პარლამენტში დროებითი საგამოძიებო კომისიის შექმნა იმას ნიშნავს, რომ ჩვენ დასამალი არაფერი გვაქვს და არავისზე ვაპირებთ ხელის დაფარებას, – ამის შესახებ ჟურნალისტებს ფრაქცია „ქართული ოცნების“ თავმჯდომარემ, დროებითი საგამოძიებო კომისიის წევრმა მამუკა მდინარაძემ განუცხადა. მდინარაძის თქმით, მსგავს საქმეზე პარლამენტის კომისიის შექმნა უპრეცედენტოა.
„თქვენ შეგიძლიათ მოძებნოთ პრეცედენტები, თუ რამდენი შემთხვევა მსოფლიოში, როცა ხელისუფლება კონკრეტულ საქმეზე საგამოძიებო კომისიას ქმნის. პარლამენტში დროებითი საგამოძიებო კომისიის შექმნა იმას ნიშნავს, რომ ჩვენ დასამალი არაფერი გვაქვს და არავისზე ხელის დაფარებას არ ვაპირებთ. პირველ რიგში, მოხდება საქმის მასალების გამოთხოვა, ჩავიხედავთ თუ რა ხდება საქმეში, ამის შემდეგ შინაარსთან დაკავშირებით უფრო მეტად შევძლებთ მსჯელობას“, – განაცხადა მდინარაძემ.
ამ წუთებში პარლამენტში ხორავას ქუჩაზე მომხდარი დანაშაულის საქმეზე დროებითი საგამოძიებო კომისიის პირველი საორგანიზაციო სხდომა იწყება. დღეს კომისია აირჩევს თავმჯდომარის მოადგილეს, კომისიის მდივანს, მოხდება დებულების დამტკიცება, განიხილავენ საორგანზაციო საკითხებს.
