მსოფლიო კინოსამყარო, წელს „ბონდიანას“ 50 წლის იუბილეს ზეიმობს, ამ თარიღთან დაკავშირებით არაერთი ღონისძიება დაიგეგმა და ჩატარდა. მათ შორის, გაიმართა სემ მენდესის ახალი ფილმის „ჯეიმს ბონდი: ოპერაცია სკაიფოლის“ მსოფლიო პრემიერა. სწორედ ეს ფილმი გავა დღეიდან საქართველოს კინოთეატრებში „რუსთაველი“ და „ამირანი“, ამ უკანასკნელმა „ჯეიმს ბონდის“ იუბილის აღნიშვნა უფრო მასშტაბურად გადაწყვიტა.
დღეს, 1-ელ ნოემბერს, კინოთეატრ „ამირანში“ „ბონდიანას“ პირველი ფილმის ეკრანებზე გამოსვლის 50 წლის იუბილესადმი მიძღვნილი გამოფენა გაიხსნება.
ექსპოზიციაზე წარმოდგენილი იქნება 40 უნიკალური ფოტო და 5 აფიშა, ოსკარის კინოაკადემიის, მარგარეტ ჰერიკის ბიბლიოთეკიდან, რომელიც საქართველოს თეატრის, მუსიკის, კინოსა და ქორეოგრაფიის სახელმწიფო მუზეუმს ოსკარის კინოაკადემიამ ამ გამოფენისთვის ექსკლუზიურად გამოუგზავნა.
ფოტოები ლეგენდარული ფილმის ყველა ეტაპს ასახავს - ფილმზე მუშაობის კადრები, ჯეიმს ბონდის მსახიობები და ინგლისის სამეფო ოჯახის პრინცესა დაიანასა და პრინცი ჩარლზის აქამდე უცნობი ფოტოკადრები.
გამოფენის შემდეგ, უნიკალური ფოტოები მუზეუმის ფოტოფონდში დარჩება. გამოფენის ორგანიზატორები არიან: საქართველოს თეატრის, მუსიკის, კინოსა და ქორეოგრაფიის სახელმწიფო მუზეუმი და კომპანია „ბილაინი".
