უამრავი სასამართლო პროცესი, მის წინააღმდეგ აგორებული პიარ-კამპანია, დაყადარებული ანგარიშები, ყადაღადადებული ქონება, დაკავებული აქტივისტები, კიდევ რას მოიფიქრებს ხელისუფლება, მის ფანტაზიაზეა დამოკიდებული, მაგრამ კოალიცია „ქართულ ოცნებაში“ შემავალ პარტიებს ამგვარად შეიარაღებულებს უწევთ ბრძოლა ძირითადი მოწინააღმდეგისა და მმართველი პარტიის, „ნაციონალური მოძრაობის“ წინააღმდეგ. მეორე მხრივ, ნაციონალური მოძრაობა ფლობს ყველა ადმინისტრაციულ ბერკეტს და წინასაარჩევნო კამპანიის გამოცხადებასაც არ ჩქარობს, რომ ეს ბერკეტები არ შეეზღუდოს, ბიუჯეტის ხარჯზე აწყობს შეხვედრებს, მთელი ქვეყნის მასშტაბიტ ფლობს მისთვის სასურველ საინფორმაციო საშუალებებს, რომლებიც მხოლოდ მის პირსა და ოპოზიციის დისკრედიტაციაზე მუშაობენ. არადა, ქვეყნის პრეზიდენტი, რომელიც ამავდროულად მმართველი პარტიის თავმჯდომარეცაა, სამართლიანი და თანაბარი გარემოს გარანტორობას ჩემულობს. განვლილ მოვლენებსა და არსებულ სიტუაციას თუ გადავხედავთ, მოსალოდნელია, რომ სურათი, რაც დღეს გვაქვს, არც შეიცვლება და როგორც  „ქართული აკადემიის“ წევრი, თემურ ნანეიშვილი ამბობს, ყველაფერი ხალხზე, ქართულ საზოგადოებაზეა დამოკიდებული, მან უნდა გადაწყვიტოს ასე ცხოვრება სურს თუ არა.

ბატონო თემურ, სიახლე აღარ არის ის ქმედებები, რასაც ხელისუფლება ოპოზიციური პარტიების მიმართ ახორციელებს, ეს იქნება ანგარიშების დაყადაღება თუ აქტივისტების დაპატიმრება ან რაიმე პროვოკაციების მოწყობა, შეიქმნა თუ არა საზოგადოებაში შთაბეჭდილება, ამ ყველაფრით რისი მიღწევა სურს ხელისუფლებას და საითკენ მიჰყავს პროცესები?

- ხელისუფლებას არჩევნები არ აწყობს, არ უნდა არჩევნების გზით შეინარჩუნოს ძალაუფლება და ამ ორი თვის წინ მიხეილ სააკაშვილს ისიც კი წამოსცდა, რომ ოპოზიცია ცდილობს, არჩევნებში ჩაგვითრიოს და ნურას უკაცრავადო. წარმოგიდგენიათ რას ნიშნავს, როცა უმაღლესი ხელისუფალი ამბობს ამას?

ის ხედავს, რაც მოხდა თბილისში, ქუთაისში, რა მოხდა ოზურგეთში და დარწმუნებული ვარ, ძალიან კარგად იცის, რა ვითარებაა მცხეთა-მთიანეთში.

მე თითქმის ყოველდღე მიწევს ამ რეგიონში სიარული, ვხედავ განწყობებს და შემიძლია, გითხრათ დღეს ისეთი სიტუაციაა, რომ ფაქტობრივად, ორხელისუფლებიანობის განცდა გამიჩნდა.

ამიტომაც ის ყველანაირად ცდილობს, რომ გავიდეს საარჩევნო სივრციდან. ვნახოთ, უცხოეთი რა შეფასებას მისცემს ხელისუფლების ქმედებებს. უცხოელების შეფასება ძალიან მნიშვნელოვანია, მაგრამ თვითონ ქართველი ხალხი ძალიან კარგად ხედავს, რაც ხდება და შიდა ქართლის მოსახლეობა ძალზე აღშფოთებულია, იმითი, რაც მოხდა გორის რაიონში, სოფელ მერეთში. ნაცნობებმაც კი დამირეკეს და მითხრეს, ასე ცხოვრების გაგრძელება შეუძლებელია, ეს როგორ გაგვიბედეს ქართლელებს, ვიღაც ცხრა „ზონდერი“ მოვიდა და ასეთი რამ იკადრაო.

ეს ყველაფერი უკვე წააგავს პოლიტიკურ მარაზმს. ეს თუ განახორციელეს და მაგათ რა ჭკუა დაუშლის, აუცილებლად გააკეთებენ - პარტიების ქონებას დააყადაღებენ. რაც ნიშნავს იმას, რომ ამ პარტიებმა უნდა შეწყვიტონ წინასაარჩევნო კამპანიის წარმოება. და ამას ჰქვია, რომ დარჩება ბრძოლის ველზე „პადოშას“, დავითაიას პარტია, „ნაციონალური მოძრაობა“ თავისი სატელიტებით და ეს იქნება მრავალპარტიული, დემოკრატიული პარლამენტი, სადაც კონკურენტული გარემოა?

ეს იქნება სამართლიანი და კონკურენტუნარიანი არჩევნები? ამას არავინ არ ცნობს, სააკაშვილი გვიბიძგებს მხოლოდ იმისკენ, რომ ქუჩაში გამოვიდეთ, ეს არის მისი მიზანი.

თუმცა ქუჩაში გამოსვლა, ალბათ, არ არის ოპოზიციისთვის საუკეთესო გამოსავალი...

- რა თქმა უნდა, ასე რომ იყოს, მაშინ ჩვენ ამ გზას არ დავადგებოდით. მე პოლიტიკოსი არ გახლავართ და როდესაც, ვამბობ ჩვენ-მეთქი, იმ აზრს გამოვხატავ, რაც უმრავლესობაშია, ქუჩაში გამოსვლაც ერთ-ერთი გზა არის, თუმცა ამ გზით არ წავიდა არც ბიძინა ივანიშვილი და არც კოალიცია. ეს ჩვენთვის მისაღები არ არის, მაგრამ მიხეილ სააკაშვილი და მისი ხელისუფლება ყველანაირად ცდილობს, ამისკენ გვიბიძგოს. იმიტომ, რომ  ხალხზე გავლენა დაკარგა და იცის, რომ არჩევნებში აუცილებლად დამარცხდება.

ამ ზეწოლის მიუხედავად, რაც ბოლო პერიოდში ოპოზიციის მიმართ ხდება, დასავლეთისგან არ მოგვისმენია, არც აღშფოთების და არც შეშფოთების გამომხატველი ფრაზები, როგორ ფიქრობთ, რა ხდება, დასავლეთმა ასე ვთქვათ „ხელი დაიბანა“ ყველაფერზე თუ უბრალოდ, ჯერ კიდევ პროცესების დაკვირვების პროცესში არიან?

- როგორც ჩანს, დასავლეთი მასალებს აგროვებს. როდესაც გურიაში ვიყავით საზოგადოების წარმომადგენლები, ლანჩხუთის მოსახლეობას ვხვდებოდით და ლანჩხუთის კოლონა ჩვენ წამოვიყვანეთ. როდესაც კოლონა უკვე ეწყობოდა და ხალხი უკვე ემზადებოდა ოზურგეთისკენ წასასვლელად, ამ დროს მოვიდა ჩემთან ორი დამკვირვებელი, თავიანთი სავიზიტო ბარათი მომცეს, ამიხსნეს, რომ ოფისი ჰქონდათ ფილადელფიაში და თუ მოგზაურობისას ან შემდეგ რაიმე პრობლემა შეგექმნებათ, აუცილებლად დაგვიკავშირდითო.

გვკითხეს კიდეც ველოდებოდით თუ არა რაიმე ინციდენტს და ვუპასუხე, რომ მოსალოდნელი იყო - ორმოცი წელია ლანჩხუთში დავდივარ, იქ სახლი მაქვს და ამდენი ტექნიკა, რაც მაშინ იყო გარეთ გამოყვანილი, არ მენახა. ცენტრალურ მოედანზე იყო ეს ტექნიკა მობილიზებული, რომ იქ ხალხი არ შეკრებილიყო.

ალბათ, ისიც ახსოვს ყველას, გასულ წინასაარჩევნო პერიოდში გზებზე ლურსმნები რომ დაყარეს, გადაადგილება რომ არ მომხდარიყო. ვუთხარი, რომ ასეთი გამოცდილება გვქონდა და ეს ამბებიც მოვუყევი უცხოელებს.

ამით იმისი თქმა მინდა, რომ პროცესებზე დაკვირვება მიმდინარეობს და ალბათ, რაღაც რეაქცია იქნება, იმიტომ, რომ ამას წინასწარ თვითონვე ამბობდნენ. მე წესიერი კაცი ვარ და მჯერა, ვიღაც სიტყვას რომ იტყვის, მერე ამას შეასრულებს.

აშშ-ს სახელმწიფო დეპარტამენტის, ნატოს, ჰილარი კლინტონის და რა ვიცი ვისი ვიზიტები არ იყო და ყველა შემთხვევაში ყურადღება გამახვილებული იყო ერთი მიმართულებით, რომ არჩევნები უნდა ჩატარდეს სამართლიან და კონკურენტულ გარემოში. რა კონკურენტულ არჩევნებზეა საუბარი, თუ პარტიებს მოძრაობაც კი აუკრძალეს.

დაყადაღება იმას ნიშნავს, რომ ესენი წინასაარჩევნო კამპანიას ვერ ჩაატარებენ, სოფლებში ვერ ივლიან, მანქანით ვერ გადაადგილდებიან და ა.შ. ეს ნიშნავს, რომ ხელისუფლება აგონიაშია და სრულ უარს უცხადებს დასავლეთს. ვნახოთ აბა, რას იტყვიან უცხოელები ან რა უნდა თქვან, წინასაარჩევნო კამპანია ფაქტობრივად, გამოცხადებამდე დაიხურა.

თუმცა კოალიციაში შემავალმა პარტიებმა უკვე განაცხადეს, რომ თუკი ანგარიშებს დაუყადაღებენ, ყველაფერს გააკეთებენ იმისათვის, რომ წინასაარჩევნო კამპანია არ შეწყვიტონ, ამის შესახებ განაცხადა კიდეც „რესპუბლიკელების“ ერთ-ერთმა ლიდერმა, თინა ხიდაშელმა. ეს როგორ შეიძლება, მოხერხდეს?

- ამ საარჩევნო კამპანიაში უამრავი ხალხი მონაწილეობს ყოველგვარი ანგარების გარეშე, აგერ, 90 წელს მიღწეული რეზო ჩხეიძე დადის ჩვენთან ერთად, უამრავ ხალხს ვხვდებით და ვესაუბრებით. მათგანაც საოცარი განწყობა მოდის, ამბობენ, რომ ყველაფერს გააკეთებენ არჩევნებში გასამარჯვებლად, ანთებულია ხალხი.

ბატონო თემურ, იმის მიუხედავად, რომ რეგიონებში ინფორმაციის ხელმისაწვდომობის პრობლემაა და დედაქალაქსა და რეგიონებში აბსოლუტურად განსხვავებული საინფორმაციო ველია, როგორ გხვდებათ მოსახლეობა, მათ იციან რა ხდება ქვეყანაში თუ ამას თქვენგან იგებენ?

- ყველგან, სადაც არის ტელევიზია თუ არ არის, ერთნაირი უკმაყოფილებაა. ყველამ ძალიან კარგად ვიცით, რომ ტელევიზიას აქვს უშველებელი გავლენა, მაგრამ როგორც ჩანს, ერთმანეთისთვის ინფორმაციის, აზრის მიწოდებით, ისე დატრიალდა ყველაფერი და ისეთ დონეზე ავიდა, რომ ყველგან ერთნაირი ინფორმაციაა, სადაც არის ტელევიზია და სადაც არ არის, ყველგან ერთნაირად არიან შეწუხებული ამათი მმართველობით, ყველა ამათი წინააღმდეგია, არ ვგულისხმობ სახელისუფლებო რესურსს.

ვინც ჩვენთან შესახვედრად გამოვიდა, შემდეგ ათი იმდენი ხალხი წამოვიდა ქუთაისსა და ოზურგეთში, ხომ ბუნებრივია, რომ ამდენ ხალხს ჩვენ ვერ შევხვდებოდით. ახლაც ასეთი მდგომარეობაა, ყველამ ყველაფერი იცის.

ერთი რამ შევნიშნე, თუ საყვედურს გვეუბნებიან, იცით რაზე? ასეთ დღეში რომ არიან. ფაქტობრივად, ივანიშვილისგან რომ სურთ ამ პრობლემების მოგვარება, ამით ქვეცნობიერად უკვე ორხელისუფლებიანობას აღიარებენ. ივანიშვილს კი არავითარი ბერკეტი არ აქვს, მათი მოთხოვნები რომ დააკმაყოფილოს, ეს მოთხოვნები ხელისუფლებას უნდა წაუყენონ და არა იმ ადამიანს, რომელიც ჯერ ხელისუფლებაში არ მოსულა.

ფაქტია, რომ უამრავ ადამიანთან გიწევთ საუბარი, ძირითადი ტენდენცია, რაც მოსახლეობას ყველაზე მეტად აწუხებს რა არის, ეს სოციალური პრობლემებია?

- მე ასე აღვიქვი, რომ მათი სატკივარი უფრო გადაიხარა ზნეობრიობისაკენ. შეწუხებულები არიან იმითი, რომ ღირსებადაკარგულად გრძნობენ თავს, რომ სამართალი არ არის.

 სოციალური პრობლემებიდან, ყველაზე მეტად უმუშევრობა აწუხებთ. კონკრეტულ თემებზე აღარ ლაპარაკობენ, ადრე ხომ იყო, საწვავიო, სიმინდიო და ა.შ. ახლა ამეებზე აღარ ლაპარაკობენ.

როდესაც ინფორმაციის ხელმისაწვდომობის შესახებ კანონპროექტზე მუშაობა მიმდინარეობდა, ხელისუფლებამ მიიღო გადაწყვეტილება, რომ საკაბელო ტელევიზიებმა ალტერნატიული ინფორმაციის მიწოდება უნდა შეწყვიტონ არჩევნების წინა დღეს. როგორ ფიქრობთ ეს ხომ არ ნიშნავს, რომ ხელისუფლება არჩევნების შემდეგ რაღაცისთვის ემზადება?

- რას ქვია, უნდა შეწყვიტონ, რატომ უნდა შეწყვიტონ, რასაც ეგენი გააკეთებენ ის რომ არ გაშუქდეს? ამას რა თქმა უნდა, არავინ არ მოუწონებს, საქართველოს საზოგადოება არ მიიღებს ამას. რა თქმა უნდა, დესტაბილიზაციას გამოიწვევს, მათ იციან, რაც აქვთ დაგეგმილი, რისი გამოცხადებაც უნდათ და იმიტომაც სურთ, რომ ასე მოხდეს, მაგრამ მაინც გაშუქდება და ხალხი მაინც გაიგებს ყველაფერს, ყველა შემთხვევაში. ამას ვერ დაფარავენ.

ცოტა ხნის წინ აფხაზური მხრიდან რამდენიმე განცხადება გაკეთდა, სადაც მინიშნება იყო, რომ შესაძლოა სააკაშვილმა საგანგებო მდგომარეობაც კი გამოაცხადოს იმისათვის, რომ არჩევნები არ ჩატარდესო, როგორ ფიქრობთ, მსგავსი რამ მართლაც მოსალოდნელია?

- ჩემი სუბიექტური შეხედულებაა, რომ ეს მისი ოცნებაა. რა თქმა უნდა, ყველაფერს გააკეთებს ხელისუფლება იმისათვის, რომ არჩევნები ჩაშალოს და ერთ-ერთი შეიძლება იყოს კიდეც საგანგებო მდგომარეობის გამოცხადება. ამისი საბაბი რა იქნება, ეს მათი ფანტაზიისა და ნამოღვაწარის შედეგი იქნება. ფაქტია, რომ არჩევნებზე გასვლა არ უნდათ.

ამას რა შეიძლება დაუპირისპირდეს, იმიტომ, რომ თუ მსგავსი რამ მოხდა, პრაქტიკულად გამოუვალ სიტიუციაში აღმოჩნდება საზოგადოება...

- ქართულმა საზოგადოებამ ერთხელ უკვე გადაყლაპა ის არასწორი და არათანმიმდევრული ნაბიჯები, რამაც მიგვიყვანა 2008 წლის ომამდე. იმედია ამას ვეღარ გაბედავს.

საზოგადოება სააკაშვილის მოღვაწეობას უკვე სხვანაირად აფასებს. აღარ არის ის დემოკრატიის შუქურა და ახლა ასეთები აღარ გაუვა. ეს იქნება მისი ყველაზე სასოწარკვეთილი ნაბიჯი. მისი სასოწარკვეთილება დღევანდელ გადაწყვეტილებებშიც ჩანს. ქვეყნის ნორმალურად მართვის ბერკეტებს ეს კაცი ხელიდან უშვებს და თეთრი ძაფით ნაკერ საქმეებს იწყებს, რომ რამენაირად ისეთ კონფლიქტამდე მიიყვანოს სიტუაცია, რომ ხალხი ქუჩაში გამოიყვანოს.

ხელისუფლებამ უკვე დაიწყო მორიგი საინფორმაციო შეტევა. უშვებს თავის „ცნობილ“ ფილმებსა და ე.წ. ფარულ ჩანაწერებს, დააკავეს კიდეც „ქართული ოცნების“ წარმომადგენლები, როგორ ფიქრობთ, ამ ყველაფერს საზოგადოება როგორ აღიქვამს?

- ეს ყველაფერი მხოლოდ სასოწარკვეთილებაში მყოფი ხელისუფალის ქმედებებია. ჩვენს თავებში, რასაც ეგენი მოიფიქრებენ, ის არ მოიხარშება. ამის შემდეგ სულ ასეთი ავანტურები იქნება. როგორც ჩანს, ბატონმა ბიძინამ ეს ყველაფერი იცოდა და იმიტომ ამბობს ასე მტკიცედ, რომ ვერ გამაჩერებენო.

მან იცის მათი წარსული, რაც იყო ჟვანიას, პატარკაციშვილთან მიმართებაში და უამრავ სხვა ადამიანთან, პარტიებსა თუ ტელევიზიებთან მიმართებაში. რატომ ფიქრობს ვინმე, რომ ისევ რაიმე ამდაგვარს არ გააკეთებენ? რა თქმა უნდა, ამ გზით წავლენ, იმიტომ, რომ  ეს არის დამნაშავეთა ბანდა, რომელმაც ხელში ჩაიგდო ხელისუფლება და არაფრის დიდებით არ უნდათ ხელიდან გაშვება ამ ძალაუფლების. ამიტომ ყველა ხერხს იხმარენ იმისათვის, რომ შეინარჩუნონ, მაგრამ არ გამოვა. ასე ეგონათ ჩრდილო-აფრიკელ დიქტასტორებსაც, მაგრამ ხომ ნახეთ რითი დამთავრდა.

რისთვისაც „ქართულ ოცნებასა“ და ბიძინა ივანიშვილს აჯარიმებს კონტროლის პალატა, თავად „ნაციონალური მოძრაობა“ ბევრად უფრო ხშირად მიმართავს ამ ხერხს, ისეთ ქმედებას რასაც ამომრჩევლის მოსყიდვის კვალიფიკაცია თავისუფლად შეიძლება მიენიჭოს, მაგალითად, კომუნალური დავალიანებების ჩამოწერის დაპირება, სტუდენტებისთვის შეღავათიანი ბარათების, პენსიონრებისთვის სათვალეების დარიგება და ა.შ. როგორ ფიქრობთ, ასეთ შემთხვევაში რა შეიძლება გააკეთოს ოპოზიციამ?

- ბიძინა ივანიშვილის იურისტებმა უნდა ივაჟკაცონ და დაამტკიცონ, რომ „ნაციონალური მოძრაობის“ მხრიდან ყოველდღიურად ხდება ამომრჩევლის მოსყიდვა. ასეთი ფაქტები ყოველდღეა და მე მიკვირს, რატომ ვერ ხერხდება ამის ისეთნაირად ფორმულირება, რომ ქართულ სასამართლოში მოგების შანსი კი არ არის, მაგრამ საერთაშორისო საზოგადოებას მაინც დაანახონ რას აკეთებენ ესენი და რის გულისთვის აყადაღებენ ოპოზიციას.

 იურისტებმა უნდა დააყენონ სწორად საკითხი, რასაც მე სამწუხაროდ, ვერ ვხედავ. ხომ ნახეთ კახეთის გუბერნატორი რესტორანში სკოლის დირექტორებს რომ ხვდება, ერთ-ერთი დირექტორი ამბობს, მე ყოველდღე ამ რესტორანში ვქეიფობო - სკოლის დირექტორი ხარ თუ მოქეიფე-ყარაჩოღელი, ამას როგორ ამბობ - აბსურდში გადავიდა, რომ როგორმე თავი დაეცვა. მოსყიდვაა გიორგი ღვინიაშვილს სკოლის დირექტორები რესტორანში რომ დაჰყავს, აბა მოსყიდვა სხვა რა არის!?

უკვე ცნობილია, „ნაციონალური მოძრაობის“ ტაქტიკა, იმ ადმინისტრაციული რესურსის გათვალისწინებით რასაც ის ფლობს და იყენებს. არჩევნებამდე სამი თვე დარჩა და ეს ზეწოლა სავარაუდოდ, კიდევ უფრო გაიზრდება, თქვენ ხედავთ რესურსს, რომ ოპოზიციამ ამ წნეხს გაუძლოს?

- მე შემიძლია ვარაუდი გამოვთქვა, რომ მარტო კოალიცია, კი არა, მთელი საზოგადოება, ხალხი, ვისაც მე ვხვდები, ის უბრალო და გინდა ბრალიანი ადამიანები, რომელსაც მობეზრდა ასე ცხოვრება, მათ უნდა გადაწყვიტონ ეს საკითხი და ამ ყველაფერს ჭკვიანურად უნდა უხელმძღვანელონ კოალიციის ლიდერებმა და კოალიციამ.

ახლა ყველაფერი ხალხზეა დამოკიდებული და ხალხმა ნათლად დაინახა რა ხელისუფლების ხელშია, უკვე აღარ ტყუვდება, იმ 30-ლარიან საკენკზე კი არა, 500-ლარიანი ვაუჩერი რომ დაარიგონ, მგონია, რომ  მაინც არ აკენკავენ. აგორებულია ზვავი და ამას ვეღარაფერი გააჩერებს, ეს შეუქცევადი პროცესია.