მოქმედი ხელისუფლებისა და საპარლამენტო არჩევნებში გამარჯვებული კოალიცია „ქართული ოცნების" სამუშაო ჯგუფების წევრებს შორის დღეს მორიგი შეხვედრა გაიმართება.
პირველ სამუშაო შეხვედრაზე მხარეები შეთანხმდნენ, რომ 8 ოქტომბრიდან ყველა სახელმწიფო უწყებაში კოალიცია საკუთარ წარმომადგენელს მიავლენს.
როგორც "ქართული ოცნების" ერთ-ერთმა ლიდერმა ირაკლი ალასანიამ ჟურნალისტებს პირველი სამუშაო შეხვედრის შემდეგ განუცხადა, დღეიდან სამთავრობო ტრანზაციის კონკრეტიზაციაზე დაიწყება საუბარი.
„სამთავრობო ტრანზაციაზე კონსულტაციები დავიწყეთ, თუმცა კონკრეტიზაციაზე საუბარი 8 ოქტომბრიდან დაიწყება", - აღნიშნა მან.
მოქმედი ხელისუფლებისა და „ქართული ოცნების" სამუშაო ჯგუფების წევრებს შორის პირველი შეხვედრა 5 ოქტომბერს გაიმართა.
მასში "ნაციონალური მოძრაობიდან" მონაწილეობენ დავით ბაქრაძე, გიგი უგულავა, გიგა ბოკერია და პავლე კუბლაშვილი; "ქართული ოცნებიდან" კი - ირაკლი ალასანია, დავით უსუფაშვილი, ირაკლი ღარიბაშვილი და სოზარ სუბარი.
