ირაკლი ალასანია ქართული პოლიტიკური სპექტრის შედარებით ახალი სახეა. მის მიმართ საზოგადოებაში არაერთგვაროვანი დამოკიდებულება არსებობს. გთავაზობთ მასთან ინტერვიუს.

ბატონო ირაკლი, რამდენად სერიოზული გავლენა აქვს თქვენ პოლიტიკურ ნაბიჯებზე, იმიჯზე და ა.შ. ამერიკაში მოღვაწეობას?

- პოლიტიკაში ნაბიჯები რამდენიმე თვეა გადავდგი. ალბათ შეფასებას საზოგადოება უფრო აკეთებს, ვიდრე ჩვენ, თუმცა მაქსიმალურად ვცდილობთ, საზოგადოების მაჯისცემას შევუხამოთ ჩვენი პოლიტიკური აქტივობა. 9 აპრილს ჩვენი შეერთება ქუჩის საპროტესტო აქციებთან განპირობებული იყო იმით, რომ როგორც კი ჩვენ დავინახეთ, რომ ხალხი და საზოგადოება იქ იდგა და ჩვენ უნდა ვმდგარიყავით ჩვენს ხალხთან, ჩვენც ხალხის გვერდით დავდექით. მაგრამ ახლა უკვე დადგა დრო, რომ პოლიტიკურად პასუხისმგებლობის მქონე პარტიებმა, საზოგადოებრივმა ორგანიზაციებმა, ზოგადად ოპოზიციამ, დავიწყოთ ბევრად უფრო რეალისტური, გათვლილი ნაბიჯების გადადგმა ჩვენი ქვეყნის კრიზისიდან გამოყვანის ხელშეწყობისთვის. სწორედ ამითაც არის განპირობებული საკუთარი პოლიტიკური სტრუქტურის და ორგანიზაციის ჩამოყალიბება, რომელიც მალე დაფუძნდება.

ყველა პარტიასთან ჩვენი ურთიერთობა დაფუძნებული იქნება სწორედ ისეთი პოლიტიკური სტრატეგიის შემუშავებაზე, რომელიც აქტიურად გადავა ხელისუფლების საგნობრივ, თემატურ კრიტიკაზე. ამავე დროს, არ შემოიფარგლება მხოლოდ კრიტიკით და შესთავაზებს კონკრეტულ ალტერნატივებს – როგორ უნდა შეიცვალოს საქართველოს ხელისუფლების მიერ შექმნილი ის პრობლემები, რომელთაც ჩვენ ყოველ ფეხის ნაბიჯზე ვაწყდებით. და, რაც მთავარია: როგორ უნდა განვითარდეს საქართველო, როგორც საგარეო–პოლიტიკურად, ისე შიდა–პოლიტიკურად. ვგულისხმობ, დემოკრატიული ინსტიტუტების განვითარების გზით. რომ თითოეული მოქალაქე პირველ რიგში იყოს დაცული. გაუჩნდეს სამართლიანობის განცდა. ასევე გაჩნდეს ეკონომიკური და სოციალური დაცვის საშუალებები და მექანიზმები.

ეს მარტო არც ერთ პოლიტიკურ ორგანიზაციას, პოლიტიკოსს არ შეუძლია. ამიტომაც არის აუცილებელი მჭიდრო კოორდინაცია სხვა პოლიტიკურ ძალებთან. ასევე არის აუცილებელი, რომ მუდმივად მზად ვიყოთ და გვქონდეს ღია კარი ხელისუფლებასთან ურთიერთობისთვისაც. საბოლოოდ აუცილებელია, რომ ეს პოლიტიკური კრიზისი დარეგულირდეს მოლაპარაკების და შეთანხმების გზით.

ანუ სერიოზული პოლიტიკური ბრძოლისთვის ემზადებით?

- რა თქმა უნდა. იმიტომაც ჩავებით ამ პოლიტიკურ პროცესებში, რომ დიდი იმედი გვაქვს, რომ ჩვენი პოლიტიკური ძალა შეძლებს ასეთი გარდამტეხი ცვლილებების მიღწევას, ბუნებრივია, სხვა პარტნიორ ძალებთან ერთად.

ხელისუფლების მტკიცებით, დღეს ქვეყანაში ძალიან სუსტი ოპოზიციაა. ოპოზიციის უარყოფითი მხარეების გათვალისწინებით, შესაძლებლად მიგაჩნიათ სერიოზული და შედეგზე ორიენტირებული ბრძოლის წამოწყება?

- ჩვენს პოლიტიკურ ძალას გვაქვს კონკრეტული ამოცანები და მიზნები. პირველი – ეს არის შევქმნათ პოლიტიკური სტრუქტურები როგორც დედაქალაქში, ასევე რეგიონებში; მოვამზადოთ ჩვენი დიალოგი საზოგადოებასთან არამარტო თბილისში, არამედ რეგიონებშიც. შევქმნათ ის პოლიტიკურ დასაყრდენი საზოგადოებაში, რაც აუცილებელია სამომავლოდ ამ ცვლილებებისთვის და სამართლიან არჩევნებში მონაწილეობისთვის. პოლიტიკურ სპექტრში ჩვენ გვყავს სერიოზული პარტნიორები. გვაქვს სერიოზული მხარდაჭერის, ზოგადად, დემოკრატიული პროცესებისადმი მხარდაჭერის იმედი ევროპის და აშშ–ის მხრიდან. ჩვენი პოლიტიკური ბრძოლის აქცენტი გაკეთდება საარჩევნო გარემოს შეცვლაზე. კონკურენტუნარიან გარემოში ჩვენი პოლიტიკური ძალის წარმატებაში დარწმუნებული ვართ.

ახალი მემარჯვენეების და რესპუბლიკელების გარდა, რომელი პოლიტიკური ძალა გაწევრიანდება თქვენს ალიანსში? საუბარი იყო ეროვნული ფორუმის ალიანსში შემოსვლაზე.

- ჩვენ დღეს ძალიან ახლო ვთანამშრომლობთ ეროვნულ ფორუმთან. არ არის აუცილებელი, რომ მოხდეს ერთიანი სტრუქტურის ჩამოყალიბება. ვთანამშრომლობთ ლევან გაჩეჩილაძის გუნდთანაც. გვაქვს სხვადასხვა დონის კოორდინაცია სხვა პოლიტიკურ ძალებთან.

გაჩეჩილაძის ფინანსური წყაროებით ხელისუფლება აქტიურად დაინტერესდა, ფორუმის ფინანსური მოძლიერება კი თავად არასაპარლამენტო ოპოზიციაში აჩენს კითხვებს. ხომ არ ფიქრობთ, რომ ამ საეჭვო დაფინანსებით თქვენს გუნდსაც ჩრდილი მიადგება?

- მე საფუძველი არ მაქვს დღეს ვთქვა და არც არსებობს ასეთი დასაბუთებული არგუმენტები, რომ საიდანღაც საეჭვო ფული მიდის ოპოზიციაში. ხელისუფლების მხრიდან მხოლოდ ლაპარაკია და არც ერთი დასაბუთებული არგუმენტი არ მომისმენია. ჩემი აზრით, საქართველოს შიდაპოლიტიკურ პროცესებში არ უნდა იყოს არც ერთი უცხო ქვეყნის კაპიტალი დაბანდებული. ამ პრინციპს ჩემი პოლიტიკური ცხოვრების ბოლომდე გავყვები. ასე რომ, ხელისუფლების მხოლოდ ბრალდებები ვერ გახდება ხელისშემშლელი ჩემი პარტნიორული ურთიერთობებისთვის სხვადასხვა პოლიტიკუირ პარტიებთან.

რატომ დაინტერესდა ხელისუფლება ასე გამოკვეთილად ამერიკაში თქვენი ბოლო ვიზიტით? ეშინია ხელისუფლებას თქვენი დასავლური კავშირების?

- ჩემი წარსულიდან და პროფესიული გამოცდილებიდან გამომდინარე არავის უნდა უკვირდეს, რომ მაქვს ახლო კავშირები დიპლომატიურ და პოლიტიკურ წრეებთან. ბოლო ვიზიტი მართლაც წარმატებული იყო არამხოლოდ ჩემთვის, ზოგადად საქართველოსთვის. იმიტომ, რომ რეალურად მოხდა თვისობრივად შეცვლა დამოკიდებულებისა პოლიტიკური პროცესებისადმი საქართველოში. ამერიკასა და საქართველოს შორის მოხდა ქარტიის გაფორმება, სადაც ერთ–ერთ მთავარ თემად რჩება საქართველოში დემოკრატიის განმტკიცება. ამერიკული პოლიტიკა საქართველოსთან დაეფუძნება იმას, თუ რამდენად დემოკრატიული იქნება საქართველო. ამიტომ არამარტო პოლიტიკური, ფინანსური კაპიტალიც იდება უკვე ამაში. ეს არის ახალი აქცენტები ქართულ–ამერიკულ ურთიერთობებში. ამიტომ ეს გვაძლევს ყველა საფუძველს, ვიყოთ ძალიან იმედიანი იმისა, რომ საქართველოს დასავლეთი არ მიატოვებს. და ძალიან კარგად გამოჩნდა ობამასა და მედვედევს შორის შეხვედრისას. ამერიკამ დეკლარირებულად გაუწია საქართველოს, ჩვენ სუვერენიტეტს, ტერიტორიულ მთლიანობას და ჩვენს სწრაფვას, ვიყოთ ევროატლანტიკური სივრცის ნაწილი, ძალიან მნიშვნელოვანი მხარდაჭერა. ეს ასევე არის განმსაზღვრელი ევროპული პოლიტიკისა.

უცნობია, რუსეთი რას მოიმოქმედებს.

- რუსეთის პოლიტიკაში დიდი ცვლილებების მოლოდინი არ უნდა გვქონდეს. როდესაც ამერიკა საქართველოს ასეთ მხარდაჭერას უცხადებს, საქართველოში ისინი ხედავენ მხოლოდ დემოკრატიას და არა – სააკაშვილს ან სხვა რომელიმე პოლიტიკურ ძალას. ამიტომ ეს ურთიერთობები ძალიან მნიშვნელოვნად იქნება წარმოებული.

საგარეო პოლიტიკის კუთხით საქართველოს ხელისუფლებას მაინც მოუწევს გარკვეული ნაბიჯების ცვლილება?

- საგარეო პოლიტიკის ძირითადი აქცენტი არ უნდა იყოს შეცვლილი. ჩვენ მივდივართ ევროპული ინტეგრაციისკენ. მაგრამ აქ საუბარია ჩვენს ქვეყანაში შიდა პოლიტიკური სისტემის ჩამოყალიბებაზე, რომელიც გარანტია იქნება იმისა, რომ ქვეყანა განვითარდება სწორედ ამ მიმართულებით. ქვეყანაში იქნება ისეთი დემოკრატიული ბალანსი, როდესაც ოპოზიციას საშუალება ექნება, რომ იყოს ნაწილი და თანამონაწილე ოპოზიციის მხრიდან ამ ქვეყნის განვითარების პროცესის. მოქალაქეებს ექნებათ აგრეთვე თანამონაწილეობის განცდა. აი, ეს სისტემა უნდა ჩამოყალიბდეს ჩვენს ქვეყანაში. ეს ჩვენი გასაკეთებელია. ამერიკა, ევროპა, სხვა გარე ფაქტორები – ეს არის გარე ფაქტორები.

ამ ყველაფერს ხელს არ უშლის ანდა უხერხულობას არ ქმნის საერთაშორისო არენაზე, რომ საქართველოს საგარეო მინისტრი რუსეთის მოქალაქეა, იმ ქვეყნის, რომელმაც შარშან აგვისტოში საქართველოს 20%–ს ოკუპაცია მოახდინა?

- ზოგადად უხერხულობას აჩენს, უხერხულობას იწვევს ზოგადად სააკაშვილის არაადექვატური დამოკიდებულება მოვლენებისადმი საქართველოში. მაგრამ ეს სიახლე არ არის. ამიტომ ოპოზიციამ ბევრად უფრო გათვლილი ნაბიჯებით უნდა გავაგრძელოთ ჩვენი მოქმედება. ჩვენთვის მთავარია აქცენტი ავიღოთ საარჩევნო გარემოს შეცვლაზე. ამას სჭირდება ჩვენი პოზიციების ჩამოყალიბება და საზოგადოებისთვის წარდგენა. მეორე – ეს არის თავისუფალი მედიის, ძირითადად საზოგადოებრივ მაუწყებელზეა ლაპარაკი, თავისუფლების ხარისხის ამაღლება. ამას საერთაშორისო თანამეგობრობასთან ერთად უფრო ადვილად მივაღწევთ. მესამე – ჩემი აზრით, ყველაზე მნიშვნელოვანი, ეს არის პოლიციის და სამართალდამცავი სტრუქტურების დისტანცირება საარჩევნო და პოლიტიკური პროცესებისგან; და მათი პოლიტიკური ოპონენტების მიმართ რეპრესიული ნაბიჯების გადადგმის შეზღუდვა.

ეს იოლად მიღწევადია დღევანდელ ვითარებაში?

- არა, მაგრამ მიღწევადია. იმიტომ, რომ საერთაშორისო თანამეგობრობის და შიდაპოლიტიკური პროცესის თანხვედრის შემთხვევაში ამ ჩაკეტილი სივრცის გარღვევა შესაძლებელია.

ფიქრობთ, რომ სააკაშვილი დათმობს მისთვის სასურველ საარჩევნო გარემოს?

- მოუწევს ამის გაკეთება. ამ მიმართულებით მათში დიდ ენთუზიაზმს ვერ ვხედავ. პირიქით, რეპრესიული მანქანის სულ უფრო დიდი სიმძლავრით ამოქმედებას ვხედავ. მაგრამ ხელისუფლებამ უნდა გაიგოს, რომ ამ პოლიტიკურ კრიზისს დარეგულირების სხვა ლოგიკა არ აქვს. უნდა შედგეს შეთანხმება ხელისუფლებასა და ოპოზიციას შორის. შედგეს ისეთი შეთანხმება, რომლის გარანტორები იქნებიან ჩვენი სტრატეგიული პარტნიორები – აშშ, ევროკავშირი და სხვა საერთაშორისო ორგანიზაციები. სხვა შემთხვევაში საქართველო თვითონ დაკარგავს იმ მიმზიდველობას ევროპისა და ამერიკისთვის, ეს კარგად უნდა ესმოდეს სააკაშვილს. მე ვხედავ მზარდ განწყობას ხელისუფლების რგოლებში და იმის გააზრებას, რომ იგნორირების პოლიტიკით ეს კრიზისი ვერ დარეგულირდება; და ხელისუფლებამ სერიოზული ნაბიჯები უნდა გადადგას, რომ შეუქმნას ახალი ფუნქცია ოპოზიციას პოლიტიკური აქტივობისთვის. ამიტომ ეს არის რთული, მაგრამ აუცილებელი სამუშაო, რასაც ჰქვია დიალოგის შესაძლებლობის გაჩენა ხელისუფლებასა და ოპოზიციას შორის.

რაზე მიანიშნებთ, სააკაშვილს ოპოზიციასთან ბრძოლაში უკანდახევა მოუწევს?

- მე დარწმუნებული ვარ, რომ მოუწევს გადაწყვეტილებების მიღება. ამ გადაწყვეტილებებში მე ვხედავ ერთს – საარჩევნო გარემოს შეცვლას.

ბატონო ირაკლი, თქვენ ადგილობრივ არჩევნებში მონაწილეობას მნიშვნელოვნად მიიჩნევთ. ფაქტია, გავლენიანი გიგი უგულავა იოლად არ დათმობს მერის პოსტს. რისი იმედი გაქვთ და რატომ უნდა წავიდეს ოპოზიცია ადგილობრივ არჩევნებზე?

- თუ საარჩევნო გარემო შეიცვლება და მიუახლოვდება სამართლიან არჩევნებს, მონაწილეობას მივიღებ ნებისმიერ არჩევნებში – ეს იქნება საპრეზიდენტო, საპარლამენტო თუ ადგილობრივი არჩევნები. პასუხისმგებლობის მქონე ყველა პოლიტიკური ძალა უნდა იყოს მზად კონკურენტუნარიან გარემოში არჩევნებში მონაწილეობისთვის.

საქართველოში ჩამოსვლამდე და შემდგომ პერიოდშიც მაღალი რეიტინგი გქონდათ. ბევრმა თქვენ სააკაშვილის რეალურ ალტერნატივად მიგიჩნიათ, თუმცა ხელისუფლებამ ძირითადი დარტყმა მაინც ნინო ბურჯანაძეზე მიიტანა. ბოლოსთვის ხომ არ შემოგინახათ ხელისუფლებამ, რეპრესიებს და შავ პიარს ელოდებით?

- ჩვენ არჩეული გვაქვს ჩვენი კონკრეტული ამოცანები და მიზნები. ამ მიზნის მისაღწევად ნაბიჯებს თანმიმდევრულად გადავდგამთ. რა თქმა უნდა, ხელისშემშლელი ფაქტორები იქნება, დარწმუნებული ვარ, ხელისუფლების მხრიდანაც. ეს არის უკვე. იცით, რომ ჩემი ვიზიტის დროს მოხდა ჩემი პოლიტიკური გუნდის ერთ–ერთი ლიდერის სასტიკი, პრაქტიკულად ფიზიკური ანგარიშსწორება. მაგრამ ასეთი ფაქტებით და მომავალში რაც უნდა რეპრესიული მანქანა ამოქმედდეს ჩვენ წინააღმდეგ, ჩვენ ვერ შეგვაცვლევინებენ ამ არჩეულ კურსს.

სააკაშვილი საშიშ კონკურენტად აღგიქვამთ?

- ეს მას ჰკითხეთ. მიმაჩნია, რომ ჩვენი პოლიტიკური ძალა არის ერთ–ერთი ძლიერი ალტერნატივა ფაქტობრივი ხელისუფლების.

რამდენად დაუჭერს მხარს დასავლეთი ირაკლი ალასანიას?

- ამერიკა არც ერთ პოლიტიკურ ძალას, სააკაშვილი იქნება, თუ ხელისუფლების მიღმა მყოფი, პირდაპირ მხარს არ დაუჭერს. იმიტომ, რომ ისინი მხარს უჭერენ საქართველოში პროცესს, დემოკრატიული განვითარების პროცესს. ეს არის ძალიან სწორი პოლიტიკა. სწორედ ახალი ადმინისტრაცია არის ისეთი ადმინისტრაცია, რომელიც ამ პოლიტიკით ინსტიტუციონალიზაციას უწყობს ხელს. სწორედ ამიტომ მიმაჩნია, რომ ეს ურთიერთობები კიდევ უფრო გაღრმავდება და გახდება ბევრად უფრო მნიშვნელოვანი.

ბოლო დროს არაერთი განცხადება გაკეთდა რუსეთის მხრიდან მოსალოდნელ აგრესიასთან, საზღვრების გადმოწევასთან დაკავშირებით. საფუძვლიანია ეს შიში?

- აბსოლუტურად უსაფუძვლო ლაპარაკებია. არაინფორმირებული ხალხის მიერ არის გაკეთებული ეს განცხადებები. დეფაქტოდ არსებული ვითარება არასდროს იქნება ლეგალიზებული საერთაშორისო თანამეგობრობის, ჩვენი პარტნიორების მიერ. არაღიარების პოლიტიკა იქნება გაგრძელებული და, საბოლოოდ, რუსეთს მოუწევს საკუთარი შეიარაღებული ძალების გაყვანა საქართველოს ტერიტორიიდან. ამას დასჭირდება ჩვენი მხრიდან ძალიან დიდი ბრძოლა, მუშაობა დიპლომატიური და პოლიტიკური კუთხით. მაგრამ საერთაშორისო თანამეგობრობის და ჩვენი პარტიის იმედი ამ ბრძოლაში უნდა გვქონდეს, რადგან ეს აუცილებლად მოხდება.