მოვუწოდებ ბატონ კუბილიუსს, კიდევ ერთხელ გაეცნოს, რა დაკვეთა აქვს ქართულ საზოგადოებას, რა მოთხოვნა აქვს ევროპარლამენტს და სენატს და მიხვდება, რომ სააკაშვილი არის ზარალი და მუხრუჭი ამ ქვეყნისთვის. რაც უფრო მალე ჩამოიშორებენ ამ ადამიანს მისი პარტია და კუბილიუსები, მათთვის უკეთესი იქნება,- ამის შესახებ უმრავლესობის წევრმა ირაკლი ზარქუამ განაცხადა.

კითხვაზე, რომ საკონსტიტუციო ცვლილებებს ოპონენტების თქმით, მმართველი გუნდი პატარა პარტიების პარლამენტში შესატყუებლად იყენებს, ზარქუა ამბობს, რომ ამ თემას „სააკაშვილი და მისი მარგინალური ოპოზიცია ავითარებს, რადგან მათ ინტერესებში დიალოგი და შეთანხმება არასდროს ყოფილა”.

„მათ იციან, რომ მოთხოვნა ვადამდელ არჩევნებსა და პატიმრებზე უსაფუძვლოა. დღესაც შემიძლია მათ ვუთხრა - ბატონი მელია არის თავისუფალი, გადაიხადოს ჯარიმა 11 ათასი ევრო, რომელიც დაწესებული აქვს კონსტიტუციას და დღესვე გამოვაცილებ, თუ გასასვლელს ვერ აგნებს.

რაც შეეხება ვადამდელ არჩევნებს, ამის საფუძველი არ არსებობს. ჩვენ ეუთო/ოდირის დასკვნას, რომ იყო ხარვეზები, ვეთანხმებით, თუმცა ძირითადი უფლება არჩევანის გაკეთების, დაცული იყო.

ოპოზიციაშიც არ არის ერთსულოვნება. როდესაც ევროპარლამენტი და სენატი გეუბნება, რომ აქციები არის რუსეთის ინტერესებში და შენ მაინც ავითარებ ამ ობსტრუქციას, არ შეიძლება ეს გაიზიაროს იქ არსებულმა ზოგიერთი ევროპული ყაიდის პოლიტიკოსმა, მათ შორის „ნაციონალურ მოძრაობაში”. ამიტომ მათ მივმართავ, იქნებ დროულად გაემიჯნონ მათ“,- განაცხადა ირაკლი ზარქუამ.

ევროპარლამენტარმა, ანდრიუს კუბილიუსმა განაცხადა, რომ ეფექტიანი იქნება, თუ პოლიტიკურ დიალოგში მონაწილეობას ბიძინა ივანიშვილი და მიხეილ სააკაშვილი მიიღებენ.