ოპოზიციაში არიან ძალები, რომელთაც სიკვდილივით არ უნდათ, მოლაპარაკება იყოს შედეგიანი, ვინაიდან, მათ ეს არაფერს ისეთს არ უქადის, რის შედეგადაც, გამარჯვების მოპოვებას შეძლებენ. მათ სურვილს, რომ არჩევნები ტარდებოდეს იქამდე, ვიდრე ოპოზიციური ძალა ხელისუფლებაში არ მოვა, შესაძლებელია „ინფანტილურიც“ ვუწოდოთ,- აცხადებს ადამიანის უფლებათა კომიტეტის თავმჯდომარე, მიხეილ სარჯველაძე.

მისივე განცხადებით, მმართველი გუნდი, მოლაპარაკებასთან დაკავშირებით, ოპტიმისტურადაა განწყობილი.

„მოლაპარაკებების ამ ფაზას შევხვდებით ნაწილობრივ უკვე განხორციელებული კომპრომისებით, რაც გამოიხატება კონკრეტულად დაძრულ ინიციატივებში პარლამენტში და ნაწილთან დაკავშირებით მზად ვართ, რომ დისკუსია გაგრძელდეს. იმ ფონზე, როცა არჩევნების გაყალბება არანაირად დასტურდება და რეალურად ახირებასთან გვაქვს საქმე ოპოზიციის მხრიდან, უმიზეზოდ გამოწვეული პროტესტი, რომელიც პარლამენტში არშესვლასთან დაკავშირებით გამოიხატება, როცა ვისმენთ უცხოელი პარტნიორების მხრიდან მათ შორის ოპოზიციის მისამართით პარლამენტში შესვლასთან დაკავშირებით და სხვა კომპრომისების აუცილებლობის შესახებ, რა თქმა უნდა, ასეთ ფონზე მნიშვნელოვანია ითქვას, მთავარი კომპრომისი, საიდან უნდა იყოს მოსალოდნელი, ეს არის ოპოზიციის მხრიდან დათმობებზე წასვლა. მნიშნველოვანია ოპოზიციის მხრიდან დამოკიდებულება აუცილებლად შეიცვალოს და ასეთ შემთხვევაში გვქონდეს რეზულტატის იმედიც", - განაცხადა მიხეილ სარჯველაძემ.

ევროპული საბჭოს პრეზიდენტის, შარლ მიშელის პირადი წარმომადგენელი კრისტიან დანიელსონი საქართველოშია. შვედ დიპლომატს მედიაციის პროცესში ჩართულ მხარეებთან შეხვედრები ორშაბათს აქვს დაგეგმილი. კრისტიან დანიელსონის მედიაციით მმართველ გუნდსა და ოპოზიციას შორის მოლაპარაკებების პირველი რაუნდი 12-19 მარტს გაიმართა. 22 მარტს კი შარლ მიშელმა განაცხადა, რომ კრისტიან დანიელსონი საქართველოში მედიაციას გააგრძელებს.