შალვა ნათელაშვილმა „ნაცმოძრაობა“ და მისი კლასტერი თავისი ფანჩატურის ოპოზიციად გადააქცია - ამის შესახებ ფრაქცია „ქართული ოცნების“ თავმჯდომარე მამუკა მდინარაძემ განაცხადა.
„ამ ადამიანს არ უნდა დავუკარგოთ, მაინც ძლიერი პოლიტიკოსი აღმოჩნდა, რადგან მთელი „ნაციონალური მოძრაობა“ და მისი კლასტერი შალვას ფანჩატურის ოპოზიციად გადააქცია. ეს შეძლო, ეს უნდა დავუფასოთ და ვუთხრათ, საკმაოდ ძლიერი აღმოჩნდა მისი ბეგრაუნდის მიუხედავად“, - განაცხადა მამუკა მდინარაძემ.
„ლეიბორისტული პარტიის“ თავმჯდომარე შალვა ნათელაშვილმა სოციალურ ქსელში დაწერა: „როგორც კი ხელი გაგექცევათ ნიკა მელიას დასაჭერად პულტის დაწკაპუნებაზე, ჩემი ხელით შეგყრით ყველას ციხეში“.
პარლამენტმა ნიკა მელიას სადეპუტატო იმუნიტეტი შეუჩერა.
„ჯგუფური ძალადობის ხელმძღვანელობის და მასში მონაწილეობისთვის“ სისხლის სამართლის პასუხისგებაში მიცემულ ნიკა მელიას თბილისის საქალაქო სასამართლომ 2019 წლის 27 ივნისს აღკვეთის ღონისძიების სახით შეუფარდა 30 000-ლარიანი გირაო და დამატებით შემზღუდავი ღონისძიებები, მათ შორის, ელექტრონული მონიტორინგი. თუმცა, 2020 წლის პირველ ნოემბერს, საზოგადოებრივი თავშეყრის ადგილას საჯარო განცხადების გაკეთებისას, ნიკა მელიამ ელექტრონული მონიტორინგისთვის განკუთვნილი სამაჯური მოიხსნა.
სასამართლოს მიერ განსაზღვრული გირაოს გადახდის ვადის გასვლის შემდეგ მელიას მიეცა დამატებითი ვადა გირაოს უზრუნველსაყოფად, თუმცა ბრალდებულმა არც დამატებით მიცემულ ვადაში არ შეასრულა სასამართლოს განჩინებით დაკისრებული ვალდებულება და გირაოს თანხა არ გადაიხადა.
12 თებერვალს საქართველოს მთავარმა პროკურატურამ ნიკა მელიასთვის აღკვეთის ღონისძიების სახით შეფარდებული გირაოს უფრო მკაცრი ღონისძიებით - პატიმრობით შეცვლის შუამდგომლობით სასამართლოში წარსადგენად პარლამენტს მიმართა.
