შინაგან საქმეთა სამინისტროს სპეციალური და საგანგებო ღონისძიებების ცენტრის სტრატეგიული ობიექტების დაცვის დეპარტამენტის 223-მა წვევამდელმა ფიცი საზეიმო ვითარებაში დადო. ფიცის მიღების ცერემონიას შს მინისტრის მოადგილე, პოლიციის პოლკოვნიკი თეიმურაზ მღებრიშვილი, სტრატეგიული ობიექტების დაცვის დეპარტამენტის დირექტორი, პოლიციის პოლკოვნიკი ბონდო ოჩიგავა და უწყების სხვა ხელმძღვანელი პირები დაესწრნენ. წვევამდელებმა საქართველოს სახელმწიფო ჰიმნი შეასრულეს და სამხედრო მარშით ჩაიარეს, შემდეგ კი საკუთარი საბრძოლო უნარების დემონსტრირება მოახდინეს. ცერემონიის დასრულებისას ახალწვეულები მამა დავითმა დალოცა.
შსს-ს სტრატეგიული ობიექტების დაცვის დეპარტამენტში წვევამდელები ერთწლიან სავალდებულო სამხედრო სამსახურს გაივლიან. ისინი შეისწავლიან სამხედრო საქმეს, უზრუნველყოფილი იქნებიან უფასო სამედიცინო მომსახურებით, უფასო კვებით, ადგილობრივ სპორტულ ღონისძიებებში მიიღებენ მონაწილეობას. სავალდებულო სამხედრო სამსახურის გავლის პერიოდი ყოველ მესამე დღეს 24 საათიან მორიგეობას გულისხმობს. სამხედროები ასევე ისარგებლებენ მოკლევადიანი შვებულებით.
შსს-ს სპეციალური და საგანგებო ღონისძიებების ცენტრი სტრატეგიული ობიექტების დაცვის დეპარტამენტის წარჩინებული 14 ვადიანი სამხედრო მოსამსახურეები, სამხედრო სავალდებულო სამსახურის გავლის პერიოდში, სამაგალითო დისცილინისა და საბრძოლო მომზადებაში მიღწეული წარმატებებისათვის დაჯილდოვდნენ საპატიო სიგელით.
სამხედრო სავალდებულო სამსახურის დასრულების შემდეგ წარჩინებული ვადიანი სამხედრო მოსამსახურეები შესაბამისი კონკურსის გავლის შემთხვევაში შსს-ს სხვადასხვა დანაყოფში დასაქმდებიან.
