სააკაშვილმა და მისმა თანაგუნდელებმა, რომლებიც ხელისუფლებაში იყვნენ და იქ გამდიდრდნენ, ზოგმა მოიხადა სასჯელი, მაგრამ ისევ ფუფუნებაში არიან, რაც იმას ნიშნავს, რომ შესაძლოა ფული სადღაც ჰქონდათ გადამალული, - განუცხადა ჟურნალისტებს პარლამენტის თავმჯდომარემ შალვა პაპუაშვილმა.

„დეკლარაციის ვალდებულების შევსება ყველას აქვს. თუ ვინმე რაიმეს დამალავს, შემდეგ ამის გადამოწმების საშუალება არის და შესაძლებლობაც. მთავარი არის ერთი რამ, რომ არავის ჰქონდეს იმის მცირე იმედიც კი, რომ ხალხის ფულს მოიპარავს, ან საკუთარ თანამდებობას გამოიყენებს იმისთვის, რომ ფინანსური სარგებელი ნახოს. შეგუებული უნდა იყოს იმას, რომ მხილებული იქნება და გარკვეულ წლებს ციხეში გაატარებს. იმ იმედით, რომ შემდეგ გადამალულ ფულს რომ გამოვა შემდეგ გამოიყენებს, არავინ უნდა იყოს, ამიტომ 30-წლიანი ვალდებულება იმ პირებისთვის, რომლებიც მხილებულები იქნებიან დანაშაულში, რომ შეავსონ დეკლარაცია, ზუსტად იმისთვის არის, რომ გამოჩნდეს ყველა მათი ქონება და რაც არ გამოჩნდება, შესაძლებლობა გვქონდეს რომ ჩავეძიოთ ამ ყველაფერში. ვხედავთ, რომ სააკაშვილმა და მისმა თანაგუნდელებმა, რომლებიც ხელისუფლებაში იყვნენ და იქ გამდიდრდნენ, ზოგმა მოიხადა სასჯელი, მაგრამ ისევ ფუფუნებაში არიან, რაც იმას ნიშნავს, რომ შესაძლოა ფული სადღაც ჰქონდათ გადამალული“, - აღნიშნა პაპუაშვილმა.

„კორუფციის წინააღმდეგ ბრძოლის შესახებ“ კანონში შესატან ცვლილებებს დღეს პარლამენტის ბიუროს სხდომაზე წარადგენენ.