საქართველო დამოუკიდებელი ენერგეტიკული სახელმწიფო ვერ გახდება, თუ არ გვექნება ასეთი სახის პროექტები, - ასე გამოეხმაურა გიორგი ვოლსკი თბილისში „ნამახვანჰესის“ მშენებლობის მოწინააღმდეგეთა აქციას. პარლამენტის ვიცე-სპიკერმა ასევე აღნიშნა, რომ პროტესტის გამოხატვის უფლება ყველას აქვს.

„სამწუხაროა, რომ მოსმენა არ არის ერთმანეთის. მთელი მსოფლიოს გამოჩენილი, მოწინავე ექსპერტები, ვისაც ეს ეხება, ევროპის ენერგეტიკული საბჭოს წარმომადგენლები, ჩაერთნენ პროცესში. უნდა შეფასდეს და გაანალიზდეს საქართველოს ინტერესები: ეკოლოგიით დაწყებული, ეკონომიკითა და პოლიტიკით დამთავრებული. რა საკვირველია, გამოხატვის უფლება ყველას აქვს და უნდა ჰქონდეს. რა საკვირველია, გაცილებით უფრო მეტ ურთიერთმოსმენას საჭიროებს ხალხი და სანამ და ეს საპროტესტო ტალღა სანამ აგორდება, ყველა მხარე უნდა დაუფიქრდეს რასთან გვაქვს საქმე, რამხელა საფრთხეები ემუქრება ჩვენს ქვეყანას“, - განაცხადა ვოლსკიმ.

თბილისში „ნამახვანჰესის“ მშენებლობის მოწინააღმდეგეთა საპროტესტო აქცია მიმდინარეობს.