მივესალმები უდიდესი ისტორიის და კულტურის მქონე მხარეს, სამცხე-ჯავახეთს! სანამ სხვა რამეს ვიტყვი, პირველ რიგში, გუშინდელი დღე, ჩვენი ქვეყნისთვის კიდევ ერთი საამაყო დღე მინდა გაგახსენოთ და ჩვენს ეროვნულ საფეხბურთო ნაკრებს მივულოცოთ გამარჯვება და დიდი მადლობა ვუთხრათ. ჩვენს ეროვნულ ნაკრებს გაუმარჯოს! - ამის შესახებ „ქართული ოცნების“ აღმასრულებელმა მდივანმა, მამუკა მდინარაძემ, საარჩევნო კამპანიის რეგიონულ ღონისძიებაზე ახალციხეში სიტყვით გამოსვლისას განაცხადა.
მდინარაძე მიესალმა სამცხე-ჯავახეთში „ქართული ოცნების“ დელეგატებს, ანტონ ობოლაშვილსა და სამველ მანუკიანს. მისი თქმით, რეგიონის ყველა მაცხოვრებელმა კარგად იცის, საკუთარი ქვეყნის ისტორია და ტრადიციების მნიშვნელობა და ისიც, რომ მათ სამშობლოს, საკუთარ წარსულზე, რომელიც აწმყოს მთავარი საფუძველია, ვერავინ ათქმევინებს უარს.
„მივესალმები ყველა თქვენგანს, მივესალმები თქვენი საოცარი მხარის დელეგატებს საქართველოს პარლამენტში - ბატონ ანტონ ობოლაშვილს და ბატონ სამველ მანუკიანს მივესალმები, ამ საოცარ ხალხს, რომლებიც ძალიან ერთგულად, ჩვენი ქვეყნის ერთგულებით წარმართავენ თავიანთ საქმეს დღესაც და ასე გააგრძელებენ მომავალ პარლამენტშიც.
„მივესალმები ახალციხეს, ახალქალაქს, ბორჯომს, ნინოწმინდას, ადიგენს, ასპინძას, ვალეს, ბაკურიანს, წაღვერს, ახალდაბას, აბასთუმანს და ყველა მათ მაცხოვრებელს - ხალხს, რომელმაც ძალიან კარგად იცის საკუთარი ქვეყნის ისტორია და განსაკუთრებით ტრადიციების მნიშვნელობა, ძალიან კარგად იცის მშვიდობით და სიყვარულით თანაცხოვრება სხვადასხვა ეთნიკური წარმომავლობის ადამიანებს შორის. აქ მცხოვრებმა ქართველებმა, სომხებმა, სხვა ეროვნების წარმომადგენლებმა ზუსტად იციან, რომ მათ სამშობლოს - საქართველოს, ღირსებას ვერავინ წაართმევს და საკუთარ წარსულზე უარს ვერავინ ათქმევინებს, წარსულზე, რომელიც ასევე ღირსეული მომავლის მთავარი საფუძველია.“ - განაცხადა მამუკა მდინარაძემ.
