"ჩვენთვის 45 პროცენტიც არ იქნება საკმარისი, ვფიქრობ, რომ 2/3–ით გავიმარჯვებთ“,,– აცხადებს იგი ამერიკის ხმისთვის მიცემულ ექსკლუზიურ ინტერვიუში, რომელიც 19 მაისს „ბიზნეს–ცენტრში“, სოლოლაკში განთავსებულ ბიძინა ივანიშვილის ოფისში შედგა.

როგორ შეაფასებდით საკუთარ შანსებს საარჩევნოდ? 

ბიძინა ივანიშვილი: როგორც პოლიტიკაში მოსვლის პირველივე დღეს განვაცხადე, ძალიან დიდი ალბათობით ხმების 2/3–ს მოვიპოვებთ. დღესაც ვრწმუნდები, რომ სწორად მქონდა ნაფიქრი, დაგეგმილი და გააზრებული. ეს არის საფუძველი იმისა, რომ აუცილებლად გავიმარჯვებთ. ის რაც მოხდა საფრანგეთში, სადაც ხელისუფლებამ პროცენტნახევრით წააგო და წავიდა, ასეთი რამ საქართველოსთვის წარმოუდგენელია. ჩვენი ხელისუფლება ხმების ასეთი მცირე სხვაობის შემთხვევაში არ წავა, ამიტომ ჩვენ დიდი უპირატესობით უნდა გავიმარჯვოთ და შევქმნათ ხელისუფლების მშვიდობიანი წასვლის პრეცედენტი პირველად ისტორიაში. 

ამერიკის ხმა: რა გაძლევთ ასეთი ოპტიმიზმის საფუძველს?

ბიძინა ივანიშვილი: საქართვველოს მოსახლეობა და მათი განწყობის ცოდნა. მეგონა, თბილისშია საქმე მარტო კარგად და რეგიონებში ცუდად, თუმცა ვცდებოდი. რეგიონებშიც ძალიან კარგად გვაქვს საქმე და ამაში არაა იმდენად ჩვენი დამსახურება, რამდენადაც სააკაშვილის და მისი გუნდის, რადგან მათ თავი შეაზიზღეს ხალხს თავისი ქცევით. მოსახლეობაში, ჩვენი ოპონენტების ერთადერთი იარაღი არის დაშინება. თუმცა ისინი არ იცნობენ ქართველებს, მათ ისტორიას და თავისუფლებისკენ ლტოლვის სურვილს. მათი მხარდამჭერი დღეს არის მხოლოდ ის, ვინც ჯერ კიდევ ვერ ბედავს მათ წინააღმდეგ გამოსვლას შიშის ფაქტორის გამო. შიშის დაძლევა იოლი არ არის, თუმცა ჩვენ ვმუშაობთ ამაზე. გავანაწილეთ შტატები რეგიონებში და ჩემდა გასაოცრად, იქ სიტუაცია ვითარდება გაცილებით სწრაფად და იოლად, ვიდრე მე მეგონა. ჩვენ ვიბრძვით, რომ ხალხი გავათავისუფლოთ ხელისუფლების ძალადობისგან. მათ გონიათ, მათ აქვთ დიდი ძალა, ჩვენ კი გვგონია, რომ ჩვენი ძალა უფრო დიდია, რადგან ჩვენ იმას ვაკეთებთ, რაც ხალხს სურს. მე ვფიქრობდი, უფრო გაუჭირდებოდა ხალხს შიშის დაძლევა, თუმცა ასე არაა. ამის კარგი მაგალითი სამეგრელოა, ყველაზე რთული რეგიონი, სადაც უდიდესი ზეწოლაა ხალხზე. ხელისუფლებას ჩვენი საყვარელი მეგრელები ყველაზე ცუდ დღეში ყავს, მაგრამ ალასანია როდესაც ჩავიდა იქ, ხალხი ბევრიც მოვიდა და საოცარი ერთსულოვნებაც აჩვენა. 

ამერიკის ხმა: რას შეცვლით უმრავლესობაში მოსვლის შემთხვევაში, სტრუქტურული 
თვალსაზრისით? რას დაუკავშირდება თქვენი პირველი რეფორმა?

ბიძინა ივანიშვილი: მე უკვე კარგად ვერკვევი რა ხდება საქართველოს პოლიტიკურ სისტემაში, კარგად შევისწავლე ჩემი გუნდი და ზუსტად ვიცი, ვინ სად მოხვდება, როდესაც ხელისუფლებაში მოვალთ, მხოლოდ ამას ჯერ არ ვახმაურებ. ამის შემდეგ, მყისიერად უნდა აღდგეს სამართლიანობის განცდა ქვეყანაში. სასამართლოს მიეცეს თავისი ფუნქცია, გათავისუფლდეს მედია ზეწოლისგან, გათავისუფლდეს ბიზნესი. ელიტური კორუფციაც მოისპოს, საერთოდ, ყველაზე იოლი ელიტური კორუფციის დამარცხებაა. პირობას ვაძლევ მოსახლეობას, ჩვენი მოსვლიდან ორი თვის შემდეგ ეს აღარ იქნება. შემდეგ კი რაღაც პროცესებს დრო დასჭირდება. უნდა დავარწმუნოთ საზოგადოება დემოკრატიული ინსტიტუტების მშენებლობაში. ამას პირველები შეამჩნევენ ჩვენი ემიგრანტები, რომლებიც უცხოელებთან ერთად იფიქრებენ ინვესტიციების ჩადებაზე საქართველოში. მე კარგად ვიცი, რომ ჩვენი უმთავრესი პრობლემა უმუშევრობაა. კონკურენტუნარიანი გარემოს შექმნით, შევძლებთ მის დაძლევას. 

ამერიკის ხმა: რას ფიქრობთ საბიუჯეტო პრიორიტეტებზე? რას შეცვლით თქვენ ბიუჯეტის დაგეგმვისას?

ბიძინა ივანიშვილი: ჩვენი პრიორიტეტი იქნება სოფლის მეურნეობა. მე პროქეტი უკვე მზად მაქვს დიდი ხანია და სააკაშვილსაც ვთავაზობდი მის განხორციელებას, ფულსაც ვთავაზობდი, რაზეც მაშინ უარი მითხრა. მე გაოცებული ვიყავი ამის გამო, თუმცა ახლა კარგად ვხედავ რის გამოც. მას უნდა გაღატაკებული და გაკოტრებული ხალხი, რომ მარტივად მართოს, ჩაუტანოს ერთი ტომარა ფქვილი და აძახებინოს „სააკაშვილს გაუმარჯოს“, მეორე უმთავრესი საკითხია ჯანდაცვის უზრუნველყოფა. საერთოდ, ბევრი რამ ხელახლა გასაკეთებელია. მე ვიტყოდი, ამათი კეთების შემდეგ, გასაკეთებელი კიდევ უფრო მეტია. 

ამერიკის ხმა: დღეს–დღეობით ქვეყნის თავდაცვას ბიუჯეტის სოლიდური ნაწილი მიაქვს. თქვენს შემთხვევაში როგორ გადანაწილდება თანხები?

ბიძინა ივანიშვილი: კონკრეტულ შეფარდებებს ბიუჯეტში ახლა ვერ დავასახელებ, მაგრამ რაც სააკაშვილმა და მისმა ხელისუფლებამ გააკეთა ამ კუთხით, უამრავი უმეცრება შეიძლება დავინახოთ. დაწყებული ტანკების შესყიდვიდან, შემდეგ იმ ავანტურაში ჩართვით, როგორც დაიწყეს ომი. რაც დაფინანსება იყო, ქარს და წყალს გაატანეს. საერთოდ, თავდაცვას მიხედვა უნდა. როგორი დონის და რამხელა თავდაცვის სისტემა უნდა ჰქონდეს ქვეყანას, ამას მარტო მე ვერ გადავწყვეტ, გადავწყვეტთ გუნდურად და შევუთანხმებთ საქართველოს მოსახლეობას. რაც მთავარია, დაგეგმავთ სწორად. ისიც არ შეიძლება, რაც იყო 2003 წელს, როდესაც ეს ხელისუფელბა მოვიდა. მე დავიწყე დახმარება, გარნიზონების მშენებლობა, იმ დროს ჯარისკაცები დახეული ბოტასებით და ჯინსებით დადიოდნენ. მე ამაზე თავის დროზე ვიზრუნე. რა თქმა უნდა, სახელმწიფოს შესატყვისი ჯარი უნდა ჰყავდეს, მაგრამ მე მგონია, ამათ ეს არ აქვთ გათვლილი და გააზრებული, ერთი ადამიანი, სააკაშვილი წყვეტს ყველაფერს. მას მოუნდა ოდესღაც, რომ კოსმიური შეიარაღება ჰქონოდა ჯარს, რის რეალური შესაძლებლობა და საფუძველიც არ არსებობდა, შემდეგ მოულოდნელად ბიუჯეტის დიდი ნაწილი ჩამოაჭრა და სხვაგან გადაიტანა. ჩვენ გეგმიურად, ჩვენი შესაძლებლობიდან და საჭიროებიდან გამომდინარე ოპტიმალურ ვარიანტს შევქმნით. 

ამერიკის ხმა: არის თუ არა კოალიციის შიგნით ნატოს საკითხზე კონსენსუსი? 

ბიძინა ივანიშვილი: კოალიცია ერთსულოვანია ნატოს საკითხში. ჩვენი ბედია ევროპა და ევროპისკენ სვლა. ამაში ჩვენ არ ვართ განსაკუთრებულნი, ნებისმიერმა საღად მოაზროვნე ადამიანმა იცის, რომ ევროპულ დემოკრატიულ სტუქტურებზე უკეთესი მოდელი კაცობრიობას ჯერ არ მოუგონია. ამიტომაც, სრულიად ბუნებრივია, ჩვენი, კოალიციის არჩევანიც ევროპა და ევროატლანტიკური კავშირების გამყარებაა, რაც უალტერნატივოა უსაფრთხოების თვალსაზრისით. გასაგებია, რომ რუსეთთან ურთიერთობები აუცილებლად უნდა დალაგდეს. ერთ–ერთი ჩვენი სტრატეგიული გეგმა ამას ეხება. ამის აუცილებლობას ვგრძნობთ და ვაცნობიერებთ სირთულეს, მაგრამ უნდა შევძლოთ. ესაა დიპლომატია და ამიტომ მოვდივართ ჩვენ. ესაა სახელმწიფო მოხელეების ვალდებულება და არა ის, რაც სააკაშვილმა გააკეთა, თავისი ემოციურობით, როდესაც სრულიად გააფუჭა ურთიერთობა რუსეთთან. ჯერ ცივი ომის მდგომარეობაში გადაიყვანა თავისი რიტორიკით, რასაც 2008 წელი მოჰყვა. ამის თავიდან აცილება შეიძლებოდა სწორი ქმედებით. დღეს კიდევ ჩვენი ტერიტორიების 30 პროცენტი ოკუპირებულია. ეს არ არის მარტივი პროცესი, თუმცა აუცილებლად დავძრავთ მდგომარეობას მკვდარი წერტილიდან, აუცილებლად დავიწყებთ რუსეთთან მოლაპარაკების პროცესს. შევეცდებით დაველოდოთ დროს, რომ რუსეთთან ინტერესების თანხვედრით ვისარგებლოთ. რუსეთისთვის, ჩემი აზრით არ არის საინტერესო აფსაზეთისა და სამხრეთ ოსეთის ტერიტორიები. ეს რუსეთს თავად შეუქმნის საფრთხეს, როგორც უსაფრთხოების მხრივ, ისე დემოკრატიულ ქვეყნებთან უერთიერთობის თვალსაზრისით. ურთიერთობების აღდგენა რთულია, მაგრამ არა შეუძლებელი. ჩვენ, ქართველებმა უნდა მოვახრხოთ და შევქმნათ ისეთი თბილი სიტუაცია, რომ პირველ რიგში, თავად ქართველებს ჰქონდეთ სურვილი აქ დაბრუნების, ამის შემდგომ ჩვენი ძმები ოსები და აფხაზებიც სხვაგვარად შეხედავენ სიტუაციას და სხვაგვარად გადააფასებენ. რუსეთთანაც გაიოლდება სიტუაცია, როდესაც ჩვენ ნორმალური, დემოკრატიული ქვეყნის მშენებლობას დავიწყებთ. და სამართლიანობას აღვადგენთ. ეს ყველაფერი ჯერ შიგნით უნდა გადაწყდეს, ჩვენ უნდა ვაჩვენოთ, რომ შიგნით შეგვიძლია პროცესების მოგვარება.

ამერიკის ხმა: გაქვთ თუ არა პირდაპირი კონტაქტები აფხაზებთან და ოსებთან და როგორ აპირებთ რუსეთის ფაქტორის გარეშე მათთან საუბარს? 

ბიძინა ივანიშვილი: საუბედუროდ, მე არ მაქვს პირდაპირი ურთიერთობები აფხაზებთან და ოსებთან. ჩემი ცხოვრების წესიდან გამომდინარე, ჩაკეტილი ცხოვრებით ვცხოვრობდი და ასეთი კავშირებით არ ვსარგებლობდი. პოლიტიკაში მოსვლის შემდეგ, მოკლე დროში ურეთიერთობის დამყარებას ვერ მოვახერხებდი და მართალი გითხრათ, დიდი მცდელობაც არ მქონია. თუმცა კოალიციის წევრები ამას ცდილობენ, მათ აქვთ გარკვეული კავშირები, რომელთა გაღრმავებას ვცდილობთ. რუსეთის ფაქტორის გარეშე, ჩვენ ალბათ უკვე ვეღარ მოვახერხებთ ჩვენ ძმებთან, აფხაზებთან და ოსებთან მოლაპარაკებას. ძალიან დიდი და მძიმე საკითხი ამ მხრივ რუსეთი იქნება, რომელსაც დიდი როლი ექნება. ჩვენ ამას კარგად ვაცნობიერებთ და ყველაფერს გავაკეთებთ იმისთვის, რომ რუსეთთან უერთიერთობა დავალაგოთ. 


ამერიკის ხმა: ბატონო ბიძინა, თქვენ საუბრობდით ნატოსკენ და ევროსტრუქტურებისკენ უალტერნატივო სწრაფვაზე. როგორ წარმოგიდგენიათ საუკეთესო ურთიერთობების შენარჩუნება ერთდროულად რუსეთთან და ნატოსთან და ამ ყველაფრის პარალელურად აფხაზეთთან და ცხინვალთან კავშირის აღდგენა?

ბიძინა ივანიშვილი: სააკაშვილმა, თავის დროზე ნატო გამოიყენა რუსეთის გამაღიზიანებლად. ამით აბრაზებდა და აღიზიანებდა, თითქოს ნატოში შესვლა რუსეთისთვის იყო დამაქცევარი და კატასტროფა. რეალურად ეს ასე არაა. ნატო ცდილობს რუსეთთან ურთიერთობის დალაგებას და ამის გართულებაში სააკაშვილს დიდი წვლილი აქვს, სხვათა შორის ეს სწორედ ახლა მომივიდა აზრად. რიტორიკით, გამომწვევი საუბრით, სააკაშვილი ნატოს რუსეთის წინაშე წარმოაჩენდა ისე, როგორც ხარს უფრიალებენ წითელ ნაჭერს. მე არ მგონია, რომ ნატო, საერთოდ საფრთხეს წარმოადგენს რუსეთისთვის. ასე მიიჩნევს ბევრი პოლიტიკოსი. ეს არაა მარტო ჩვენი კოალიციის სამუშაო და ჩვენი მთავრობის. მთელი მსოფლიო მუშაობს ამ მიმართულებით და თავად რუსული პოლიტიკური ისტებლიშმენტიც. რა თქმა უნდა, ჩვენ, ამ ყველაფერში ვერ გვექნება ძირითადი როლი. მე თვალყურს ვადევნებ გლობალურ პოლიტიკას, გეოპოლიტიკას. იქაც არ ვიტყვი, რომ პროცესები ძალიან კარგად მიდის, მაგრამ არის მცდელობა, ნატოს მხრიდან, მასში შემავალი ქვეყნების მხრიდან რუსეთთან ურთიერთობების დალაგების. დარწმუნებული ვარ, საღი აზრი გაიმარჯვებს და სადღაც აქ მოხდება ჩვენი ინტერესების თანხვედრაც, რასაც მე მუდამ ვიმეორებ. მე პროგრესისკენ ვიყურები და მიმაჩნია, რომ მომავალში ნატოსა და რუსეთის ურთიერთობები დალაგდება. საქართველო შეიძლება იყოს ნატოშიც და ამავდროულად, იმეგობროს რუსეთთანაც. რუსეთისთვის არ არის ეს ყველაფერი პრინციპული. ამის კარგი მაგალითი ჩვენ გვაქვს ბალტიისპირეთის ქვეყნების სახით. ოდესღაც მათ ევროპასთან გაერთიანებას და ნატოში შესვლას რუსეთი დიდი აგრესიით შეხვდა. დღეს კი კარგი ურთიერთობებია მათ შორის. თუ ჩვენ ისევე სწორად მოვიქცევით, როგორც ბალტიისპირეთის ქვეყნები, ჩვენც შეიძლება იგივე გზა გავიაროთ და უფრო იოლადაც კი. 
მოდით, დავუბრუნდეთ ისევ საშინაო საკითხებს. 

ამერიკის ხმა: არჩევნებში უმცირესობით გასვლის შემთხვევაში, გაქვთ თუ არა სათადარიგო გეგმა და რას რას მოიცავს ეს სტრატეგია?

ბიძინა ივანიშვილი: სათადარიგო გეგმა არ გვაქვს და არ გვაქვს აბსოლუტურად შეგნებულად. დარწმუნებულები ვართ, რომ გვაქვს გამარჯვების ობიექტური შესაძლებლობები. გეგმა, ძირითადად ამაზე გვაქვს აგებული. სხვა ნებისმიერ შესაძლებლობაში, ჩვენ დავრჩებით კანონის ფარგლებში, ისე, როგორც ჩვენი ქვეყნისთვის იქნება უკეთესი. ჩვენთვის 45 პროცენტის აღებაც არჩევნებზე იქნება წაგების ტოლფასი. ჩვენ ვფიქრობთ, დიდი საფუძველი გვაქვს, მივიღოთ 70 პროცენტზე მეტი. 


ამერიკის ხმა: ჩვენი ქვეყნის უახლეს ისტორიაში არსებობს მაგალითები, როდესაც ხელისუფლების შეცვლის დიდი გეგმებით დაწყებული კამპანიები წარუმატებლად დასრულდა. მათ შესახებაც მინდა გკითხოთ. გამორიცხავთ ბურჯანაძესთან თანამშრომლობას?

ბიძინა ივანიშვილი: ბურჯანაძესთან დაკავშირებით ჩვენ ყველაფერი გავარკვიეთ. რაღაც გამონათქვამებთან დაკავშირებით იყო გაუგებარი რეაქციები. იყო ზედმეტი გაღიზიანება, რატომ იკითხეს რამეო, ამბობდნენ.

ამერიკის ხმა: არ ფიქრობთ, რომ თქვენს შორის შეხვედრა ბევრ რამეს გაარკვევდა?

ბიძინა ივანიშვილი: მე, ზოგადად წინააღმდეგი ვარ ტოტალური გაერთიანებების. ის, რომ ბურჯანაძე დღეს ოპოზიციაშია, ძალიან კარგია, ის რომ რომ მას სხვანაირი ხედვა გააჩნია და ფიქრობს, რომ არა ნატო და ევროპა, არამედ რუსეთია პირველი პრიორიტეტი, ესეც ნორმალურია და კარგია, რომ განსხვავებულად ფიქრობს. კანონიერი გზით და არჩევნებით ხელისუფლების შეცვლა რომ ილუზიაა და აუცილებლად ქუჩიდან უნდა დაწყოს წინააღმდეგობა, ესეც მისი საქმეა და აქვს უფლება ასე ფიქრობდეს. კიდევ გვაქვს შეკითხვები, თუმცა ეს ორი საკითხიც საკმარისია იმისთვის, რომ ვთქვათ: რთული იქნება ჩვენი თანამშრომლობა, რამდენადაც კოალიციაში ამ საკითხებზე განსხვავებული დამოკიდებულება არსებობს. მაგრამ მე ხაზი მინდა გავუსვა, რომ ჩვენ, კოალიციაში არ ვფიქრობთ, რომ ის თანამშრომლობს ხელისუფლებასთან, ეს უკვე ნიშნავს იმას, რომ ჩვენ ვცნობთ მათ ნამდვილად ოპოზიციურ ძალად, განსხვავებით სხვა ფსედო–ოოზიციური ძალებისგან. არის პარტიები, რომელთანაც ვაპირებთ თანამშრომლობას, მაგალითად, ჟორჟოლიანის პარტია, სოციალ–დემოკრატებთან, მაჟორიტარების დონეზეც, ასევე გაჩეჩილაძესთან, მწვანეების პარტიიდან და სალომე ზურაბიშვილთან. არც მათთან ვერთიანდებით, მაგრამ არ ჩანს მათი მხრიდან დიდი მოთხოვნა, დიდი იმედგაცრუება და არ არიან ისტერიკებში და არ გამოხატავენ, თუ როგორ ვბედავთ და არ ვერთიენდებით მათთნ, განსხვავებით ბურჯანაძის პარტიისგან. მომავალში თანამშრომლობას არ გამოვრიცხავთ არც ერთ პარტიასთან. ხელისუფლებაში მოსვლის შემთხვევაში, სააკაშვილის იდეოლოგებთანაც, ჩვენს ყველაზე მძაფრ ოპონენტებთანაც კი არ გამოვრიცხავთ თანამშრომლობას, თუ ქვეყნის სასარგებლო პოზიციას დაიჭერენ. ჩვენ ბურჯანაძის პარტიასთან არც გაბუტულები ვართ და არც მტრულად განწყობილი. უფრო მეტიც, მათთან ბევრი საინტერესო საქართველოსთვის სათაყვანო ადამიანია გაერთიანებული.

ამერიკის ხმა: რას მიიჩნევთ ხელისუფლების წარმატებულ რეფორმად/ნაბიჯად?

ბიძინა ივანიშვილი: დღეს, პრაქტიკულად, აღარ შემიძლია, ხელისუფლებას წარმატებული ნაბიჯი წარმატებულად ჩავთვალო. მუდამ ვამბობდი, რომ პატრულის პროექტი იყო ყველაზე წარმატებული. ევროპელები, როდესაც მეკითხებიან ჩვენს გზაზე და სტრატეგიაზე და მე ვპასუხობ, რომ ჩვენი გზა ევროპაა, მიბრუნებენ კითხვას: რამდენად ახლოსაა ქართული მოსახლეობის მენტალიტეტი ევროპასთან. მე მომყავდა პატრულის მაგალითი, როდესაც ათასობით ქართველი ძალიან სწრაფად დადგა ევროპულ გზაზე და უარი თქვა კორუფციაზე. ოდესღაც მე ვფიქრობდი, რომ ეს იყო ხელისუფლების წარმატება, თუმცა დღეს მივიჩნევ, რომ ეს მხოლოდ ქართული მოსახლეობის კულტურის მაჩვენებელია. როგორც კი სწორი პროექტი და სწორი გზა წამოსცდა ჩვენს ხელისუფლებას, მან მოახდინა სწორება და სწორი რეაქცია. დღეს კი პოლიცია მთლიანად პოლიტიზირებული გახადეს, იმის ნაცვლად, რომ ხალხს იცავდეს, მისი ძირითადი დამთრგუნავი ძალაა. ასევე არ შეიძლება დაიკარგოს, რეფორმა, რასაც წინამორბედმა ხელისუფლებამ ვერაფრით გაართვა თავი: გადასახადების ადმინისტრირება. ფულის მოგროვება ისწავლეს და ისე კარგად ისწავლეს, რომ ესეც მეორე მხარეს გადაღუნეს. ახლა რაც არაა მოსაგროვებელი, იმასაც აგროვებენ და ნებისმიერი მოქალაქის ჯიბეში ძვრებიან. ეს საკითხიც ბანალური გახდა, ამიტომ აღარ შემიძლია პოზიტივად ჩავუთვალო. არა სახელმწიფო, არამედ მაფიოზური ფუნქციის შემსრულებლად იქცნენ. ვისაც გნებავთ დაიჭერენ, საპროცესო გარიგებას დაუდებენ. სასამართლო არ არსებობს. უსამართლობის ტოტალური განცდაა ქვეყანაში, დათრგუნულია. ბიუჯეტი არ გაზრდილა ეკონომიკის ხარჯზე, უბრალოდ წინა მთავრობა ფულის მოგროვებას ვერ ახერხებდა. 
პოლიციაზეც ძალადობა მიდის სააკაშვილის მხრიდან. პოლიციელების უმრავლესობას, დარწმუნებული ვარ, საერთოდ არ მოსწონთ ის უკანონობები, რასაც მისგან ითხოვენ და ისინიც ახორციელებენ. ამას აკეთებს ერთი ადამიანი. რა თქმა უნდა, პოლიციაც მიიღებს დიდ შეღავათს, როდესაც ჩვენ მოვალთ ხელისუფლებაში. ჩვენ გვყავს უამრავი პატივსაცემი პოლიციელი. თქვენ შეგიძლიათ ნახოთ კადრები, როდესაც ჩვენი კოლონა გააჩერეს, დაახლეობით ერთი თვის წინ საჩხერეში. ერთ–ერთი აბსოლუტურად ინტელიგენტური და საღად მოაზროვნე პოლიციელი იყო, თუმცა მან აზრის გამოთქმა ვერ შეძლო, რადგან იქ პოლიციის მეორე მანქანა იდგა და მასზე იყო დამოკიდებული. ის ვერ მოქმედებდა კანონის შესატყვისად, მას კარნახობდნენ ზემოდან, რა უნდა ექნა. ისინი ჩემს თვალწინ განიცდიდნენ ძალადობას. 

ამერიკის ხმა: ორი დღის წინ დაარბიეს ანტიჰომოფობიური აქცია თბილისში. რას ფიქრობთ ჰომოფობიურ ნიადაგზე დაპირისპირებაზე ისეთ ტრადიციულ საზოგადოებაში, როგორიც საქართველოშია? 

ბიძინა ივანიშვილი: მე ჩემს პოზიციას სექსუალურ თუ რელიგიურ უმცირესობებზე ხშირად გამოვხატავ და ახლაც შემიძლია დავაფიქსირო, რომ მათ ჩვეულებრივ მოქალაქეებად მივიჩნევ და არ განვასხვავებ სხვებისგან. ექსცესები, მე მგონი დაგეგმილია ზემოდან. თუმცა ეს კონკრეტული საკითხი არ შემისწავლია და არ შემიძლია გიპასუხოთ ვინ იყო დამნაშავე. მაგრამ დიდი ეჭვი მაქვს, რომ ესეც იყო ინსპირირებული ხელისუფლების მხრიდან. როგორც ბათუმში. სააკაშვილს სურს აჩვენოს ევროპას, როგორი უკულტურო ხალხი ვართ, მეჩეთი ვერ აგვიშენებია თურმე ბათუმში. იგივე ხდება დავით გარეჯაში. ხელისუფლების იდეოლოგია იმაში მდგომარეობს, რომ ქართველები არიან უმართავი ხალხი, უკულტურო და სრული დემოკრატია ქვეყანაში არ შეიძლება. ამიტომ იგონებს სინგაპურიზაციას და ასე შემდეგ. სინამდვილეში არც სინგაპური იცის მაგან რაა, მაგრამ ფიქრობს, რომ კარგია. ეს არაა ევროპა, მაგრამ ძალიან კარგი რაღაცაა. იცით ალბათ სინგაპურული დემოკრატია და ისიც, იქ პარტიები რა დღეში არიან. მას სურს შექმნას ილუზია, რომ სააკაშვილი აშენებს კარგ ქვეყანას, მაგრამ ქართველებისთვის ზედმეტი უფლებების მიცემა არ შეიძლება, რადგან ისინი უბედურებას მოიწევენ და ამბოხი მოხდება ქვეყანაში და აჩვენებს ამის მაგალითად უცხოელებს იმას, რომ შეიძლება, ქართველები, ელემენტარულად, მეჩეთის საკითხზეც კი ვერ შეთანხმდნენ.