ძალიან მნიშვნელოვანი ვიზიტია, საქართველოში სპეციალურად ჩამოვიდნენ, არც ერთ რეგიონში სხვა ვიზიტი არ აქვთ და ამის მიზანი არის ქართველი ხალხის, საქართველოს მხარდაჭერა, - ამის შესახებ „სტრატეგია აღმაშენებლის“ ლიდერმა გიორგი ვაშაძემ საქართველოში ვიზიტით მყოფ სენატორ ჯინ შაჰინთან და კონგრესმენ მაიკ ტერნერთან შეხვედრიდან გამოსვლის შემდეგ ჟურნალისტებს განუცხადა.
როგორც ვაშაძემ განმარტა, 26 ოქტომბრის არჩევნები გადაწყვეტს, თუ როგორ ქვეყანაში სურს საზოგადოებას ცხოვრება.
„მე რაც შემიძლია გითხრათ, ძალიან კარგად ხედავენ, რომ ეს რაღაც გადატვირთვაზე საუბარი „ქართული ოცნების“ მხრიდან მორიგი სიყალბეა. საქართველოში 26 ოქტომბერს არის არჩევნები, რომელიც განსაზღვრავს როგორ ქვეყანაში გვინდა ვიცხოვროთ, გვინდა ვიცხოვროთ ქვეყანაში, რომელიც მოწყვეტილია ევროინტეგრაციას, თუ ქვეყანაში, რომელიც არის ევროინტეგრაციის ნაწილი. კონგრესმენი ტერნერი არის ადამიანი, რომელიც მუდმივად ეხმიანება მიხეილ სააკაშვილის მდგომარეობას და ვფიქრობ, ეს იქნება ერთ-ერთი ყველაზე მნიშვნელოვანი საკითხი“, - განაცხადა ვაშაძემ.
