ვიცით, რას წარმოადგენენ ეს პოლიტიკური პარტიები, პოლიტიკოსები. ეს არის ერთი დიდი რადიკალური დაჯგუფება, რომელთა მთავარი მიზანი არის ბრძოლა ქვეყნის, ხალხის და ეროვნული ინტერესების წინააღმდეგ , - ასე შეაფასა თბილისის მერმა, კახა კალაძემ ოპოზიციური პოლიტიკური პარტიების მხრიდან პრეზიდენტის მიერ ინიციირებულ “ქართულ ქარტიაზე“ ხელმოწერა.
კალაძის განცხადებით, რეალურად ამით არაფერი შეიცვლება.
„ყოველთვის ასეთი მოძრაობები, პოლიტიკური პარტიები და პოლიტიკოსები განწირული არიან მარცხისთვის. ძალიან კარგია ის, რომ მათი ერთად შეყრა მოხდა. ჩვენ ყოველთვის ვამბობდით, რომ რეალურად, ისინი ერთ ხაზს წარმოადგენენ. შეიძლება სხვადასხვა სახელებით და პოლიტიკური პარტიებით გამოდიოდნენ, მაგრამ ერთი პატრონი ჰყავთ, თუნდაც ეს გადაწყვეტილება არის იმ ყველაფრის დასტური, რასაც ჩვენ ამდენი ხნის განმავლობაში ვამბობდით“, - განაცხადა კალაძემ.
ცნობისთვის, „ქართულ ქარტიას“ 17 პარტია და 5 დამოუკიდებელი დეპუტატი აწერს ხელს.
