თავისი შინაარსით ეს აქტი საქართველოს სახელმწიფოსა და ქართველი ხალხის მიმართ მეგობრული ნამდვილად არ არის, - განაცხადა იუსტიციის მინისტრმა პაატა სალიამ „MEGOBARI აქტზე“ საუბრისას.

„ეს აქტი შეიძლება მეგობრული იყოს მხოლოდ რადიკალური ძალების მიმართ, რომლებიც ცდილობენ ძალადობრივი გზით შეცვალონ ხელისუფლება საქართველოში“, - აღნიშნა პაატა სალიამ.

„ე.წ მეგობარი აქტი ყველაფერია, გარდა რეალური მეგობრობისა“ - ასეთია მმართველი გუნდის შეფასებები ამერიკის შეერთებული შტატების კონგრესის წარმომადგენელთა პალატის მიერ მიღებულ დოკუმენტზე. „ქართულ ოცნებაში“ აცხადებენ, რომ „მეგობარ აქტად“ წოდებული დოკუმენტი ეწინააღმდეგება როგორც საქართველოს ინტერესებს, ისე ამერიკის ახალი ადმინისტრაციის ხედვას. ამ კანონპროექტის საბოლოოდ მიღება კი იმ არაფორმალური ძალების ინტერესებშია, რომელთა მიზანიც ქართულ-ამერიკული ურთიერთობებისთვის ზიანის მიყენებაა. რაც შეეხება ოპოზიციას, ისინი ღიად ამბობენ, რომ ამ შედეგისთვის ბევრი იბრძოლეს.

აშშ-ის წარმომადგენელთა პალატამ „მეგობარი აქტის“ სახელით ცნობილ კანონპროექტს მხარი დაუჭირა.