– ეს პირველი შემთხვევაა, როდესაც მსგავსი სახის ხელშეკრულებას მოეწერა ხელი და ეს ძალიან მნიშვნელოვანია. ჩვენ ორ ხელშეკრულებას მოვაწერეთ ხელი, ერთი გახლავთ ორგანიზებული დანაშაულის წინააღმდეგ ბრძოლის ხელშეკრულება და მეორე – საგანგებო სიტუაციების დროს თანამშრომლობის შესახებ ხელშეკრულება.

– გარდა ამ ორი ხელშეკრულებისა, ლიტვის შინაგან საქმეთა მინისტრთან განიხილეთ თუ არა უკანონო მიგრანტთა საკითხი?

– დიახ, ჩვენ ვიმსჯელეთ ამ საკმაოდ მნიშვნელოვან საკითხზე, თუმცა, ამასთან დაკავშირებით კითხვები არ არსებობს; ჩემი პოზიცია იმაში მდგომარეობს, რომ თუ არსებობს რაიმე პრობლემა – უკანონო მიგრანტებთან თუ სხვა საკითხთან დაკავშირებით, ჩვენ აქ ვართ და მზაობას გამოვხატავთ ჩვენს ლიტველ კოლეგებთან თანამშრომლობისთვის; ასევე, ჩემთვის ძალზე სასიამოვნოა ის ფაქტიც, რომ ლიტვაში იგეგმება საქართველოს პოლიციის ატაშეს დანიშვნა, რომელიც კოორდინირებას გაუწევს მთელ ამ საკითხებს; ასე რომ რაიმე შეკითხვები ამ სფეროში არ გვექნება;

– თქვენ საზღვრები ახსენეთ და პრესკონფერენციაზე ბორდერიზაციის თემასაც შეეხეთ. როგორც აღნიშნეთ, ბორდერიზაციის პრობლემა არსებობს; მაინტერესებს რეინტეგრაციის სამინისტროს სტატუსი, უწინ მას რეინტეგრაციის სამინისტრო ეწოდებოდა, ამჟამად სახელი შეეცვალა ამ სამინისტროს? ამავე დროს, მსურს, ერთ გარემოებასაც შევეხო: 2008 წლის ომის შემდგომ ბატონმა ბიძინა ივანიშვილმა განაცხადა, რომ მზად არის პირდაპირი დიალოგი აწარმოოს აფხაზეთსა და ოსეთთან სამომავლო ურთიერთობების დარეგულირების მიზნით.

– რაც შეეხება პირველ საკითხს: სამინისტროს სახელი დღესაც იგივეა და მას რეინტეგრაციის სამინისტრო ეწოდება. რაც შეეხება ბატონი ივანიშვილის განცხადებას, აფხაზეთისა და ოსეთის დე ფაქტო ხელისუფლებასთან პირდაპირი დიალოგის წარმოებასთან დაკავშირებით, მე თავად უნდა გავეცნო ამ განაცხადს, რათა ზუსტად ვიცოდე, რას გულისხმობს. ჩემი აზრით, იგი მოძმე ხალხთან დიალოგს გულისხმობდა, ვინაიდან აფხაზებიც და ოსებიც ჩვენი ძმები არიან, ამიტომ, მას ამ განაცხადში რაიმე სხვა აზრი არც გაუჟღერებია. ანუ, აქ ადგილი არ ჰქონია რაიმე პოლიტიკურ დატვირთვას, მან აღნიშნა, რომ ძმებთან დალაპარაკებისათვის მზად არის.

– რას იტყვით საზღვრის დემარკაციასთან დაკავშირებით?

– რა თქმა უნდა, დემარკაცია ჩვენთვის მიუღებელია. საქართველოს ტერიტორიაზე დაუშვებელია სხვა ქვეყნის არსებობა. ჩვენ ერთი ქვეყანა გვაქვს და მას საქართველო ჰქვია. ასე რომ, თუ ვინმე ამის გაკეთებას გადაწყვეტს, ეს იქნება უკანონო და აბსოლუტურად მიუღებელი ჩვენთვის. საჯაროდ მსურს ხაზი გავუსვა, რომ მსგავსი ქმედება ჩვენთვის მიუღებელია.

– როგორ ფიქრობთ, შეიცვალა თუ არა რუსეთის პოზიციები და მოხდა თუ არა პოზიტიური ცვლილებები რუსეთ–საქართველოს ურთიერთობებში არჩევნების შემდეგ?

– რა თქმა უნდა, გარკვეული ტექნიკური მხარეები ურთიერთობებში პოზიტიურობისაკენ შეიცვალა, გაუმჯობესდა სავაჭრო ურთიერთობა: რუსეთმა თავისი ბაზარი გაგვიხსნა და ღვინისა და მინერალური წყლის გატანის შესაძლებლობა მოგვეცა რუსულ ბაზარზე. აღნიშნული ხელს უწყობს საქართველოს ეკონომიკას, მაგრამ რაც შეეხება პოლიტიკურ ასპექტს, არ ვფიქრობ, რომ ამ კუთხით რაიმე მნიშვნელოვან ძვრას ჰქონდეს ადგილი. ორივე მხარის მიდგომა ძალზე ფრთხილია, ჩვენ განსაკუთრებით რთულ ვითარებაში ვიმყოფებით. როგორც მოგეხსენებათ, ჩვენი ტერიტორიის 20% ჯერ კიდევ ოკუპირებულია. ჩვენთვის კი ეს ყველაფერი ძალზე მტკივნეულია. თუმცა, ჩვენ ვცდილობთ, შევიცვალეთ რიტორიკა, გვსურს რუსეთის ხელისუფლებასთან ურთიერთობა გავაუმჯობესოთ და სტაბილური გავხადოთ. ამიტომაც დანიშნა პრემიერ-მინისტრმა საქართველოს წარმომადგენელი რუსეთის საკითხებში – ბ–ნი ზურაბ აბაშიძე, რომელიც მუდმივად მართავს შეხვედრებს თავის კოლეგასთან, მინისტრის მოადგილე ბ–ნ კარასინთან, ასე რომ ვნახოთ, როგორ განვითარდება მოვლენები.

– რას იტყვით ევრაზიის კავშირთან დაკავშირებით? თქვენ კურსი ნატოსკენ გაქვთ აღებული, თქვენმა მეზობელმა სომხეთმა თავისი პოზიცია დააფიქსირა და რუსეთთან შეთანხმებით ევრაზიის კავშირში გაწევრიანება გადაწყვიტა.

– ჩვენ შეგვიძლია, არაფერია შეუძლებელი და ყველა ღონეს მივმართავთ ამის მისაღწევად. ISAP-ში ჩვენი მონაწილეობა უაღრესად მნიშვნელოვანია და ამერიკის მხარე ამას აფასებს. ყველა ქვეყანას თავისი არჩევანი აქვს, მათ შორის, სომხეთსაც. მათ თავისი გზა აირჩიეს და ჩვენ ამაზე კომენტარს ვერ გავაკეთებთ. მათ თავისი მიმართულება აქვთ, ეს მათი არჩევანი და მათი გადაწყვეტილებაა. ჩვენთვის კი ნომერი პირველი ამოცანა და პრიორიტეტი ნატოში გაწევრიანება და ევროინტეგრაციაა. ჩვენი აზრით, ჩვენი მისწრაფება ნატოსა და ევროკავშირისაკენ რუსეთთან ურთიერთობების დარეგულირებასთან არ მოდის წინააღმდეგობაში. ჩვენ შეგვიძლია ამ ინტერესების ურთიერთშეთავსება.

– წინა ხელისუფლება ფიქრობდა, რომ ნატო ერთადერთი გზა იყო დასავლეთისაკენ, როგორია თქვენი პოზიცია?

– მე ერთს გეტყვით, რადიკალიზმი ჩვენთვის მიუღებელია. ჩვენთვის ძალზედ მნიშვნელოვანია მეზობელ ქვეყნებთან ურთიერთობების დარეგულირების საკითხი და ვფიქრობ, ამაში განსაკუთრებული არაფერია. ეს არ გახლავთ ჩვენი არჩევანი, საქართველო კავკასიაში მდებარეობს და შესაბამისად, მნიშვნელოვანი გეო–სტრატეგიული პოზიცია გვიკავია. აღნიშნულიდან გამომდინარე, უაღრესად მნიშვნელოვანია მეზობელ სახელმწიფოებთან დაბალანსებული ურთიერთობები. თქვენ კარგად მოგეხსენებათ, თუ რა მოხდა 2008 წელს, რა გამოიწვია წინა ხელისუფლების რადიკალურმა პოლიტიკამ – ადგილი ჰქონდა საომარ მოქმედებებს, რამაც დაანგრია ქვეყნის ეკონომიკა. რუსეთმა მოახდინა ჩვენი სახელმწიფოს ტერიტორიის 20%–ის ოკუპირება. დავკარგეთ ასზე მეტი სოფელი და აღიარებული იქნა ე.წ. აფხაზეთისა და სამხრეთ ოსეთის დე–ფაქტო ხელისუფლებების დამოუკიდებლობა. აი, ეს გახლავთ რუსეთ–საქართველოს ომის შედეგები. წინა ხელისუფლებას ამ შედეგებზე უნდა ეფიქრა. ჩემის აზრით, გამოსავალი არსებობდა, რომ ეცადათ, იპოვნიდნენ გამოსავალს და ყოველივე ამას თავიდან აირიდებდნენ.

– ალბათ სწორედ ეს იყო „ქართული ოცნების“ წარამტების მიზეზი, თუმცა მოსახლეობის ეკონომიკური მდგომარეობაც გასათვალისწინებელია. ერთ–ერთი შვედური კომპანიის მიერ ჩატარებული გამოკითხვის თანახმად, მარტის შემდეგ იმ მოსახლეობის რიცხვმა დაიკლო, რომლებსაც მიაჩნიათ რომ ქვეყანა სწორი კურსით მიდის. როგორ ფიქრობთ, რატომ მოხდა ასე?

– მე კარგად ვიცი, რომელმა კომპანიამ გააკეთა ეს გამოკითხვა. თუმცა, ისიც ვიცი, რომ ეს მაჩვენებელი ახლა გაიზარდა. თქვენ ახსენეთ, რომ ხალხმა ჩვენს პარტიას ხმა ეკონომიკური სიდუხჭირის გამო მისცა, თუმცა ეს არ იყო ერთადერთი მიზეზი. ბოლო 9 წლის განმავლობაში წინა მთავრობამ 300 ათასი ადამიანი გაასამართლა. მინდა, რომ ეს აუცილებლად ჩართოთ თქვენს ინტერვიუში, იმ ფაქტის გათვალისწინებით, რომ საქართველოს მოსახლეობა 5 მილიონამდეა. პოლიცია უკიდეურესად პოლიტიზირებული იყო. ისინი ოპონენტებს სდევნიდნენ და ბიზნესს აკონტროლებდნენ. ესაა ძირითადი მიზეზები და ფაქტორები ქართველმა ხალხმა რატომაც გადაწყვიტა ხმა მიეცა „ქართული ოცნებისთვის“. ხალხში შიში სუფევდა და არ არსებობდა თავისუფალი მედია. ყველა ტელევიზია ხელში ჰქონდათ ჩაგდებული და მათ წინა მთავრობის წარმომადგენლები აკონტროლებდნენ. არსებობდა მხოლოდ ერთი თუ ორი ოპოზიციურად განწყობილი ტელევიზია, თუმცა მათ გავლენა არ ჰქონდათ. არ არსებობდა გამოხატვის თავისუფლება. არავის ჰქონდა უფლება გამოეხატა განსხვავებული პოლიტიკური მისწრაფებები. მე შემიძლია ასევე გითხრათ, რომ ახლახანს ჩატარებული გამოკითხვის შედეგად დადგინდა რომ მოსახლეობის 90%–ს მიაჩნია, რომ ამჟამად აქვთ აზრის გამოხატვის საშუალება. მათ შეუძლიათ რაზეც უნდათ, ისაუბრონ და აღარ აქვთ შიში. არ აქვთ შიში პოლიციის და მთავრობის მიმართ და ეს დიდი მიღწევაა, ნამდვილი დემოკრატიაა. ეს არის სწორედ ის დემოკრატია, რაზეც პრემიერ–მინისტრი საუბრობდა. ესაა ის დემოკრტია, რასაც პრემიერი თავის ხალხს და საერთაშორისო თანამეგობრობას დაპირდა.

– ბევრი ხედავს მსგავსებას უკრაინის და საქართველოს მთვრობებს შორის. უკრაინა, ისევე როგორც საქართველო, შერჩევით სამართალში დაადანაშაულეს. თქვენ ადრე განაცხადეთ, რომ შეგეძლოთ დაგესახელებინათ წინა მთავრობის მინისტრები, რომლებიც კრიმინალები იყვნენ.

– მე არ მითქვამს, რომ ისინი კრიმინალები არიან. მე განვაცხადე, რომ პროკურატურას აქვს ძალიან სერიოზული კითხვები და ბრალდებები ამ პირების მიმართ. მე იმას ვგულისხმობ, რომ მინისტრის თანამდებობა იმუნიტეტი არაა. მაგალითისთვის, როდესაც ახალი მთავრობა მოვა, და თუ გაირკვა, რომ მინისტრობისას ჩავიდინე დანაშაული, – როგორ უნდა მოიქცნენ?! მე პასუხი უნდა ვაგო ჩემს საქციელზე და ეს სრულიად მისაღებია. რა განსხვავებაა ჩვეულებრივ მოქალაქესა და მინისტრს შორის?! მცირე დანაშაულებისთვის ჩვეულებრივი მოქალაქე აუცილებლად ციხეში მოხვდება და იგივე დანაშაულებისთვის რატომ უნდა ვიყო პირადად მე პრივილეგირებული?! იმიტომ, რომ თანამდებობა მიკავია?! ეს არაა სამართლიანი და სწორი. ჩვენ ასეთ ქვეყანას არ ვაშენებთ. ჩვენ გვინდა ავაშენოთ ჭეშმარიტად დემოკრატიული ქვეყანა და გვსურს, ერი იყოს თავისუფალი. როდესაც თქვენ ახსენეთ, რომ დასავლური მედიის წარმომადგენლები შერჩევით სამართალზე საუბრობენ, ეს ყველაფერი წინა მთავრობის ძლიერი „პიარის“ შედეგია. დიდ სირთულეს არ წარმოადგენს მცდარი შეხედულების დამკვიდრება, განსაკუთრებით მაშინ, როდესაც ძლიერი და გავლენიანი ლობები გყავს. თქვენთვის ცნობილი უნდა იყოს, რომ წინა მთავრობა მილიონობით დოლარს ხარჯავდა ყოველწლიურად თავიანთი ლობების დასაფინანსებლად. მე კიდევ შემიძლია გითხრათ, რომ არ უნდა დაგვავიწყდეს ის, თუ რა გააკეთა წინა მთავრობამ. მათ 300 ათასი ადამიანი გაასამართლეს ქვეყანაში სუფევდა შიში და ასევე აღსანიშნავია, რომ ჩვენ 25 ათასი უკანონოდ გაკეთებული აუდიო და ვიდეო ჩანაწერი აღმოვაჩინეთ. ისინი ამას 2005 წლიდან მოყოლებული ჩადიოდნენ. ჩვენ აღმოვაჩინეთ ეს მასალები, რომლებზეც წამების კადრები იყო აღბეჭდილი. ასახული იყო, თუ როგორ აწამებდნენ პოლიციელები ორ უდანაშაულო მოქალაქეს. ისინი მათ აიძულებდნენ ეთქვათ, თუ როგორ აპირებდნენ ტერაქტის მოწყობას. დიახ, ესენი კრიმინალები არიან. ვინც ეს ჩაიდინა, კრიმინალები არიან და ამჟამად ისინი ციხეში არიან. ასევე გეტყვით, რომ 25 ათასი უკანონოდ ჩაწერილი ვიდეო მასალებიდან ჩვენ აღმოვაჩინეთ პირადი ხასიათის მასალებიც, რომლებიც პოლიტიკოსების, ოპოზიციის წევრების, ჟურნალისტების, თავიანთი გუნდის წევრების, ცნობადი პირების პირადი ცხოვრების დეტალებს ასახავდა. ეს დაუჯერებელია. სამი კვირის წინ ისტორიულ მოვლენას ქონდა ადგილი, როცა გადავწყვიტეთ ამ მასალების განადგურება. ხალხს შვების გრძნობა გაუჩნდა, რადგან ყველას ეგონა, რომ მათი პირადი ცხოვრების ამსახველი მასალაც იყო ამ მასალებში.

– წელს სტალინის მონუმენტი ისევ დაიდგა გორში?

– როდესაც განგიცხადეთ, რომ წინა მთავრობა ძლიერ „პიარ ტექნოლოგიებს“ იყენებდა, მინდა დავაზუსტო, რომ ისინი „პიარს“ კვლავაც აქტიურად იყენებენ. და ესაა სწორედ ამ ყველაფრის მიზეზი, არანაირი სტალინის მონუმენტის აღმართვა არ ხდება გორში, ეს ტყუილია.

– არის ინფორმაცია, რომ მის დაბადების დღეზე მოხდება მონუმენტის აღმართვა.

– ეს არ შეესაბამება სიმართლეს და არ მოხდება. საქართველოს მთავრობა ამას არ გააკეთებს, ეს სასაცილოა.

– თუ ამას ადგილობრივი თვითმმართველობის ორგანოები გადაწყვეტენ?

– ისინი ამ გადაწყვეტილებას ვერ მიიღებენ, რადგან ამ ყველაფერს ცენტრალური მთავრობის თანხხმობა სჭირდება. ეს მცდარი ინფორმაციაა, რითაც ისინი დასავლურ პრესას ასაზრდოებენ. ეს ისეთი არასერიოზული საკითხია, რომ ამაზე კომენტარის გაკეთებაც არ მინდა სერიოზულად. მე რომ განვაცხადო რომ აქ აღმოვაჩინე სტალინის ძეგლი დამიჯერებთ?!

– მე ნანახი მაქვს სტალინის მუზეუმი გორში,სადაც არ შეიმჩნევა კრიტიკული განწყობა მისი პიროვნების მიმართ.

– მუზეუმი არსებობს, რომელიც დიდი ხნის წინ აშენდა საბჭოთა პერიოდში. იმედია სააკაშვილის მთავრობა ჩვენს მთავრობას არ დააბრალებს ამ მუზეუმის აშენებას. არ დაუჯეროთ მსგავს ინფორმაციებს. ასეთ სახის ინფორმაცია აუცილებლად უნდა გადამოწმდეს.

– საინტერესოა ადგილობრივი თვითმმართველობების საკითხი. ჯერ მათ დონეზე არჩევნები არ ჩატარებულა. თქვენი მთავრობის ხელში ბევრი გამგებელი და ადგილობრივი თვითმმართველობის მაღალი თანამდებობის პირები მოიხსნენ და მათ მაგივრად ახალი კადრები იქნენ დანიშნულნი. ეს ხომ არ გავს შურისძიებას?!

– სააკაშვილის მთავრობამ, როდესაც ხელისუფლების სათავეში მოვიდა, 50 ათასი ადამიანი გაათავისუფლა დაკავებული თანამდებობებიდან. მათ 40 ათასზე მეტი პოლიციის თანამშრომელი გაათავისუფლეს სამსახურებიდან და ათასობით ადამიანი ციხეში ჩასვეს. მე გეტყვით მაგალითს, შს სამინისტრო წინა ხელისუფლების დროს ყოველწლიურად 3000–4000 ადამიანს უშვებდა სამსახურიდან, თუმცა ამის შსახებ ბევრმა არაფერი იცოდა. ეს ხდებოდა იმიტომ, რომ ყველაფერი დამალული და კონტროლირებადი იყო. მედია კონტროლდებოდა, ახლა კი ყველაფერი ჩვეულ რიტმს დაუბრუნდა. შეიძლება ვინმეს უშვებენ სამსახურიდან, ვიღაც პენსიაზე გადის, ზოგი თანამდებობიდან თავისი სურვილით მიდის – ეს ნორმალური პროცესია. არ შეიძლება ადამიანმა წლების მანძილზე ერთი და იგივე თანამდებობაზე იმუშაოს. ახალი მთავრობა მოვიდა ქვეყნის სათავეში და ახალ გუნდთან ერთად უნდა მუშაობა, ეს ნორმალურია. ამ საკითხთან დაკავშირებით კითხვები აღარ არსებობს. აუცილებელია, რომ მიმდინარე პროცესებზე სწორი ინფორმაცია გქონდეთ. შემიძლია გითხრათ, რომ წინა მთავრობას კარგად გამოსდის „პიარი“ და სწორედ ესაა მიზეზი, რატომაც გაქვთ თქვენ არასწორი ინფორმაცია. იმედი მაქვს, რომ ეს აუცილებლად გამოსწორდება. აუცილებელია თქვენი ქვეყნის მთავრობასთან მეგობრული ურთიერთობების შენარჩუნება და ამიტომაც არის ასეთი მნიშვნელოვანი თანამშრომლობა ჩემს კოლეგასთან. ლიტვა და ლიტველი ხალხი ჩვენი მეგობრები არიან და სწორედ ესაა მნიშვნელოვანი და არა ის, რაც თქვენ წეღან ახსენეთ.