საქართველოს უზენაესი სასამართლოს ახალი თავმჯდომარე ნინო გვენეტაძე გარკვეულ ცვლილებებს გეგმავს, თუმცა რა მიმართულებით, ამ ეტაპზე არ აკონკრეტებს.

როგორც გვენეტაძემ დღეს ჟურნალისტებს განუცხადა, განხორციელდება ის ცვლილებები, რომლებიც დამოუკიდებელი სასამართლოს ფუნქციონირებისთვის იქნება აუცილებელი.

"ბუნებრივია, კანონის ფარგლებში განხორციელდება ისეთი ცვლილებები, რომლებიც დამოუკიდებელ და მიუკერძოებელ სასამართლოს დასჭირდება. რას შეეხება ცვლილებას, ამას შემდგომში გაცნობებთ. ამ ეტაპზე აღნიშნული მიმართულებით კონკრეტული გეგმა არ მაქვს, მაგრამ დამოუკიდებელი სასამართლოს ფუნქციონირებისთვის საჭირო და აუცილებელი ცვლილებები განხორციელდება", - აღნიშნა გვენეტაძემ.

რაც შეეხება პირველი რიგის ამოცანას, თავდაპირველად გვენეტაძე მოსამართლეებსა და სასამართლოს აპარატთან შეხვედრას გეგმავს.

"ძალიან ბედნიერი და ამავე დროს ამაღელვებელი და საპასუხისმგებლო დღეა ჩემთვის, რადგან დღეიდან ვიწყებ ჩემი უფლებამოსილების შესრულებას, სამოსამართლეო საქმიანობის განხორციელებას. პირველადი, გადაუდებელი გეგმები ამ ეტაპზე არის ჩემს კოლექტივთან - მოსამართლეებთან, სასამართლო აპარატთან შეხვედრა და ამის მერე დაეგმვა იმ ღონისძიებებისა და აქტივობებისა, რომელიც უნდა განხორციელდეს იმ მიზნით, რომ გვქონდეს დამოუკიდებელი, მიუკერძოებელი სასამართლო, იმისთვის რომ ხალხის ნდობა ამაღლდეს სასამართლო ხელისუფლების მიმართ. კონკრეტული წინადადებები თქვენი მეშვეობით ძალიან ინტენსიურად იქნება გაშუქებული და საზოგადოებას ჩავაყენებთ საქმის კურსში ყველა იმ მნიშვნელოვან სვლასთან დაკავშირებით, რომელიც ჩვენი მიზნის მისაღწევად იქნება განხორციელებული", - აღნიშნა გვენეტაძემ.