატოვებს კომისიას, მე არ მგონია, რომ ამით კომისია დაზარალდეს, - ამის შესახებ ხორავას ქუჩაზე მოზარდების მკვლელობის საქმეზე დროებითი საგამოძიებო კომისიის თავმჯდომარემ სერგი კაპანაძემ ჟურნალისტებს განუცხადა. როგორც მან აღნიშნა, ადა მარშანიას გამოსვლა კომისიის პირველ სხდომაზე პოლიტიკური მასკარადი და შოუ იყო.
"ქალბატონმა ადამ მოაწყო რაღაც პოლიტიკური შოუ, მასკარადი თავისი ვიწროპოლიტიკური მიზნებისთვის. ეს კომისია მუშაობს ხორავას ქუჩაზე მომხდარ მკვლელობასთან და მის ირგვლივ არსებულ გარემოებებთან დაკავშირებით. ამ კომისიის ფარგლებში არანაირი მანდატის გაფართოვება არ მოხდება და ეს მან ძალიან კარგად იცოდა, მაგრამ მაინც გამოიყენა შესაძლებლობა ამ პოლიტიკური შოუს მოსაწყობად. თუ ის დატოვებს კომისიის შემადგენლობას, არ მგონია ამით კომისია დიდად დაზარალდეს", - განაცხადა სერგი კაპანაძემ.
დღეს დროებითი საგამოძიებო კომისიის სხდომაზე, ფრაქცია “საქართველოს პატრიოტების“ წარმომადგენელმა ადა მარშანიამ განცხადება გააკეთა.
„თითქმის 6-წლის თავზე იქამდე მივედით, რომ პარლამენტში დროებით საგამოძიებო კომისიის შექმნით და მისი შემადგენლობით აბსურდი დავაკანონეთ, ხოლო საღი აზრი, ზნეობა და მორალი სისულელედ გამოვაცხადეთ - ჩვენი პოლიტიკური ძალა ამ კომისიაში არ დარჩება, ვერ იმუშავებს, რადგან ვიმყოფებით არა პარლამენტში, არამედ აბსურდის თეატრში“, - აღნიშნა ადა მარშანიამ.
