დიალოგის ფორმატში ყოველთვის ვიყავით და ოპოზიციის რადიკალურ ფრთასაც მოვუწოდებდით, რომ ყველა საკითხი მოლაპარაკებების მაგიდასთან განგვეხილა, - ამის შესახებ საპარლამენტო უმრავლესობის წევრმა გივი მიქანაძემ განაცხადა.

მისი თქმით, თუ მხარეებს შორის სურვილია, დიალოგის რესურსი ყოველთვის მოიძებნება.

„დიალოგის ფორმატში ყოველთვის ვიყავით და ოპოზიციის რადიკალურ ფრთასაც მოვუწოდებდით, რომ ყველა საკითხი მოლაპარაკებების მაგიდასთან განგვეხილა. თუ მხარეებს შორის სურვილია, დიალოგის რესურსი ყოველთვის მოიძებნება, მაგრამ არის გარკვეული პრინციპები, რომლის გადაბიჯებაც შეუძლებელია, რადგან ეს დაკავშირებულია მოსახლეობის ნებასა და სამართლის უზენაესობასთან. ამის მიღმა ნებისმიერი საკითხი, რომელიც შეიძლება განხილულიყო, მზად ვართ, დიალოგისთვის“, - განაცხადა მიქანაძემ.

დღეს „ნაციონალური მოძრაობის“ თავმჯდომარე, ნიკა მელია დააკავეს.

ნიკა მელიას ედავებიან ჯგუფური ძალადობის ხელმძღვანელობას და მასში მონაწილეობას. საქმე ეხება 2019 წლის 20 ივნისს პარლამენტის შენობასთან განვითარებულ მოვლენებს. მაშინ აქციაზე ნიკა მელიამ იქ შეკრებილ ადამიანებს მიმართა, რომ მათი ადგილი პარლამენტს გარეთ არ იყო და ისინი პარლამენტის შენობაში უნდა ყოფილიყვნენ. ამის შემდეგ სიტუაცია დაიძაბა და იქ შეკრებილები სამართალდამცველებს დაუპირისპირდნენ.

2019 წლის 27 ივნისის განჩინებით, ნიკა მელიას აღკვეთის სახით 30000-ლარიანი გირაო შეეფარდა, მაშინ პარლამენტმა მას დეპუტატის იმუნიტეტი პირველად მოუხსნა და სასამართლოს განჩინება აღსრულდა. მან პირველ ჯერზე გადაიხადა 30000 ლარი, თუმცა მას შემდეგ რაც, 2020 წლის 1-ელ ნოემბერს პარლამენტთან აქციაზე ელექტრონული სამაჯური დემონსტრაციულად მოიხსნა, გენერალურმა პროკურატურამ კიდევ ერთხელ მიმართა სასამართლოს, რათა ნიკა მელიას გირაოს სახით 100 000 ლარი შეფარდებოდა, თუმცა სასამართლომ 40 000 ლარი განუსაზღვრა, რომელიც მან არ გადაიხადა.

ნიკა მელიას თბილისის საქალაქო სასამართლომ აღკვეთის ღონისძიებად პატიმრობა 17 თებერვალს შეუფარდა. მეორე დღეს, 18 თებერვალს, გიორგი გახარიამ პრემიერ-მინისტრის თანამდებობა დატოვა. ამასთან დაკავშირებით კი, შინაგან საქმეთა სამინისტრომ მელიას საქმეზე დაგეგმილი ღონისძიება დროებით გადადო.

22 თებერვალს, მეათე მოწვევის პარლამენტმა ირაკლი ღარიბაშვილის მთავრობას ნდობა გამოუცხადა.