საქართველოში დემოკრატიამ გაიმარჯვა, - ამის შესახებ ევროპის სახალხო პარტიის პრეზიდენტმა ვილფრედ მარტენსმა ბუქარესტში მიმდინარე 21-ე კონგრესზე სიტყვით გამოსვლისას განაცხადა.
მარტენსის გამოსვლის ქართული თარგმანის თანახმად, რომელიც საქართველოს პრეზიდენტის "ფეისბუქის" ოფიციალურ გვერდზე განთავსდა, ევროპის სახალხო პარტიის პრეზიდენტმა საქართველოში ჩატარებული დემოკრატული არჩვენების შესახებ ისაუბრა და მიხეილ სააკაშვილთან მჭიდრო თანამშრომლობის მზადყოფნა გამოთქვა, რათა ქვეყანამ ევროატლანტიკური კურსი შეინარჩუნოს.
"საქართველოში დემოკრატიამ გაიმარჯვა. პრეზიდენტი სააკაშვილი და მისი გუნდის წევრები შესანიშნავად მოქმედებდნენ წინასაარჩევნო პერიოდში, არჩევნების დღეს და არჩევნების შედეგების გამოცხადების შემდეგ. მათ აჩვენეს პოლიტიკური სიმწიფე და მოიქცნენ ისე, როგორც ჭეშმარიტ დემოკრატიას შეეფერება. საპარლამენტო არჩევნების შედეგებმა გვიჩვენა, რომ დემოკრატიამ გაიმარჯვა, მაგრამ სამწუხაროდ, ოპონენტებმა დიდი ფული დახარჯეს მხარდაჭერის საყიდლად, საქართველოში უნდობლობის განცდის შესაქმნელად და იმისთვის, რომ საქართველოს რეპუტაცია საერთაშორისო მასშტაბითაც შეელახათ. ამ შემთხვევაში დემოკრატიული რეჟიმი დაუპირისპირდა ავტორიტარულ რეჟიმს. ამ უკანასკნელისგან განსხვავებით, რომელიც ყოველთვის ბატონობს რუსეთში, პირველ შემთხვევაში, მთავარი ფასეულობები კანონის უზენაესობა და თავისუფლებაა - ჩვენ უნდა წავახალისოთ პირველი. როდესაც ვხედავთ, რა სისწრაფით მიდის ყველაფერი უკან, როდესაც ვხედავ იმ ბრძოლას, რომელიც მაგალითად ჩვენს მეგობრებს სჭირდებათ მოლდოვაში ევროპული ღირებულებების დასამკვიდრებლად, ვსვამ კითხვას - ნუთუ არ დადგა დრო, რომ ამ ქვეყნებს, მივცეთ საშუალება, შეუერთდნენ ევროატლანტიკურ სივრცეს. ძვირფასო პრეზიდენტო, ბატონო მიხეილ, ჩვენი პარტია და ჩვენი გუნდი, ერთი გუნდია. ჩვენ, როგორც არასდროს, ვიბრძოდით ჩვენს ხელთ არსებული ყველა ბერკეტის გამოყენებით, რათა მხარი დაგვეჭირა თქვენთვის და თქვენი პარტიის კანდიდატებისთვის ამ რთულ და უსამართლო ბრძოლაში, რომელიც სხვა ეპოქის მოვლენას წააგავდა. თქვენი მთავარი ფასეულობები სრულად ესადაგება ევროკავშირის ძირეულ ფასეულობებს და გვსურდა ხელი შეგვეწყო მათთვის, ვინც ამ ფუნდამენტური ფასეულობების ერთგული იყო. სამწუხაროდ, ჩვენ არ ვიყავით წარმატებული, მაგრამ მერწმუნეთ, კიდევ უფრო ბევრს ვიმუშავებთ თქვენს მხარდასაჭერად, რაც მომავალ არჩევნებამდე მიგიყვანთ. ნება მოგვეცით, არასოდეს დავივიწყოთ "ვარდების რევოლუცია" საქართველოში", - განაცხადა ვილფრედ მარტენსმა.
